1 Maaramikenna dayyo isexxe Maartake olla'a'ni Biitaaniya hedhammak Alaazaari ela gopheemman. 2 Tinn dayyi iseki Alaazaari ela gopheexxi Maarami, Goottake'ni shitto fiffixxe'e lekka isixxa umiinke ordichchi isekinni filteemmaxxemman. 3 Tennexxe tinni dayyuwwanna, «No'oke Goottaa! Ati eetattaki manjichchi ela gophedheen» hineexxi manjo iso'ni ergine. 4 Yessuusinna tennee laqe wodda, «Tinni dhibo Mageniinki Belti ise darree'ni ulufataashsha Mageniinke ulfinni'ate malee isoo reyotee geesissaaxebaan» hiyye. 5 Yessuusinna Maartaa, dayyo isexxanna Alaazaarii'i eeyya'nemmaa. 6 Kaddo malee isi Alaazarixxa ela gonphe laqee wodda ookko hedhemmamba lame barra ture.

7 Ookkonneechchi uduma isi hordofeeyye ifixxa, «Ke'we Yihuda'aa hinge me'ino» hiyye. 8 Insa'nenna isoo, «Barachchiisalloo shiixxoxxe yanna edi ga'ma Ayihudi atee kinjiki cancaqo'a hansa'nemman; higgeenni ati ookko'a martattotaa?» hine. 9 Yessuusinna insa'ne'a hiyye hiissee qici, «Barrate'ni hexxeexxi saate tommenna lametebaa? Barra maremaak butta duuchika ifa uudammaxxee isi guggufatabaan. 10 Yaane kinni hashsha maremaaki ifi hedha gopheemmaxxee guggufataan.»

11 Isinna tenne insa'ne'ni haaso'echchi uduma, «Jaali no'oki Alaazaari diiphe'een; yaane kinn Ani diiphokenaa'ni isoo ke'issonnaa maraannen» hiyye. 12 Hordofeeyye isixxinna, «No'oke Gootta! Isi diiphe'eexxe kaddoole fooraan» hine. 13 Yessuusinna tennee insa'ne'aa haaso'echchi Alaazarixxe reyoxxeetemman; hordofeeyye isixxi kinn diiphiinxee haaso'echcho insa'ne'n labbeemman. 14 Tennexxe isi farri asse insa'nen hiyyee qici, «Alaazaari reyedheen; 15 ha'noo amandinaashsha Ani ookkoo hedha gopheennaxxee ha'nooxxee gammadaannen. Yaane kinni ta'a ke'we isibaa me'ino.» 16 Ookkonneeechchi uduma Didimoosi hiyyemaak Toomaasi wele gatteexxe hordofeeyye'n, «Ke'we no'onna marree isinni welti renno» hiyye.

17 Yessuusi ookkoo mare geye wodda; Alaazari mogemeexxenni shoole barra geyeemman. 18 Biitaaniya Iyyerusaaleminaa'n sase kiilometire qico bayyattaan. 19 Ayihudakenaa'n heddi manni Maartanna Maaramii'i insa'neke dayyixxe reyoxxee dayyeeso'aa dageemman. 20 Maartanna Yessuusixxa daga laqqeexxi isoo qophexxo'a fulde; Maarami kinni minenni gatteemman. 21 Maartanna Yessuusii hittee qici, «Anke Gootta, silaa ati kaba hexxettele dayyi anki reyammabaan. 22 Yaane kinn ta'atenna kaddoole ati kadhattaattoxxa duuchcha Mageni ati'a uwwaaxxa Ani ege'neennen.» 23 Yessuusinna ise'n, «Dayyi atik ke'aan» hiyye hiise haaso'e. 24 Maartanna isi'a hiissiteexxi, «Udumixxa barra ke'atixxe yanna'n isi reyotenaa'ni ke'aaxxa ege'nenneni» hite. 25 Yessuusinna ise'n hiyyee qici, «Ke'atinna hedho anten; Ane'ni amanaak reyoolenna midde isi hedhoti hedhaan; 26 ane'ni hedhaaki, ane'ni amanaak duuchchinna haranga reyabaan. Ati tennee amandatto?» 27 Isenna hiissiteexxi iso'n, «Eeti, anke Goottaa! Ati kaba butta duuchchiba'a dagaake Kiristoosi Mageniinke Belto kaddettexxa amanannon» hite.

