1 Higgeen Yessuusi insa'ne'n mammaassik hiyya'n haaso'ee qic: 2 «Mootumma iimixxi ifike beltixxe aadha'a jila jileeke moyanjo fakkaatta. 3 Moyanji kunninna jilatee ye'emeemmaka manna ye'o'aa ifika erganjuwwa insa'nebaa erge; insa'ne kinni jilatibaa daga ginbe.

4 «Iikki moyanji wele erganjuwwa higgeenna insa'nen, ‹Ookkone ye'emeemmake mannibaa martineexxi kunse sanga'uwwakanna ha'yo horuwwa dulee jila jileennen; duuchiinxi yaane qixxootteemmaxxee jilatixxe itabaa amme› hiyye erge.

5 «Yaane kinni kunni ye'emeemmak manni ye'injo konnee ga'ma'mi hiyyati mitti ifike fichibaa, mittikinna daddala ifikibaa me'e. 6 Weli gateek manninna ookkonee erganjuwwa isika abideexxi assendabaaxxa asse isa'nee shiyye. 7 Eettenee yaanna iikki moyanji aareexxi ifika loliinka manna ergati ookkone erganjuwwa shiyemmaka manna shilchiiseexxi insa'nek qachchinna giirati gubemaashsha asse.

8 «Ookkoneechchi uduma isi erganjuwwa ifika hiyyee qici, ‹Aadhatixxi jila qixxoote'een; yaane kinni iikki ye'emeek manni eettene jila'a hasisabaake manna kade. 9 Yoona oriinxe weldeenna weldeenna'n martineexxi afineeka manjo duuchcha eettene aadhatixxe jilabaa ye'we› 10 Iikki erganjuwwinna ori'aa mareexxi afeenga manna duuchcha, elo yo'oka bukki assee'naa ookkonee jilatike mine'n manni wo'me.

11 «Yaane kinni moyanji iikki ookkonee ye'emeeka manna uudo'a mini'a ye'ee wodda jilatixxa seemma oddo'webaaka mitte manjo ookko afeexxi, 12 Moyanji iikkinna isoo, ‹Koo anke jaaloo!› ‹jilatixxa seemma oddo'witebexxong hitta kaba e'ya dandeettete?› hiyye. Manjichchi iikki kinni hiyyeexxi hiisse haaso'aaka hiyyichcho afe'eemmaba'a.

13 «Iikki moyanjinna erganjuwwa ifika, ‹Anga lekka isixxa usurtineexxi gadho hexxeexxe dukkana'n fulchitineexxi isoo hunne; ookkonna oodhdhishshanna isso qarate kaddaan› hiyye.✝

14 «Ye'emeekiir heddoke, filemeekiir kinni heenoken» hiyyendeemmashshaten.

15 Ookkoneechchi uduma Feerisito me'iteexxi Yessuusii'i haaso'a isingenninni isoo abiddo'a mari'atte. 16 Iinsa'nenna ifixxa hordofeeyye Heeroodisike manninni welti Yessuusibaa ergineexxi hinee qici, «Barachchiisalloo, ati dhugaatike kaddeettexxanna Mageniinka ora dhugaati barachchiissaatteke kaddeettexxa egenneennen. Manjo sodaatati ille uushsho hujabexxo; ayyi'aanna gamisabexo. 17 Amo no'o'n kuli, ate'n maa labba? Moyanjo Qeesaari'a irbo uwwa seerake mo'o yookaan seerakeba'a?» hine.

18 Yessuusi kinni fuggaalessumma insa'neexxa ege'neexxi, «Ha'no ifi uggudhdhaalluwwi maayee anee yaaneti fonxortino'a yortina? 19 Ookkonee iirbotee uwwemaaka maallaqa ane'n leellishshe.» Insa'nenna mitte diinaare iso'n iyyedangeexxi leellinshe 20 Isinna «Konne maallaqi hana hexxeexxi misilenna borreessi ayyike?» hiyye insa'nee qore. 21 Insa'nenna «Qeesaarixxen» hine.

Yessuusinna insa'nen, «Iittate kaddeechchinni Qeesaarika Qeesaari'a, Mageniinka Magenokee uwwe» hiyye.

