1 Eettenne barra Yessuusi minii'ni fuleexxi abbaayyat bira ofo'le. 2 Heddi manni iso'o qoqobemmaxxe isi hobolote'n e'yeexxi ofo'le.✝ 3 Ookkonechchinni udumi'a Yessuusi heddo yaanuwwa mammaasik ardake'ni hiyya'n kullee qici, «Laqqe! Wiisalli mitti facaalsa fule. 4 Facaasa wodda mitte mitte gumma orni qarqara ibbe, ci'atinna isee dagge itte. 5 Wele gummanna careti hana heenoke buttinna'ni ibbe; birasa'eek buttini hedha gophpheemmashshanni hiribbange'ni fulde. 6 Kaddomalee arishsho fuldee wodda qoorte; hiddakanna afagophpheemmaxxe'e bagge. 7 Wele gummanna utettixxi oddo'ni ibbe; utettiki haqichchinna nophpeexxi isee suruure. 8 Wele gummanna eloke buttina'n ibbe latteexxi heddo gumma gummisse; mitte dhibba, mitte jaane tomme, mittetinna sase tomme gumma gummisse. 9 Mansha laqqaaxxa afeek laqowwaal!» hiyye.

10 Ookkonechchi uduma hordofeeyye Yessuusixxi isibaa dageexxi isoo, «Ardake'ni mammaassik haasotta'ettechchi maayeete?» hite isoo qorte.

11 Yessuusinna insa'ne'n hiyye hisse haaso'ee qici, «Ha'no'a iimixxe mootummaxxi buqo yaanexxi ege'na uwwende'en. Insa'ne'a kinn uwwendebaan. 12 Uwwendeeke uwwendaan; isi'anna caala birasaxxaan; afebaakenaa'n kinni iikki afeengichchi midde adhdhemaan.✝ 13 Anfa'ninni anifa'nebaashsha, lanqa'ninni lanqa'nebaashsha yookaan qalbeffanta'nebaashsha kandeemmaxxe insa'ne'n mammaassik haaso'anechchi.»

14 Wabeek Issayaasi'n borreessemmeek konnechchi butta hedheek raagi insa'ne'n muuxemeedheen:

« ‹Laqiyyo laqqinaan yaane kinni qalbeeffatinabaan;

afiyyo affinaan yaane kinni qallitinaba'a.

15 Konne ardixxi qalbe dilloottemmaxxe,

Mansha insa'nexxi laqqanebaan;

anfabaashshanna ille insa'neexxinna himmine'neen;

Tinni iittate kada gophpheel ille ifixxenni anfeexxi

mansha ifixxenninna lanqeexxi

qalbe ifixxenninna qalbeeffanteexxi

Aniba'a illeema hingee'na'a silaan insa'ne fayyise'enana.›✝

16 Ha'noxxi kinn ille ha'noxxi affaammaxxe mansha ha'noxxinna laqqaammaxxee eebbisendeeken. 17 Dhugaate ha'no'n haaso'annen, heddo wabbekonna heddo qulliyye ha'no uudina'neexxa uudatee yorte'emman, yaane kinni uundeba'a; ha'no laqqina'neexxanna laqatee yorteemman; yaane kinni lanqeba'a.✝

18 «Ha'no yoonna wiisalli manjichchi mammaakemaka mammaassa laqqe: 19 Orni qarqara ibbeemmaxxi sanne, Mageniinxe mootummaka hiyyichcho laqqeexxi qalbeeffatabaake mannan; iikki fuggichchinna dageexxi qalbe isixxe'n rokemeemmaka hiyyichcho Seexani dageexxi adhaan. 20 Carete'n rokemeek gummichchinna, hiyyichcho laqeexxi hirbange'n gammashshoti adhdhaake manjon. 21 Yaane kinni isi hidda olitta gopheemmaxxe lumoo qico turaba'a; tennexxe ookkone hiyyichchixxe buuto'a rakko yookaani shorrichchi iso'o geeya wodda, iikki woddi ibaan. 22 Utetixxe oddo'n rokendeexxi gumma iitti hiyyichcho Mageniiinka laqaake manjon; kaddo malee tenne buttaki yaadinna durummatike eeyyumma qalbe isixxi giddo e'yiteexxi hiyyichcho ookkonee suruurtammaxxe gummabelonna gataan. 23 Eloke buttina'ni rokendeexxi gumma kinni Mageniika hiyyichcho laqeexxi qalbeeffataake manjon; isinna gumma gummisaan; mitti dhibba mitti jaane tomme; mitti sase tomme gumma gummisaan» hiyye.

