1 Jaane barra uduma Yessuusi Pheexirosii'i, Ya'iqoobiinna Ya'iqoobika dayyo Yohaannisii'i qofitti insa'ne calla aadhdheexxi mitte qeeraxxe kooba hana qabate.✝ 2 Ookkonna insa'ne edo jijjiiremme'naa isik albinna arishshotishsha xabe; isixxi seemmanna ifiinsha golalooxxe kadde. 3 Ookkone hirba'ninni Muusenna Eelyaasi Yessuusinni haasoona'n insa'ne'n leelline. 4 Pheexiroosinna Yessuusii'i, «Goottaa kaba hedha no'aa eloxxen. Eettaattole sase fooqa mitte ati'a mitte Muuse'a mitte Eelyaasi'a ijaaro» hiyye.

5 Pheexiroosi tennee haaso'ande'n hedhee'naanni ca'a hiyyeek duummanchi insa'nee buqe; duummanchi giddii'ninna, «Ani iso'n gammadaannek, eeyyannek anki belti konneten; isi hiyyaaxxa laqqe» hiyyaak haaso'i laqeme.✝ 6 Hordofeeyyetinna konnee haaso'a laqqee wodda lumo qico sodaatteexxi albik butta gonbissend. 7 Yessuusi kinni insa'nebaa shiqe angati insa'nee qaqqabeexxi insa'nee, «Ke'we iimi'a; mee sodaatte» hiyye.

8 Insa'nenna qokki hineexxi uunde wodda Yessuusii malee'e wele ayyeenna anfeba'a.

9 Koobatenaa'n dirina'na'neenge'n Yessuusi «Manjiink Belti reyotenaa'n ke'aa qico'n uuddineexxa tennee yaane ayye'ninna kuldinoqqe'e» hiyyeexxi ifixxa hordofeeyye ajaje.

10 Hordofeeyye Yessuusixxinna Yessuusii'i, «Muusseke seerik bararachchiisalluwwi edise daga hasisaak Eelyaasiten hiyya'neek mayeete?» hita'n qorte.✝ 11 Yessuusinna hiisseexxi, «Dhugaaten Eelyaasi edise dageexxi guuchchiinxa yaane toggi assaan. 12 Yaane kinni ani ha'noo'n hiyyaannen, Eelyaasi ediseenni dageemman; kaddo malee'e manni isoo ege'neemmabaan; iso'ninna eeneeshsha asse'ne. Iittani Manjiink Belti insa'nexxe anga'n rakko adhdhaan»✝ 13 Ookkonne wodda hordofeeyye Yessuusi insa'ne'n haaso'eechchi xammaqallo Yohaannisixxeete kaddeexxa egende.

14 Insa'nenna ardibaa ille iima hingeeshshanni manjichchi mitti Yessuusibaa dagge gulufateexxi hiyyee qici, 15 «Goottaa belto ankee maraari! Gaggaddotike dhukkubinni lumoshsha abara uda'neen; heddo yanna giirate'ninna wodi'i giddo ibaan. 16 Hordofeeyye atixxibaanna isoo aadhdhe dageennen, insa'ne kinni isoo fayyisatee dandeennebaan.»

17 Yessuusinna hiiseexxi, «Ha'no amandinabaaxxinna dabaaleyye ila haani qico'n ha'noonni welti hedhannota? Haani qico'n ha'noo ba'edhannota? Belto kabaa anibaa iyyedagge» hiyye. 18 Yessuusinna ookkone fuggichchaa hafuura xixe; fuggichchi hafuurinna beltokenaa'n fule; beltikinna eettene yanna'ninni fayye.

19 Ookkoneechchi uduma hordofeeyye qofitinni Yessuusibaa daggeexxi, «Mayeete no'o konnee fuggichcha hafuura fulcha dande'a gonpheennechchi?» hita'n isoo qorte. 20 Yessuusinna insa'ne'n hiyyee qici, «Ha'nooxxe amanaxxe xe'yani; Dhugaate haaso'aannen shaaniinxe gumma qicixxa amana affineexxe kaddoole, ‹Tennee kooba kabaa'n kexxe ookko'a me'i› hitinoole me'itaan; dandeettinabaaxxi yaanenna hexxebaan.✝ 21 Iitta hedheek fuggichchi hafuuri agabo goddotinna soodachchoti malee'e fulabaan.»

22 Hordofeeyye Geliila bukki hiteemma wodda Yessuusi insa'ne'n hiyyee qici, «Manjiink Belti manniinxe anga'n sa'issemee uwwemaan. 23 Insa'nenna isoo shinnaan; isinna sakkaxxa barra reyotenaa'n ke'aan.» Hordofeeyyetinna lumo qico yaadde.

24 Yessuusi ifixxe hordofeeyyenni welti Qifirnahoomi geyee wodda galmiinxa irbo bukkassaammak manni Pheexiroosibaa shikki hiyyeexxi, «Barachchiisalli ha'nook galmiinxa irbo uwwa gophaata?» hiyye isoo qore.✝ 25 Pheexiroosinna «Eeti, uwwaan» hiyye hiise haaso'e.

Pheexiroosi mini'a e'yee wodda Yessuusi ediseexxi, «Koo Simi'ooni ate'n maa labbaa?» isinna hiisseexxi «Buttik moyanjuwwi qaraxakanna irbo aadhaak ayyenaa'nite? Ifixxe oosenaa'nite moo yookaan wele manninaa'nite» hiyye qore. 26 Pheexiroosinna «Wele bogike mannanaa'niten» hiyye hiisse haaso'e.

Yessuusinna «Yoona insa'ne oose irbo uatabaan hiyyatebaataa?» 27 «Yaane kinni insa'ne'a gufote kandabe'noshsha abbaayyatiba martettexxi atika qulxu'me abishshotika fixa wode'i giddi'a darb! Edisse abiddatoxxa qulxu'me aaxxe iseka afo'o maaqatto wodda maallaqa* affatton. Isoonna aaxxettexxi no'o lamiingike summinni irbotee uwwi.»