1 Higgeenni Yessuusi hiyyee qici, «Ani tenne duuchcha ha’no’n kulennechchi ha’noo amana ha’nooxxa waaldinabaashsha hiyyeeten. 2 Insa’ne Muuseka seera barantammake minenaa’n ha’noo fulchinaan; ha’no shiyaak manni duuchchi isi Magenokee ergatema’neeke labbaaxxi yanna daggaan. 3 Insa’ne tenne duuchchanna ha’no’ni assinaachchi Aabii yookaan anee ege’na gonphemmaxxeeten. 4 Ani tennee ha’no’n edise kulenneechchi yanna iitti geltaa wodda ha’no qaabbatino’a hiyyeeten. Aninna ha’nonni welit hedhennaxxee tennee edisennexxi ha’no’ni kulebe’no.

5 «Ta’a yoona anee ergemmake Annibaa me’aannen: kaddo malee ha’no giddii’ni, ‹Me’itaatebi habaate?› hiyyeexxi anee qoraak manji hedhebaan. 6 Yaane kinni ani tennee haaso’ennaxxee qalbe ha’nooxxe’n yaaddo wo’mite’een. 7 Yaane kinni Ani dhugaate ha’no’a hiyyaannen: me’a Anxi ha’no’a eloxxen. Ani me’a gophonnole dayyeessalli ha’nobaa dagabaan; Ani me’onnole kinni isoo ha’nobaa ergannon: 8 Isi dagaa wodda butta duuchcha cubbotixxee, qullumatixxeenna murtetixxee kokeessaan. 9 Cubbotixxee hiyyaa manni Ane’ni amana gophammaxxeeten: 10 Qullumatixxe’e ani Aabibaa me’annaxxeenna ha’no ta’anni edi’a Anee uuda gophphinammaxxeeten: 11 murtetixxeenna, kaba butta duuchchike galchallo’ni murte murendemmaxxeeten.

12 «Ani ha’noo’ni kulaannexxi heddo yaane hexxemman: ta’a kinn ha’noo’n ha’ura ha’urtaan. 13 Yaane kinni dhugaatik Hafuur dagaa wodda dhugaatibaa ha’noo akeekaan. Isi umo ifikenaa’ni haaso’abaan: isi laqemmanxe calla haaso’aan: iittanni isi edi’a kaddaaxxa ha’noo’ni kulaan. 14 Isi anxe kaddeexxa yaane anenaa’ni aadheexxi ha’noo’ni kulaammaxxee anee ulfeessaan. 15 Aabike kedeechchi duuchchi anken; yoona ‹Iikki Hafuur Anke kadeechonaa’ni aadheexxi ha’noo’n kulaan› hiyyeenneehchi tennexxeeten.»

16 Lebeexxi Yessuusi insa’nee hiyyee qici, «Shiixxoxxe yanna uduma anee uudinabaan: kaddo malee shiixxoxxe yanna uduma higgeenni anee uuddinaan.»

17 Hordofeeyye isixxi giddii’ni mitte mitte weli’aanni weli, «Shiixxoxxe yanna uduma anee uudinabaan; kaddo malee ‹Shiixxoxxe yanna uduma higgeenni anee uudinaan› iittanni ‹Ani Aabibaa me’annaxxee› hiyya isixxi maa hiyyote?» hite. 18 Insa’nenna, «Shiixoxxa yanna hiyya isixxi maa hiyyote? Isi hiyya’neexxi yaane no’o’ni aaggebaan» hina’ni weli’aanni weli hiisine hiisinee qorra’nemman.

19 Yessuusinna isoo qorro’a hanseexxa ege’neexxi insa’nee hiyyee qici, «Ha’no weli’anni weli qortina’neechchi ‹Shiixxoxxe yanna uduma anee uuddinabaan; kaddo malee shiixxoxxe yanna uduma higgeenni anee uuddinaan› hiyyennexxeete? 20 Ani dhugaate ha’noo’n hiyyaannen ha’no yaadinaani; ooxxinaan; kaba butta duuchchik manni kinni gammadaan. Kaddo malee yaaddo ha’nooxxi gammashshotibaa jijjiirendaan. 21 Meyyaxxi ildaa wodda ciniintotixxi isexxi barra gelteemmaxxee yaaddaani; yaane kinn ise ildeechchi uduma anno kaba butti’a daggeemmaxxee, ise gammashshotixxe bira sa’nenaa’n kexxeexxa ciniintoti woddixxa rakko deetaan. 22 Ha’noo’aanna iittanni ta’i yaaddotixxe yannan; kaddo malee Ani higgeenni ha’noo uuddaannaxxee gammaddinaan; gammashsho ha’noxxanna ha’nonaa’ni aadhdhaaki hedhebaan. 23 Eettene barra ha’no anenaa’ni mittechchonna kadhattinabaan. Ani dhugaate ha’no’a hiyyaannen: Aabi anke summinni kadhatinaaxxa duuchcha ha’no’a uwwaan. 24 Ta’i qico’ni ha’no anke summinni mittechchonna kadhattinebaan: gammashsho ha’noxxi wo’mate kaddaashsha kadhatte! Adhdhitinaan.

25 «Ani tenne ha’noo’ni mammaassiki haaso’ennen: ta’inni edi’a mammaassik haaso’abe’noxxe yanna daggaan; yaane kinn Aabixxee duuchchiinxa yaane farri asseennexxi ha’no’n kulannon. 26 Eettene barra ha’no anke summinni kadhattinaan; yaane kinn Ani ha’nooxxa bakka Aabii’i kadhatannoni hiyyatebaan. 27 Ha’noo anee eetine’eemmaxxeenna Ani Mageniinbaa’n dagennexxa ha’no amandine’eemmaxxee Aabi umo ifingenninni ha’noo eeyyaan. 28 Ani Aabibaa’ni fuleennexxi kaba butta duuchchibaa dageennen; ta’a kinni Ani tennee butta duuchcha waaleennexxi Aabibaa me’annon.»

29 Ookkoneechchi uduma hordofeeyyetinna isoo hitee qici, «Ta’a reefi ati farri assite mammassi belo haasottette. 30 Ta’a no’o ati duuchchiinxa yaane egendetexxanna ayyinna atee qora hasissabaaxxa egeneennen. Tennexxee no’o ati Mageniinbaa’ni daggetexxa amanneennen» hine. 31 Yessuusinna insa’ne’n hiisseexxi hiyyee qici, «Ta’a ha’noo amandineen hiyyatee?» 32 Yoona mitti mitti ha’nongi ifi ifinge minibaa xexxeeredinaaxe yanna daggaan; iitti yannanna ta’aten. Ha’no Anee qofitti waaldinaan; kaddo malee Anni anki aninni welti hedhemmaxxee ani qofi hedhebe’non. 33 «Aninna tennee ha’no’n haaso’eennek ha’no ane’ni hexxineexxi nage’a alfitinaashsha hiyyeeten. Ha’no kaba butta duuchcha’n hexxina’nee qico’ni rakkote affine’een. Yaane kinn ha’no mee co’o! Ani tennee butta duuchcha injifateennen.»