1 Ookkonechchi uduma Yessuusi hobolote'ni ofoo'le'e abbayya fofeexxi ifike qachiba'a dage. 2 Ookko mannikkinna mitte gogeeka manjichcho rarette'ni dunkeexxi Isibaa iyyedange. Yessuusinna konne mannixxa amana uudeexxi, elagopheemmaka manjichcho, «Koo belto; mee co'o! Cubbo atixxi gattowwaali hiyyende'eni» hiyye.

3 Ookkonne wodda Seeriinke barsiisanjuwwi giddii'ni mitte mitti, «Kunni manjichchi Magenoke'ni yowwichchinke afo'o fulchedhe'en» hityyeexxi godobi ifiki giddo hede.

4 Yessuusinna heduma insa'neka ege'neexxi, «Mayye'e itta hexxexxa fuggoxxa yaane godobi ha'noki giddo heddinna? 5 ‹Cubbo atixxi gattowwaal hiyyende'en› hiyyiyyotena'inna ‹Kexxettexxi me'i!› hiyyiyyatenaa'n? Heente shollexxa? 6 Yaane kinni Manjinki belti butta tenne'ni cubbo biratika baallooma afeexxa egendino'a!» Ookkonee naafa manjichcho, «Kexxe'e rare atixxa dulkitettexxi mine atikibaa me'i!» hiyye. 7 Manjichchikinna ke'eexxi mine ifikiba'a me'e. 8 Mannikinna tennee uude wodda saadeexxi Mageni iitta hexxexxa baalle manjoke uuwwexxe'e Mageno galateeffate.

9 Yessuusi ookko'ni ke'eexxi me'aa'na qaraxa qaraxaammaka Maatewoosi hiyyemaka manjichcho qaraxi qaraxemmamaake booncho'ni ofo'lee'naa afeexxi, «Ane'e hordoofi!» hiyye. Maatoosinna ke'eexxi isoo hordofe.

10 Ookkonechchi uduma Yessuusi Maatewoosike mine'ni itate'e ofo'leena'a heddi qaraxaammki manninna cubbaalleeyye manni dageexxi Yessuusinninna hordofeeyye ifixxenni welti itate'e ofoo'le. 11 Feerisito tennee uude wodda isixxa hordofeeyye «Barsiisanji ha'nook mayee qarxooletinna cubbaaleyyeti welti ita'nee?» hite insa'ne qorte.✝

12 Yesuusunna tenne laqeexxi hiyye hiisse haaso'ee qici, «Elagophpheeke mann'ate kaddoole malee'e fayyaake manni'a ci'leessi hasisabaan. 13 Yaane kinni ‹Ani tolchake kadebaak gattowwaalite eeyyannon› hiyyendeexxi borreessendeexxi maa kaddeexxa martineexxi qoritine wo'me; ani dagennechchi cubbaaleyyete malee'e qulliyye ye'onnaa dagebe'non» hiyye.✝

14 Eettene yanna'ni Yohaannisixxi hordofeeyye Yessuusiba'a dageexxi, «No'o Feerisito duuchchii wodda agabo goddo honsaannen. Hordofeeyye atixxi agabo godo hosa'nebaachchi kinni mayeete?» hiteexxi iso'o qorte.

15 Yessuusinna insa'ne'a hiisseexxi hiyyee qic, «Waajubbichchi insanni'ni welti hedhe'naa aadhatixxe barraki jaaluwwi yaada hasissaata? Yaane kinni waajubbichchi insa'nenaa'ni aadhdhemmaxxe yanna daggaan; ookkone wodda insa'nee agabo goddo honsaan.

16 «Fedheek dullatte seemma'ni haarooxxa seemma erbaak hedhebaan. Erbeexxe kaddoole kinni haaroxxi erbe dullatte seemma dartaan; darenishsha iittinna edi qici irra saxxeexxe kaddaan. 17 Iittanni fedheeki dullate qalqallo'ni reefika woyyinetixxa booka uggaaki hedhebaan; uggeexxe kaddole kinni; qalqallottinna dhoottaan; iikki ugginemmaki woyinetixxi booka dunendaani; qalqallotinna la'oo uuttabaaxxe kaddaan. Haarooka woyyinetika bulibulo haaroxxe qalqallo'n uggiyyote hassisaan. Iitta assemoole lamingeechchi elo qico heqqemmeexxi hedhaan» hiyye.

