1 Lebeexxi Yessuusi hiyye haaso'ee qic, «Ha'no'n murendbaasha ayye'ninna murtinoqqe. 2 Welekee'e murtinemashann ha'no'ninna murendaan; iittanni safaritineegechcho'n ha'no'aanna saffarendaan.✝

3 «Atixxe ille'n hedheeka utupha affebexxok atike dayyixxe ille'n hedheeka heenoka huura hitta affattota? 4 Atixxe ille'n utuphi hedhee'na'a atika dayyo ‹Atixxe ille'ni hedheeka heenoka huura atenaa'n hoyyo!› hitta hitato? 5 Ati ifi uggudhdhalli! Edissettexxi atixxe ille'ni hedheeka utupha hoyyedhi Ookkonechchinni udumi'a dayyi atikixxe ille'ni hedheeke heenoka huura hoyyatee'e ca'a assite'e affatton.

6 «Worshi lekkati ha'noo hirbeessabashshanna illeema hige ha'no'o ga'mabaashsha qullitte yaane worshake'e uutinoqqe! Ha'nooxxa fiixa yaanenna booyyeti edo uggitinoqqe!

7 «Soodatte, ha'no'a uwwendaan; halse alfitinaan; hulatanna ganganne ha'no'a banendaan. 8 Soodataakee duuchchi'a uwwendaan; halsaakiirinna alfaan; gangaanake hula banendaan.

9 «Ha'noo giddii'n belti ifiki xalta kadhatoole; kinjo uwwaak anni hedhee? 10 Yookaan qulxu'me kadhatoole bofa isi'a uwwaata? 11 Eeganni ha'no elobaake manna kaddineexxi oose ha'nooxe'e eloxxa uwwa uwwiyyo egendinoole iima hedheek ha'nook Annifa'i iso'o soodataakeeri'a hittata sa'isseexxi eloxxa yaane uwwa gophata? 12 Yoona ha'no'a assino'a eettinaaxa yaane duuchcha ha'nonna welekee'e asse! Muusek seerinna wabeeko barachchiisa'nexxi tennenden.✝

13 «Cu'maxxe hula'n e'ye! Ba'netibaa'a e'yishshaaxi hula ba'laxen orikinna lumoken; ookko'a e'yaak manni heddoken. 14 Hedhotibaa'a geessissaaxxi hula cu'maxxen, orikinna xurreten; tenne hulanna alfaak manni heenoken.✝

15 «Dhariyye wabeekolenaa'n ifi heqqedhdhe! Insa'ne gedhebinxa ka'le oddo'wineexxi, gedhebo lanba'ne ha'nooba'a dangaan; insa'ne kinni giddo ninniffammaxxe yayyeshshaten.✝ 16 Insa'nee egendinaachi gumma insa'neexxenniten. Utetixxe haqqenaa'n woyinetixxi gumma yookaan weleennatena'ninna odiinxi gumma qocendaata? 17 Iittanni elok haqichchi eloxxa gumma gummisa; elobaak haqichchi kinni elobaaxxe gumma gummisa. 18 Elok haqichchi elobaaxa gumma gummisa dande'abaan. Ittanni elobaak haqqichi eloxxa gumma gummisa dande'abaan. 19 Eloxxa gumma gummisabaak haqichchi duuchchi woxemeexxi giirate'n hunemaan.✝ 20 Tennexxee manna insa'nexxe gummanni egendinaan.✝

21 «Iima hedheeke anke annika fedhi assaaka malee, ‹Anke Gootta, anke Gootta› hiyyaak duuchchi mootumma iimixxa aagaakebaan. 22 Murettixxa barra heddi manni ane'e, ‹Anke Gootta, anke Gootta summi atikenn raaga haasonneennabaata? Summi atikinni fuggichcha hafuura fulchineenabaata? Summa atikenn heddo mambe'iinxa yaane hunjeennabaata?› hiyyaan. 23 Ani kinn ookkonee baro insa'ne'e ‹Haranga ha'noo ege'nebe'no; ha'no xaqartiyye manni anenaan bayyatte!› hiyyannon.✝

24 «Konnee hiyyichcho anka laqeexxi ajajemaak duuchchi mine ifika kinjoke'n hana ijaareeke beek manjo fakkaataan. 25 Xeeni ganeen, lola'ikinna lola'e, diidallotinna gande, ookkone minenna dhiibbe kaddo malee mini iikki rasati hana ijaaremeemmaxxe'e ibebaan. 26 Konnee hiyyichcho anka laqeexxi isi'a ajajemabaak kinni mine ifika cirrachchii hana ijaareke gowwa manjichcho fakkaataan. 27 Xeeni ganeen lola'ikinna lola'e, diidallotinna gandeexxi, mine ookkone'e dhiibbe. Minikinna hirbange'n ibe; ibenna hara butute.»

28 Yessuusi tenne'e yaanuwwa haaso'exxi bire wodda ardi barachchiisaa isixxa jaje. 29 Insa'nee mambe'a asseechchi Isi Muuseke seerik barachchiisalluwwi barachchiisaammashshate kaddeebaang baalloomiike manjishsha insa'nee barachchiiseemmaxxeeten.✝