1 Yessuusinna tennee yaane haaso'eexxi bireechchi uduma Geliilaa'n ke'eexxi Yordanoosi wido hedheeke Yihudake bogibaa me'e. 2 Hedi ardinna isoo hordofe; isinna ookko ela gopheemmaka manna fayyise.

3 Feerisitotinna Yessuusii'i hega uuddo'a isibaa shiqqeexxi, «Mitti manji heene buutonninna ifixxa are tikatee seeri isi'aa uwwaa?» hite isoo qorte.

4 Yessuusinna hiissee hiyye haaso'ee qici, «Sirende'n Magen insa'nee labbakenna meyyaxxe asse dadeexxa haassossa gophine'eeta?✝ 5 Yessuusinna hiyyee qici, Tennexxee manji ifika annanna ifixxa ama waalaan; ifixxe areninna makemaan; lamiing mitte maala kandaan.✝ 6 Tennexxee insa'ne mitte biso malee'e lamekebaan. Yoona Mageni genci asse'e mitteke asseeka meenni manji gargar hiissowwaal.»

7 Insa'nenna, «Mayeeta, Muuse aro'i ifixxa are tikatixxa dhugaa kulatixxa borro uwweexxi isee waalowwaal? Hiyyeexxi ajajeek» hina'n isoo qorre.✝ 8 Yessuusinna insa'ne'n hiisse hiyye haaso'ee qici, «Muuse ha'nooke godobika jabeenna uudati ha'nooxxa are tikkinnaashsha eetti ha'no'aa uwwee malee'e tinni sirete'n iittatemmabaan. 9 Ani kinni ha'noo hiyyaanexxi yabaabulletixxe buuttoxxeete kaddoole malee'e ifixxa are waaleexxi wele melaalle adhaak duuchchi yabaabule'eeken.»✝

10 Hordofeeyyetinna iso'n, «Aro'iinxinna aretixxi yaane iittate kaddexxinni aadha gopha woyya» hite.

11 Yessuusi kinni hiisse insa'ne'n hiyye haaso'ee qici, «Tinni yaane isi'a uwwendeekeete kaddoole malee'e tinni yaane duuchchiingee kaddabaan. 12 Mitti mitti middisake kadeexxi ilemeekiir hedhe; wele manjiinxe anga'ninna middisake kadeekiir hedhe; iittanni iimixxe mootuma'a hiyyeexxi ifi middisake asseekkiirinna hedhe. Tennee yaane adhdha dande'aak adhdhowwaal.»

13 Eettenne yanna ifixxa anga annooleti hana uggeexxi insa'ne'a soodato'a annoole Yessuusibaa iyyedange. Yaane kinni hordofeeyye annoole iyyedagemmaka manna xixxe.

14 Yessuusinna, «Iimixxi mootumma tennee annooleshsha hedheekeeri'aate kaddeemmaxxee annoole anibaa dagguunni, mee hoyyee!» hiyye. 15 Isinna ifixxa anga annoolet hana uggeexxi insa'nee eebbiseechchi uduma, ookko'n ke'e me'e.

16 Mitte barra manjichchi mitti Yessuusibaa dageexxi, «Barachchiisalloo, duuchchi woddixxa hedho alfonnaa heenee eloxxa yaane assanno?» hiyye isoo qore. 17 Yessuusinna, «Eloxxe yaanexxee mayee anee qortatto? Elok mitte Mageno callanni; hedhotibaa e'ya hassottole kinni ajajuwwa heqedhi» hiyye hiise haaso'e.

18 Manjichchikinna «Hoone ajajuwwa?» hiyye isoo qore.

Yessuusinna hiyye hiise haaso'ee qici, «Shiltoxxe'e, yababuldoxxe'e, moortoxxe'e, dharik dhugaa kuldoxxe'e.✝ 19 Annakanna ama atixxa ulfeessi; manjo atke umishsha eeyyi.» ✝

20 Iikki dargaggeessi dureessichchinna «Konneeraqqa heqqedhdheenneni; weli ani'a xe'yaachchi maachcho?» hiyye.

21 Yessuusinna «Wo'make kaddotaa hassaattole martettexxi affeettechcho duuchcha gurgurtette'e hiyyeeyyetee uwwi, iimate'ninna karra affatton. Ookkoneechchi uduma daggettexxi anee hordofi» hiyye hiisse haaso'e.

22 Kunni dureessichchi dargaggeessinna lumoxxa karra afeemmaxxee'e konne hiyyichcho laqee wodda yaada'n me'e.

23 Ookkoneechchi uduma Yessuusi ifixxe hordofeeyye'n hiyyee qici, «Dhugaate ha'no'n haaso'annen, dureessi manji'a iimixxa mootumma aaga lumoo qico ha'urtotten. 24 Higgeenna ha'noo'n haaso'annen, dureessi Mageniinxe mootumma'n e'yeexxi mannii'n gaali miiltike qo'anaa'n e'ya isi'a shollexxan» hiyye.

25 Hordofeeyyetinna konnee haaso'a laqqeexxi hara mambe'a hiyyat, «Iittate kaddooletaa ayyete anjirma dande'a?» hite qorte.

26 Yessuusinna insa'nee uuda'n, «Tinni yaane manjo dandeessissaaxxeba'a. Magenoke'n kinni duuchchiinxi yaane dande'endaan» hiyye.

27 Eettene yanna Pheexiroosinna, «No'o duuchchiinxa yaane waallennexxi atee hordonfe'eennen alfinannochchita maachcho?» hiyye hiisse qore.

28 Yessuusinna insa'nen hiyyee qici, «Dhugaate hiyyaannen, ha'no anee hordoffineek, Manjiink Belti ifixxe ulfinniinxe moote'n ofo'laake haarooke sa'ne'n tommenna lame moote'n ofoldineexxi tommenna lame Isira'eelike gosati minuwwa'n murtinaan.✝ 29 Anke summi'a hiyyeexxi minuwwaa yookaan ifika dayyuwwaa yookaan dayyuwwaa ifixxa yookaan annaa yookaan amaa yookaan oosee yookaan fichchaa waalaak duuchchi dhibba dachcha'a adhdhaan; duuchchii woddixxa hedhonna dhaalaan. 30 Yaane kinni ediseemmak heddi manni udu'maake kadaan; udu'meemmak heddi manni kinni edike kadaan.»✝