18 Yessuusi tenne'e haaso'a'nenige'n mitti galchalli dageexxi Yessuusixxe lekka'n ibeexxi, «belto anxi ta'a reriteeni. Daggeetteexxi anga atixxa ise'ni hana uggi, isenna fayyitaan» hiyye. 19 Yessuusinna ke'exxi manjichchiinxa duuka me'e; hordofeeyye isixxinna isinni welti me'ite.

20 Tommenna lame wogga duuchcha munde duneenidaa'na'a rakkattaammaxxi manjichcho mitte ookkone wodda Yessuusi udumi'ni dageexxi isixxe seemmaka handaara tuqqe.✝ 21 Tennenna itta assiteechchi, «Seemma isixxa midde anga anixxenni tuqonoole fayyannon» hite'e heddeemmaxxeeten. 22 Yessuusinna wirri hiyye'e isse'e uudeexxi, «Mee co'o anxe belto; amana atixxi atee'e fayyisee'en» hiyye. Manjichchotinna ookkone hiribba'ninn fayyite.

23 Ookkonechchinni udumi'a Yessuusi ookkone galchalke minibaa geyee wodda suusu'le ufuuffa'n hunbaashsha'neeka manna uudeexxi, 24 insa'ne «Duuchchingi kabaa'n ke'we! Belto diiphphee'eni malle'e rerteebaan» hiyye. Yaane kinni insa'ne iso'ni osolle. 25 Manni fulechchi uduma beltichcho hexxeemmaba'a Yessuusi e'yeexxi anga beltotixxa abide wodda iimi'a kexxe. 26 Tenne yaanexxi odo boga ookkone duuchcha'n gelte.

27 Yessuusi ookko'n fuleexxi me'aneege'n lami balla'i «Daawwitike belto, maganneten no'o'a marar!» hina'ni raara'n iso'o hordoffe.

28 Yessuusi mini'a e'ye wodda kunni balla'i manni isibaa'a shiqe. Yessuusinna, «Ani fayyisate'e dande'annoxxa amanadinaa?» hiyye insa'ne'e qore.

Insa'nenna, «Eetti, Gootta» hineexi hiissine haasonne. 29 Ookkonechchinn uduma Yessuusi anga ifixxenni ille insa'nexxa qaqqabeexxi «amanadinemashanni ha'no'a kaddowwaal» hiyye. 30 Ille insa'nexxinna banendeen. Yessuusi kinni, «Tenne yaane fedheeke'ninna kuldinoqqe!» Hiyye jabeesseexxi insa'nee ajaje. 31 Insa'ne kinni ookkone boga duuchcha'n Yessuusi gurra oodessine.

32 Ille bandeemmak iikki manni fuleexxi me'e wodda weli manni kinn fuggichchi hafuur abidee'na'a afo'o duude'eka manjichcho Yessuusiba'a idange. 33 Fuggichchi hafuur fuleechi uduma'a afo'o duudemmak iikki manjichchi haaso'e. Manni kinn, «Iita hexxeexxi yaane Isira'eelike boga'n hara leellite egendebaan» hina'ni saande. 34 Feerisito kinni, «Isi fuggichcha hafuura fulcha'neek fuggichchi hafuurke akeekisanjike summitte» hiyye.✝

35 Yessuusi Ayihudooti bukki hiyyaamaba barsiisa'n Mageniixxe mootummaxxa wengeele kula'n, arda garar gargar hedheeke dhukkubika fayyisa'n qachchuwake'ninna olla'uwwa duuchcha'n marema'nemman.✝ 36 Ardi allalisano afebaake gedhebishsha wixxixhiyye makkiyeena afee wodda insa'ne'a marare.✝ 37 Tennexxee Yessuusi ifixxa hordofeeyye'n hiyyee qici, «Bukki assendaaxxi midha lumoxxen, bukki assaki manni kinni shiixxoken. 38 Tennexxe hujalluwwa Gootti ookkene midha bukka assatike ifike booncho'n ergaasha iso'o kadhatte» hiyye.✝