1 «Eettenee yanna iimixxi mootumma xassa ifi ifika abixxeexxi ookkonee waajubichcho qophedha fuleeke tomme dubarra fakkaattaan.✝ 2 Insa'ne giddii'n ondi gowwakemman; ondi kinni qalbeeffatammakemma'a. 3 Iikk gowwi dubarri xassiinka miya abixxee malee'e geltaaxxa xassiinxa zaiyte afeemmaba'a. 4 Iikk qalbaamessi dubarri kinni ifi ifike xassinni welti geltaaxxa xassiinxa zayite xassiinke mi'uwwi giddo afe'eeman. 5 Iikki waajubichchi dagebaang turaa wodda mugi loolloosee'naa duuchchiingi dubarri diiphe.

6 «Hashsha wodhakki geyee wodda, ‹Iikk waajubichchi dagete'n hedheen fuldineexxi qophedhdhe!› hiyyaak canci laqeme.

7 «Eettene yanna iikk tommiing dubarri dammaqeexxi ifi fika xassa qophpheesedhe. 8 Iikki gowwi dubarri ookkonee qalbaameessa dubarra, ‹No'ok xassi xo'aaten; ha'nooxxe xassiinxe zayitenaa'n no'aa uwwe!› hiyye.

9 «Qalbaamessi dubarri kinni insa'ne'n, ‹Anfe'eennexxi zayite no'aanna ha'no'aa geltabaan; martineexxi gurgurammake mannanaa'n ifi'a hidhdhe› hiyye hiisse haaso'e.

10 «Iikki gowwi dubarrinna xassiinxa zayite hidho'a me'eeke'n iikki waajubichchi dage. Iikki qixxeeffateemmak ondi qalbaamessi dubarri waajubichchik welti jilatike mine'ni e'ye; hulatinna cufende.

11 «Udumi giddii'n gate'eemmak iikki weli dubarri dageexxi isoo, ‹goottaa goottaa! Hula no'o'a bani!› hiyye.

12 «Isi kinni, ‹Ani dhugaate ha'no'n haaso'aannen, ha'no ege'nebe'no› hiyya'n insa'ne'n hiisse haaso'e.✝

13 «Tennexxee baratanna saate ege'ndinammabaaxxee qixxeffatine heqqedhdhe!

14 «Mageniinxi mootumma, erganjuwwa ifika ye'eexxi afe'eexxa karra insa'ne'n maganne uwweexxi welebaa me'a ke'eeke manjichcho fakkaattaan.✝ 15 Mitte mittengee dande'a isi isixxeshshanni, mittekee onde Mekiilite*; mittekeenna lame taalante; iittanni mittekee mitte taalante uwweexxi wele bogibaa me'e. 16 Iikki onde taalante adhdhemmak manjichchi me'exxi, maallaqa ookkonenne dadaleexxi onde taalante ibise. 17 Iittanni lame taalante adhdhemmakinna daddaleexxi wele lame taalante ibise. 18 Mitte taalente adhdhemmak iikki manjichchi kinni bale umeexxi ookkonee ifike gootika maallaqa mooge.

19 «Ookkone erganjuwwik gootti lumoxxe yanna uduma dageexxi insa'ne'n uwwemmaka maallaqa maa assineexxa haassonaa insa'nee qore. 20 Onde taalentek adhdhemmak iikki manjichi wele onde taalente adhdhe shiqeexxi, ‹Anke gootta ane'n onde taalente uute'ettan; kunse wele onde taalente ibiseennen!›

21 «Gootti isikinna isoo ‹Elo qico hujje'eetten; ati elokinna xuurameessi erganj! Heenoxxe yaane'n xuurameessake kaddeeten, ani atee heddo yaane'n baalloonsannon. Amo atike gootixxe gammashsho'n e'yi› hiyye.

22 «Lame taalente adhdhemmak iikki manjichchinna shiqeexxi, ‹Anke gootta ane'ni lame taalente uute'eetan; kunse wele lame taalente ibiseennen› hiyye.

23 «Gootti isikinna ‹Eloxxen, ati elokinna xuurameessi erganji heenoxxe yaane'n xuurameessa kaddeeten, heddo yaane'n atee baallonsannon. Amo atike goottixxe gammashshobaa e'yi› hiyye.