22 Insa'enna tennee lanqeexxi mambe'a hiyyati isoo waalle me'ine.

23 Eettenneenn barra, «Reyotenaa'n ke'a hexxeba'a» hitaaxxi Seduuqito Yessuusibaa daggeexxi isoo hite qortee qici;✝ 24 «Barrachchiisalloo, Muuse ‹Mitti manji ifixxe arenaa'n i'lebaang reyoole, dayyi isik ookkone reyemmakixxa are aadheexxi isi'a sanne sa'issowwaal› hiyyedheen.✝ 25 No'oba torbaane dayyuwa hedhemman; angafi aadheexxi i'lebaang reyemmaxxee are isixxa iso'n aanaak isik dayyi aadhe. 26 Iittanni aante aantenni langaki sakkakinna torbeessoki qico'n hedheek isee aadha'n reye. 27 Duuchchiniingi uduma iitti manjichchonna rerte. 28 Tennexxee, duuchchingi isee aadheemmaxxee reyotenaa'n ke'atixxa barra ookkone torbaan giddii'n ise ayyixxe are kaddaa?» hine qorre.

29 Yessuusinna insa'nen hiyyeexxi hiisse haaso'ee qici, «Ha'no Woyyichcha Maxaafuwwanna Mageniinxa hunna ege'na gophineemmaxxee dedhake'n ibbina. 30 Reyotenaa'n ke'at uduma manji iimixxe erganashsha hedhaa malee aadha, heeruming hedhaba'a. 31 Reyotenaa'n ke'aatixxa uuddaaxxenni kinni Mageni ha'no'n kuleexxa haassositineenni hexxinebaata? 32 Isinna, ‹Ani Abirihaamike, Yisaaqikenna Ya'iqoobike Magenon› hiyye'een; Tennexxee Mageni hedhaakike Mageno malee'e reyeekike Magenobaan» hiyye.✝

33 Ardikinna tennee laqee wodda barachchiisa isixxa saade.

34 Yessuusinna hiisseeke hiissichchinn Seduuqito sammi asseexxa Feerisito laqqeexxi mitteba bukki hitte. 35 Insa'ne giddii'n mitti Muuseke seerik barachchiisalli Yessuusii'i hega uudo'a hiyye isoo qoree qici,✝ 36 «Barachchiisallo ajaja duuchchanaa'n sa'aak ajaji hoonte?» 37 Yessuusinna hiyyeexxi iso'n hiise haaso'ee qici, « ‹Gootta atika Mageno wo'ma qalbenni, wo'ma lubbonninna wo'ma heduminni eeyi›✝ 38 Taakakinna duuchchingenaa'n sa'aak ajaji konneten. 39 Iikki langakinna konnende labaaken; kunninna, ‹Wele manna ifike umishsha eeyi› hiyyaaken.✝ 40 Seer duuchchinna wabeekotixxi barachchiisa duuchchi konne lame ajajuwwi hana ijaarende'een.»

41 Feerisito mitteba bukki hitee'naa, Yessuusi insa'nee hiyya'n qoree qici, 42 «Kiristoosixxee ha'no maa hitina'ne? Isi ayyike belto?»

Insa'nenna, «Daawwitike belton,» hineexxi hiissine haasonne.

43 Yessuusinna insa'ne, «Yoonata, Daawwiti Woyyichchi Hafuurinn akeekemeexxi haaso'ee wodda hittata isoo ‹Goottaa›? Hiyye ye'a?

44 « ‹Gootti, anka Gootta:

«Atika naapha atixxi lekka hunda

Sa'issanno qico'n

Anke midda'n ofo'li.» ›✝

45 Tennexxee Daawwiti ifinge uminninn Kiristoosii'i, ‹Goottaa› hiyyeexxi ye'eechchinni, hittata Kiristoosi isike belto kada dande'a?» 46 Mitte hiyyichchonna midde Yessuusi'n hiisse haaso'a dande'eek mitti manjinna hedhemmaba'a. Eettene barranaa'ninna saffeexxi isoo qoro'a qophpi hiyye ke'eek ayyinna hedhemmaba'a.