1 Eettenee yanna hordofeeyye Yessuusibaa shiqqeexxi, «Mootumma iimixe'n duuchchingena'n sa'aak ayyete?» hite isoo qorte.✝ 2 Yessuusinna anno mitte ye'e insa'nexxe oddo'n uurriseexxi,✝ 3 Dhugaate ha'no'n haaso'aane, jijjiirema gophphinoole oosetishsha kada gophphinoole iimixxa mootumma haranga e'yitinabaan. 4 Tennexxee tenne annoshsha ifi shiixxishaak iimixxe mootuma'n duuchiingenaa'n sa'aak isoten. 5 Iitta hexxeexxa anno anke summinni adhdhaak anee adhdhaan.

6 Yaane kinni ane'n amanaake konne shiixaramma manni giddii'n mitte guggufachchisaak manji lumoka daammiink kinji isike gooba'n usureme'naa abbaayyatixxe dhi'mo'n lixe'eele isi'a woyyamman.

7 Manjo guggufachchiissaaxxe yaanuwwaxxe buutoxxee tenne butta'a aanne'e; guggufachchiissaxxi yaanna daggebaak gattabaan; yaane kinni iitti guggufachchiissaaxxi yaane isi darree'n daggaake manji'a aanne'e. 8 Atixxi anga yookaan atixxi lekka cubbo hujjottaa ati'a buutote kadda'noole isee ifinaa'n kutte huni; lame anga yookaan lame lekka affettexxi duuchchi woddixxe giira'n hunedettexxi mannii'n hokkola kadde'e yookaan naafake kadde'e duuchchii woddixxe hedhobaa e'ya ati'a woyyan.✝ 9 Ille atixxi cubbo hujjotta ati'a buutote kadda'noole isee ifinaa'n fulchite hun. Lame ille affe'e duuchchii woddixxe giira'n hunemati mannii'n mitte illenni hexxe hedhotibaa e'ya woyyan.✝

10 «Ani ha'noo'n kuloo, iima hexxeexxi insa'nexxi erganna iima hedheeka anke annika alba duuchchii wodda uuddammaxxee konne shiixxaramma manninaa'n mittekanna tuffattinabaashsha, heqqedhdhe! 11 Manjiink Belti dageechchi ba'eemmaka manna anjiro'aaten.»

12 Higgeen Yessuusi hiyyee qici: «Ha'noo'n maa labba? Manjichchi mitti afe'eeke dhibbi gedhebi giddii'ni mitti ba'oole, sallaane tommenna sallaane gedhebo koobatte'n waaleexxi ookkone ba'eemmaka hasitto me'aa waalaata? 13 Dhugaate ha'noo'n haaso'aanne, ookkone ba'eemmaka alfee wodda ookkone ba'emmabaake sallaane tommenna sallaane gedhebii caala ookkone ba'eexxi afemeemmake mitte gedhechcho'n gammadaan. 14 Iittanni iimik ha'nook anni konnee shiixxarammuwwinaa'n mittikinna ba'o'aa eeyyaba'a.

15 «Atik dayyi atee balleesseexxe kaddoole martettexxi atinna isinni calli mitteba hexxineeba isixxa belleessa iso'n kul. Hiteettexxa laqeexxi higeexxe kaddoole atika dayyo haaroba ifike assexxatton.✝ 16 Hitettexxa laqa giboole kinni lame yookaan sase dhugaa kula manjixxi yaane kokeessitammaxxee langaxxa lame yookaan sase manjo ifi'n lephphi.✝ 17 Insa'ne hinaaxxanna laqa giboole marte tennee Mageniinxe tuuta'n kuli; Mageniinxa tuutaxxanna laqa giboole isoo Mageno ege'nebaake yookaan qaraxammake manjishsha laakko'i.

18 «Dhugaate ha'noo'n haaso'aannen butta usurtinaak duuchchi iima usuremeeke kadaan; butta tikkinaak duuchchi iima tikemeeke kadaan.✝

19 «Higgeenna ha'no'n kulo, ha'noonaa'n kaba butta lami manji heene yaane'ninna weli aaggeexxi Mageno soodatoole iima hedheek ank anni eettenee yaane insa'ne'a assaan. 20 Lami yookaani sasi manji anke summinni bukki hiyyaake booncho'n ani ookko insa'nexxe oddo'n afemannon.»

21 Ookkoneechchi uduma Pheexiroosi Yessuusibaa shiqeexxi, «Goottaa ank dayyi anee balleessoole me'e yana isi'a gattowwaal hiyyanno? Torbaane yannaa qici'aan?» hiyye isoo qore.✝

22 Yessuusinna «Torbaanne tomme yanna torbaanele malee'e, torbaane yanna calla hiyyabe'non» hiyye hiisse haaso'e.✝

23 «Tennexxee iimixxi mootumma ifike erganjuwwa'n hedhemaka maallaqa towatto'a mudhdheemmake moyanjo labbaan. 24 Isinna ookkonee maallaqa towata safeeshshanni tomme kuma makiliite* liqa afeek mitti erganji abideme isibaa dage. 25 Kunni erganji liqeeffateemmaka liqa hiissa dande'a gopheemmaaxxee isi umo isingenninni, isixxi are, isixxi oosenna afeexxi karra duuchcha gurgurendenaa iikki liqi uwwemaashsha iikki moyanji ajaje.

26 «Tennexxee iikki erganji isixxe lekka'n ibeexxi isoo, ‹Anke goottaa maganneten ani'a hittetexxi ossi; ane'n hedheeka liqa duuchcha ati'aa hiissannon› hiyya'n kadhate. 27 Ookkonee erganjik goottinna isi'a marare; liqakanna isi'a waaleexxi me'o'a wocci asse.

28 «Iikki erganji ifike gootti edii'n fuleeshshanni mitte dhibba diinaare* isika liqa afeemmaka ifika erganjo jaalo afeexxi isika gooba hudhe abidat, ‹Koo liqeeffatteettaka anka Maallaqa ani'a hiissi!› hiyye.

29 «Tennexxee kunni isi'a ergatemmammak isik jaali isixxe lekka'n ibeexxi, ‹Maganneteni ani'a hite ossi; liqeeffateennakanna ati'a hiissannon› hiyye isoo kadhate.

30 «Isi kinni, waala gibe; liqeeffateemmaka maallaqanna isi'a hiisse bira qico'n iyyemareexxi ookkonee manjichcho usurriinke mine'n usursiisse. 31 Weli isik jaaluwwa kadeek erganjuwwinna tennee afee wodda lumo qico yaadat mareexxi kaddeexxa duuchcha ifike gootta'n kule.

32 «Ookkoneechchi uduma moyanjikinna ookkone erganjo ye'iseexxi, ‹Koo, ati fuggichchi erganji! Yoona anee kadhatteettaxxee! Ookkone liqa duuchcha ati'a waaleennen. 33 Ani ati'a maraareneshsha atinna erganjo atike jaali'a marara hassissammabaata?› 34 Tennexxee isik gootti iso'ni mufateexxi liqeeffateemmaka liqa duuchcha hiissa qico'ni usurii mine'n isoo rakkisaake manna'n sa'isse uwwe.

35 «Mitti mitti ha'noong ha'nooka dayyo mitte godobinni gattowwaali hiyya gophphinoole iima hedheek anki anninna iittanni ha'no'aa gattowwaal hiyyabaan.»