1 «Manni ha'noo uudo'a ‹eloxxa ha'nooxxa huje› manni edo assitnoqqe'e, heqqedhdhe! Assitinoole iimike ha'noke anninaa'n hira alfitinaba'a.

2 «Manji edo ulfaatatee ora ora'ninna Ayihudiinke magenooffachchotike mine duucchcha'n malagata ufuufisammake ifi uggudhdhammake mannisha ha'nonna hiyyeeyyetee uwwa uutina wodda leellatee hitineexxi iitta assitinoqqe'e; dhugaate ha'no'n ahaaso'a'ennen iitta assaak manni ifika hira alfe'een. 3 Ha'no kinni hiyyeeyyetee'e uwwa uutinaa wodda ha'noxxi middixxi anga uutaachcho ha'noxxi bita'ixxi anga midde egendoqqe'e! 4 Uwwa ha'nooxxi sho'ikite kaddowwaal. Sho'ik assendeexxa ege'naak ha'nook anni sho'ik hira ha'no'a uwwaan.

5 «Ha'no soodattinaa wodda, ifi uggudhdhaake mannishsha kaddinoqqe'e! Insa'ne manni insa'nee uudo'a hineexxi Muuseka seera barantammake minuwwaninna weldeena weldeenna'n uurrineexxi Mageno soodantaan. Dhugaate ha'no'n haaso'aannenni; insa'ne ifixxe hujeka hira edinseenni adhdhine'eeni.✝ 6 Ha'no kinni soodattinaa wodda ifixxe kuta giddi'a e'yitineexxi leella'nebaake ha'nooke Annibaa soodatte; Sho'ik assendeexxa afaak Anni ha'nookinna hira ha'no'a uwwaan. 7 Soodattinaa wodda hiyyichcho xonbati insa'neexxi soodachcho insa'ne'a laqenda'neechcho labbammake, Mageno ege'nebaake mannishsha hiyyichcho lebbine lebbine hitinoqqe'e.✝ 8 Ha'no kinni Anni ha'nook isoo'o soodattinebaa edi darre maachchi ha'no'a hasisaaxxa ege'neemmaxxee insa'nee fakkaatinoqqe'e.

9 «Tennexxee hitina'ni soodatinnaa qici,

« ‹Iimate'n hexxetteke No'oke Annaa!

Summi atik woyyoomowwaal.

10 Mootumma atixxinna daggowwaal;

Fedhii atixxi iimate'n kaddeemmashshanni

iittanni buttate'ninna kaddowwaal.

11 Barratika no'oka budeena techcho no'o'a uwwi.

12 No'onna no'oo balleessemmakeeri'a gattowwaal hinenneshsha

no'oxxa balleessa no'aa gattowwaal hiyyi.

13 Ookkone fuggichchanaa'n no'oo anjir malee'e

hega uudemate'n no'oo e'yishshoxxe'e.

(Mootumma, hunnatinna ulfinni

duuchchii woddi'a atiken; hamiin.)*

14 Ha'noo balleesseemakeeri'a gattowwaal hitinoole, iimik ha'nook Aninna ha'no'a gattowwaal hiyyaan. 15 Yaane kinn ha'no manniinxa balleesa gattowwaal hiyya gophphinoole iima hedheek ha'nook Anninna balleesa ha'nooxxa ha'noo'a gattowwaal hiyyabaan.✝

16 «Ha'no agabo goddo hossinaa wodda ifi uggudhdhaak manni assammashsha lumbu hitinoqqe'e! Insa'ne agabo goddo hosa insa'neexxi ege'nendo'a alba ifike'n yaadotixxa bifa leellinshan. Dhugaate ha'no'n haaso'annenni iitta assakiir ifika hira alfe'een.✝ 17 Ati kinni agabo goddo hossatoo wodda alba atika anshedhi; umo atike'ninna issati. 18 Tennenni agabo goddo hosa atixxa ege'neddaaki leellabaake atike Anna'nite malee'e wele manna'ni kinni sho'endeexxe kadda; sho'iki assendaaxxa afaaki atik Anninna atika hira ati'a uwwaan.»

19 «Daameli balleessaba moodhalshetinna enqite moodhitaaba buttate'n karra ifi'a bukki assexxinoqqe'e.✝ 20 Yaane kinni daamulinna balleessabaaba, moodhalshetinna enqite moortabaaba iimate'n karra ifi'a tuu'le. 21 Karra atixxi hexxeeba godob atikinna ookko hedhaan.

22 «Ille bisiinke xassan. Tennexxee ille atixxi fayyaxxe kaddoole bisi atik duuchchi ifake kadaan. 23 Ille atixxi fayya gophoole kinni bisi atik duuchchi dukkanate kadaan. Tennexxee ate'ni hedheek ifi dukkanate kadoole dukkanafa'i hittaxxeexxe dimma dukkana kadduta!

24 «Mitti manji lame gooti'a erganjoke kada dande'abaan; mitte jibbaan, langaka eeyyaan, yookaan mittinbaa higeexxi langaka tuffataan. Iittanni ha'nona Magenokeenna maallaqakee'e ergatema dandeettinaba'a.

25 «Tennexxee ani ha'no'n hiyyaane qici, hedho ha'nooxxee maachcho indanno maachcho ha'winanno, maachcho oddo'winanno? Hitina'n wixixxi hitinoqqe'e. Hedho itatenaa'n manjummatinna seemmatenaa'n saxxabaata? 26 Amme iimatixxa ci'a uude! Facaalsitaba, haa'mitaba'a gootarake'n tuu'litaba'a, kaddoo malee'e iimik Anni ha'nook isee itisaan. Ha'noota ci'atenaa'n lumosha saxxinabaata? 27 Isi ha'no giddii'n wixixxi hiyye ifixxe hojja'ni* mitte ciqile lebatee'e dande'aak hedhee?✝

28 «Seemmatee mayee'e wixxixxi hitina? Badda'a giddika daraaro hitta nophpha'neexxa amme uude! Daraaruwwi elo'aba'a yookaan suuqedhaba'a. 29 Yaane kinn ha'no'n kulo Solomooni midde ifixxe durumma giddii'n mittinke daraar qicixxa midde oddo'webaan.✝ 30 Techcho leeliteexxi soodo giirate'n gubattaaxxa anso Mageni iitta oddeesseechchinni ha'no amana xe'yiteek manni ha'no'a hitta caalchiseexxi oddeessa gophphata? 31 Tennexxee, ‹Maa indanno? Maa ha'winanno? Maa oddo'winanno?› hitina'ni wixixxi hitinoqqe'e! 32 Mageno ege'nebaak manni tennee yaane duuchcha alfatee gongaan; ha'no kinni iima hedheek ha'nook Anni tinni duuchcha ha'no'a hasissaaxxa ege'ne'een. 33 Ha'no kinn edisineexxi Mageniixxa mootummanna qullumma isixxa halse! Hassinaaxxi yaane duuchchanna ha'no'a lebendaan. 34 Soodi'a wixixxi hitinoqqe'e! Soodo umi ifingee wixixxi hitaan; Mitte mittendi barra geltaaxxa umo ifingixxe rakko affe'en.»