1 Feerisitonna Seduuqito Yessuusibaa daggeexxi isoo hega uuddo'a beessisa insa'ne'n iimatenaa'n leellisho'a isoo qorte✝ 2 Isi kinni insa'ne'n hiyye hiisse haaso'ee qici, «Hashsha wodda ‹Iima diimmatte'een xeeni ganabaan› hitinaan. 3 Gorsanna ‹Iima diimmatte duumanchiteemmaxxe techcho xeeni gana ganaan› hitinaan. Ha'no iimitika beessisa gargar hiissa egendinaan; yaane kinni bariinka beessisa gargar hiissa dandetinabaan* 4 Fuggittenna Mageno egendebbaaxxi ila beessisa yortaan. Yaane kinni wabeeka Yoonaasik beessisa malee'e wele beessisi isi'a uwwemabaan» Ookkoneechchi uduma Yessuusi insa'nee waale me'e.✝

5 Hordofeeyye abbaayyati widi'a fooffee wodda buddeena iyyedha deete. 6 Yessuusinna hordoffeeyyete'n, «Qalbeeffatte; Feerisitotikenna Seduuqitoti gamaminnaa'n ifi heqqedhdhe» hiyye.✝ 7 Insa'nenna «Yessuusi tennee iitta hiyyeechchi buddeena iyyedaqqa gonpheennaxxeete kaddaan» hina'n weli'aa weli haasonne. 8 Yessuusinna insa'nee haasonneeka haaso'a ege'neexxi insa'nee hiyyee qici «Ha'no amana xe'ite'ek manni ‹Buddeena iyyedaqqa gonpheennexxeten› hitinexxi maye'a weli'aa weli haasottina? 9 Ta'i qico'ni yaane ha'no'n aaggebaan hiyyotebaata? Ondi buddeeni onde kumi manni'a geye gatee'naa me'e wo'maa qore hanba aaxxineexxa kassi hitinna'neba hiyyatebaata?✝ 10 Iittanni torbaani buddeen shoole kumi manni'a geyeexxi gate'naa me'e qore aaxxineexxa kassi hitinna'neba hiyyatebaata?✝ 11 Yoona ani ha'noo'n haaso'ennek buddeeniinxeete kaddebaaxxa hittataa qalli hiyya gophphina? Ta'anna Feerisitokenna Seduuqitoti gamaminnaa'n ifi heqqedhdhe» 12 Hordofeeyyetinna Yessuusi insa'ne'n kuleexxi yaane Feerisitotixxenna Seduuqitotixxe barachchiissaxxe malee buddeeniinxeete kaddebaaxxa eettene yanna egende.

13 Yessuusi Filphoosi Qiisaariya hiyyemaake bogiba geyee wodda hordofeeyye ifixxa, «Manni Manjiinka Belto ayyete hiyya'ne?» hiyye qore. 14 Insa'nenna «Mitti mitti ‹Xammaqallo Yohaannisiten› hiyya'neen; weli ‹Eelyaasi› hiyya'neen; welikinna ‹Ermiyaasi› hiyya'neen yookaan ‹Edixxe wabeeko giddii'ni mitteken› hiyya'neen» hite.✝ 15 Yessuusinna insa'nee, «Ha'noota anee ayyete hitinna'ne?» hiyye qore. 16 Pheexiroosi hiyyemmeek Simi'ooni, «Ati Kiristoosi hedhaake Mageniink Belton» hiyye hiisse haaso'e.✝ 17 Yessuusinna iso'n hiyye haaso'ee qici, «Yoonake belto koo Simi'ooni, ati eebbisendeetteken; tennee ate'n leellisheek iima hedheeke anke anna malee'e manjokebaan. 18 Tennexxee ani atee Pheexiroosi* hiyyaannen; tennee rassa'ninna Mageniinxa tuuta ijaarannon. Reyotixxi hunnanna tennee Mageniinxa tuuta injiffattabaan. 19 Iimixxe mootummaka mafachcha ate'n uwwannon; buttate'n usurtettek duuchchi iimate'n usuremeeke kadaan; buttate'ninna tikkeettek duuchchi iimate'ninna tikemeeke kadaan.»✝ 20 Ookkoneechchi uduma isi Kiristoosite kadeexxa ayye'ninna kuldabaashsha hordofeeyye ifixxa ajaje.

21 Eettene barranaa'n safeexxi Yessuusi Iyyerusaalemi'a me'a'neexxa, ookkonna geedhetenaa'n qeesetike sooreessuwwanaa'ninna Muuseke seerike barachchiissalluwwinaa'n iso'n rakko geltee'naa shiyema'neexxa, sakkaxxe barra'ninna reyotenaa'n ke'a hasisa'neexxa ifixxe hordofeeyye'n kulate'n ke'e. 22 Pheexiroosi kinni Yessuusii'i qofibaa aadhe me'e'eexxi, «Goottaa tinni ate'n haranga geltoqqe'e» hiyya'n isoo xixe. 23 Yessuusi kinni wirri hiyyeexxi Pheexiroosii'i, «Ati koo durriisa bayyati kabaan; manjiinxa malee'e Mageniinxe yaanek yaadi ate'n hedhagopheemmaxxee ani'a gufote kaddeetten» hiyye.

24 Ookkoneechchi uduma Yessuusi ifixxe hordofeeyye'n «Anee hordofo'a hasaak duuchchi ifi huneexxi fanno ifixxa dulke anee hordofowwaal.✝ 25 Hedho ifixxa anjidhdho'a hasaak duuchchi ifinxe hedho gophaan; Ani'a hiyyeexxi ifixxa hedho balleessaak duuchchi kinni hedho ifixxa alfaan.✝ 26 Manji tennee buttaxxa la'o duuchcha alfoole ifixxa lubbo kinni gophoole isi maa la'o alfa? Yookaan lubbo ifixxee maa hira uwwa dande'a? 27 Manjiink Belti ifike annike ulfinninn, isixxe ergananni qoqqobemee dagaan; ookkone wodda mitte mittengee'e huje hujetishshanni hira uwwaan.✝ 28 Dhugaate ha'no'n haaso'annen, Manjiink Belti ifixxe mootummanni dagaa qico'n kaba uurreeke manninaa'n reyo uudabaak mitti mitti hedheen.»