24 Lebeexxi Yessuusinna wele mammaassa hiyya'ni insa'ne'n haaso'ee qici, «Mootumma iimixxi ifike fichcha'n eloxxa gumma rolkeeke manjichcho labbaan. 25 Yaane kinn manji duuchchi diiphee'na'a naaphi isike dageexxi rokkendeexxe dinne giddo jigja roke me'e. 26 Dinne fuldeexxi gummissammaxxe yanna'ni jigijikinna leelle.

27 «Tennexxe ookkone fichchike annik erganjuwwinna isiba'a dageexxi, ‹Koo aaddi, atike fichcha'n rokkeettaxxi eloxxe gummabaa rokkeettak? Jigijitaa habaa'n dage?› hine isoo qorre.

28 «Isinna, ‹Tenne iitta asseek naaphakeni› hiyye hiisse insa'ne'ni haaso'e.

«Erganjuwwi isikinna, ‹Eega iittate kaddeexxenni marrennexxi jigija gonshonnaa hassaate?› hine isoo qorre.

29 «Isi kinni hiyyeexxi insa'ne'ni hiisse haaso'ee qici, ‹Waawo'o jigija goshshinaa wodda dinnetanna welti goshshinaammaxxee hedhuun. 30 Haamatixxe yanna qico'ni dinnetinna jigijikinna mittemba nophphuun, waalle! Haa'matixxa yanna haamammaka manna: Edisineexxi jigija goshshine giirate'n gubato'a ladde laddenni usurre; dinne kinni bukki assitineexxi gootarake'n aasse hiyyannon› insa'ne'a hiyye.»

31 Yessuusinna wele mammaassa insa'ne'ni hiyya'ni mammaake qici, «Mootumma iimixxi mitti manjichchi adhdheexxi ifike fichchi giddo rokeexxe shaannixxe gummaxxe sanne* fakkaattaan. 32 Tinni senaaficetixxi sanne wele sanne duuchchanaa'n shiixxoxxe kaddoolenna nophphitaa wodda wele heqquwwa saxxaan; ci'anna daggeexxi isexxe dame'n mine ijadhdhiteexxi hexxaan» hiyye.

33 Yessuusinna lebeexxi wele mamaassa insa'ne'n hiyyehaaso'ee qici, «Mootumma iimixxi manjichcho mitte bukooto'a sase saffarsanjo bulle'n karissiteek lebele fakkataan. Gamamikinna eettene buko fuldaashsha asse» hiyye.

34 Yessuusi tenne yaane duuchcha mammaasik ardake'n kuleen; mammaasi belo mitteechchonna insa'ne'n haaso'ebaan. 35 Tinninna kaddeechchi wabeekichchoke'n haaso'endemmaxxi konnechchinni butti'a hexxeexxi muuxendaashshaten.

«Haaso'anno wodda mammaassik haaso'annon;

dada dadendeexxe yannanaa'n buqo hexxeexxa yaane haaso'annon» hiyye.✝

36 Ookkonechchi uduma Yessuusi arda me'aashsha asseexxi mini'a e'ye. Hordofeeyye isixxinna isibaa shiqqeexxi, «Ookkone fichchi giddo hedhemmake jigijiinka mammaassa no'o'a tiki» isoo hite.