24 «Mitte taalente adhdheemmak iikki manjichchinna shiqeexxi, ‹Anke goottaa ati rokkebexxoke boonchinaa'n haa'mitatoke, facaassebexxoke boonchinaa'ninna bukk assexxatoke marartabexxoke manjo kaddettexxa ege'neennen. 25 Tennexxee atee sodaattennexxi taalente atixxa ume sho'eennen. Ane'n uutetak atik maallaqi kunse› hiyye.

26 «Isik goottinna iso'n hiyye hiisse haaso'ee qici, ‹Koo ati fuggichchinna booso'i erganji! Facaasebe'no boonchinaa'ni ha'mannoxxa, rokkebe'noke boonchinaa'n bukki assedhanoxxa egendeetechchinni, 27 hige daganno wodda maallaqa anka ilee'naa adhdhannoshsha ati dadalaake manna'n uwwa hassissamman.

28 « ‹Yoonna amme isixxa eettene taalente isonaa'n aaxineexxi tomme taalente afe'eemmakee uwwe. 29 Afe'eekee lebenda, isi'aanna bira saxxa. Afebaakenaa'n iikki afe'eemmangeechchi midde adhdhema.✝ 30 Konnee woyi fulabaaka erganjo fulchitineexxi gadhi'a dukkanate'n hunne! Ookonna oodhishshanna isso qarate kaddaan› hiyye.✝

31 «Manjink Belti eettene erganna duuchchinni ifike ulfinninni dagaa wodda ifike ulfinnixxe moote hana ofo'laan.✝ 32 Gosa gosaki ardi duuchchinna isi edo bukki hiyyaan; allalisanji gedhebo re'etenaa'n gargar foyammashsha isinna arda mitte mittekenaa'n gargar foyaan. 33 Gedhebo ifike midda'n re'etanna ifike bita'a'n uurrisaan.

34 «Ookonee wodda Moyanji ifike midda'n hedhemmakaara hiyyaa qici, ‹Ha'no anni ank eebbiseek manni, amme butta dadendeexxe barranaa'n ha'no'aa qixxeessendeexxa mootumma dhaalle. 35 Solo'we'naa anee itissinne'een, dhebowe'naa anee ha'wisine'een, keessummumma dage'naa anee keessunsitine'een; 36 daaree'naa anee oddessitine'een, elagophe'naa anee laqqine'een; usureme'naanna daginee anee uudine'een.›

37 «Ookkonee wodda qulliyye iittinna iso'n hissite hita'n haasottaa qici, ‹Goottaa haano solo'wite'naa anfee atee itinsenne? Dheebottenaa haano anfee atee ha'winsenne? 38 Keesummumma haano dagge'naa anfee atee keensunsiinnenne? Daarte'naa haano anfee atee oddeessinnenne? 39 Elagophee'naa yookaan usurendee'naa haano anfee dange atee uundenne?›

40 «Moyanjikinna insa'ne'n, ‹Dhugaate ha'no'ni haaso'aannen, konne anke dayyuwwinaa'n ookkone shiixxedhaake mitti'a assitineexxi ani'a assitineeshshaten› hiyye hiisse haaso'e.

41 «Ookkoneechchi uduma moyanji ifke bita'a'n hedheekaara hiyyaa qici, ‹Ha'no badinendineek manni seexanakeenna isixxe erganna'a qixxeessendeexxe duuchchi woddixxe giiraba'a anenaa'n bayyatine me'we. 42 Solo'wee'naa anee itisineba'a, dheebo'we'naa anee ha'wissineba'a. 43 Keessummumma dagee'naa anee keesunsitineba'a, daaree'naa anee oddeessitineba'a, elagophee'naa, usureme'naanna daggine anee uddineba'a.›

44 «Insa'nenna, ‹Goottaa, solo'wite'naa yookaan dhebo'witee'naa yookaan keesummumma dagge'naa yookaan daartee'naa yookaan, elagophee'naa yookaan usurendee'naa haano anfe atee gargaara gonphenne?› hine hiissine haassonna.

45 «Moyanjikinna insa'ne'n, ‹Dhugaate ha'no'n haaso'aannen, konne shiixxedheeke anke dayyuwwinaa'n mittekee ha'no assa gopha ani'a assa gophineeshshaten› hiyye hiisse haaso'e.

46 «Tennexxee insa'ne duuchchii woddixxe mura woxxaba'a, qulliyye kinni duuchchii woddixxe hedhobaa me'ita.»✝