37 Yessuusinna insa'ne'n hiyye haaso'ee qic: «Iikki eloxxa sanne facaaseek Manjiinke Belton; 38 Iikki fichinna tenne buttan; iitti eloxxi sannenna Mageniinxe mootummaxxe oosen. Iikki Jigijinna Seexaniinxe oosen. 39 Jigija facaaseek naaphinna Seexanaken. Iitti haamatixxi yannanna tenne buttaxxe mudan; iikki haamemmakiirinna iimixxe ergannan.

40 «Jigiji goshemmeexxi giirate'ni gubemammashshanni buttatixxe muda wodda ittanni kaddaan. 41 Manjinki Belti erganna ifixxa ergaan; insenna cubbotee buutote kadeekaranna fuggoxxa assaakaara duuchcha bukki assite isixxe mootummanaa'n fulchitaan. 42 Itoonixxe giira giddi'anna insa'ne darbitaan; ookkonna oodhishshanna isso qadhdha kaddaan. 43 Eettene yanna qulliyye ifike annixxe mootumma'n arishshotishsha xabbaan. Mansha laqqaaxxa afee'ek isi laqowwaal!»

44 «Mootumma iimixxi fichchi giddo sho'ondeexxe karra fakkaattaan. Manjikinna ise alfee wodda hiise sho'edhe; gammashshotixxe birasa'nenaa'ninna kexxeexxa me'eexxi afeechcho duuchcha gurgudhdheexxi fichcha ookkone'e hidhdhe.

45 «Higgeen Mootumma iimixxi fiixxa kino halsaake dadalanjo fakkaattaan. 46 Kunni daddalanjinna hira lumo qico fiixeka kinjo alfee wodda mareexxi afeechcho duuchcha gurgudhdheexxi ookkonee fiixa kinjo hidhdhaan.»

47 «Iitanni Mootumma iimixxi abbaayya giddi'a darbendeexxi bifa bifaxxa qulxu'me duuchcha bukkasiteexxe marabe fakkattaan. 48 Qulxu'me ise'ni wo'mitee wodda qulxu'me abidammak manni ise'e harkiseexxi abbaayyatike kasa'ni fulche; ookkonechchi uduma ofo'leexxi elola qulxu'me fila'ni qirco giddo ugge; elobaakara kinni gadhi'a hune. 49 Buttatixxe muda'ninna kaddaa qici iittanden. Iimixxi ergannanna daggeexxi cubbaaleyye qulliyyetenaa'n gargar fotaan. 50 Cubbaaleyyetanna giirate'n hundee'naa ookko oodhishshatenna isso qadhdhate kaddaan.»

51 Yessuusi, «Tennee yaane duuchcha qalbeeffatineen?» hiyyeexxi insa'nee qore.

Insa'nenna, «Eeti» hine hiissine iso'ni haasonne.

52 Yessuusinna insa'ne'n, «Yoona mootumma iimixxike hordoffallo kadeek huuni Muusek seerik barsiisanji masseccatike mininaaa'n dullachchakanna haaroka miya ifika fulchammake karrati anna fakkaataan» hiyye.

53 Yessusinna konne mammaassuwwa biree wodda ookko'n ke'e me'e. 54 Ifike boga, Naazirtike qachchiba dageexxi insa'ne'eke magenooffachchotike mine'ni arda barsiisa'emman; ardikinna saadinot, «Kunni manji konne beekkumanna tenne mambe'a assiyyotixxa hunna habaa'ni adhdhe?» hiyye. 55 «Isi kunni ookkone haqqe xabbammake manjichchike beltobaata? Ama isixxita Maaramindebaa? Isik dayyuwwinna Ya'iqoobi, Yooseefi, Simi'ooninna Yihudaaratebaata? 56 Dayyuwwa isixxi duuchcharanna no'onninni welti hexxeexerabaata? Egedhita'a kunni manjichchi konne beekkuma duuchcha habaa'n alfe?» hine. 57 Tenneena'n kexxeexxa iso'n manni macciyya ginbe.

Yaane kinni Yessuusi insa'ne «Wabeek ulfaatabaabi ifike boga'ninna ifike mine'ne callan» hiyye.✝

58 Insa'neexxe amanagonphenaa'n kexxeexxa Yessuusi ookko heddo mambe'a assebaan.