28 Maartanna tennee haasoteechchi uduma wirri hite higge'e, dayyo isexxa Maaramii'i qofiba yexxeexxi, «Barachchiisalli dagedheen; ateenna hasa'neeni» hite. 29 Maariyaaminna tennee laqqeeshshanni rakke kexxeexxi isibaa marte. 30 Ookkone wodda Yessuusi, Maarta isoo qophexxemmanba hedhemma malee olla'i giddi'a e'yeemmabaan. 31 Maaramii'i dayyeessa'ni mini giddo hedhemmak Ayihudinna ise qophphi hite fuldeexxa uudeexxi ise mooggiinba marte ooxxe'neechcho insa'ne'ni labbee'naa duuka isexxa ke'ne fulle. 32 Maaraminna Yessuusii hedhemmaba gelte isoo uudeeshshanni lekka isixxe'ni wabbi hiteexxi, «Anke Gootta, silaa ati kaba hexxeettele dayyi anki reyammabaan» hite. 33 Yessuusi ise ooxxa'naa iittanni isexxa duuka dageemmak Ayihudinna oodha'naa uudeexxi isi ifi giddo yo'oshsha irriki yaadeexxi, 34 «Habate ha'noo isoo moogineebi?» hiyye qore. Insa'nenna «No'oke Gootta amoo uudi!» hine. 35 Yessuusinna indiddo ile ifixxenaa'n dune. 36 Ookkonneechchi uudma Ayihudikinna hiisseexxi, «Hitta isoo eeyyaammaxxa uudde!» hiyye. 37 Insa'ne giddii'ni mitti mitti kinn, «Ookkonne balla'ixxa ille baneeki isi, konne manjonna reyabaashsha assa dande'ammabaata?» hiyye.

38 Yessuusi higgeenni yo'oshsha yaadeexxi mooggiinbaa mare. Mooggiinki boonchinna kinjik cufendeexxe wolo'omman. 39 Yessuusinna «Kinjo hoyye!» hiyye. Alaazarixxi dayyo Maartanna isoo, «Anke Gootta reyeexxinni shoole barra turemmaxxee ta'a foole ganaan» hite. 40 Ookkonneechchi uudma Yessuusinna hiisseexxi, «Ati amandottole Mageniinka ulfinna uuda uuddattoni hiyye ate'ni kuleennabaa?» ise'aa hiyye. 41 Tennexxe insa'ne kinjo hoyyine. Okkoneechchi uduma Yessuusinna iimi'a uudeexxi hiyyee qici, «Ee, Annayyoo! Ane laqqaattexxee atee galateefataannen. 42 Ati duuchchi wodda anee laqqaattexxa ege'neennen; yaane kinn Ani tennee haaso'enechchi; kaba uurreeki manni ati anee ergitettexxa amanaashshaten.» 43 Yessuusinna tennee hiyyeechchi uduma hafuura gikki asseexxi, «Koo Alaazaari amo fuli!» hiyye ye'e. 44 Reyemmak Alaazarinna anga lekka seemmati mirqemeeshshanni alba isikanna seemmati buqemeeshshanni mooggiinxe balenaa'ni fule. Yessuusinna insa'nee hiyyee qici, «Mirqitinemmaxxa seemmanna tikkineexxi waalle! Me'uuni» hiyye.

45 Tennexxee Maaramibaa dagemmak manni giddi'ni mitti mitti Yessuusi assammaxxa uudeeke Ayihudakenaa'n heddi manni Yessuusi'ni amane. 46 Insa'ne giddi mitti mitti mareexxi Yessuusi assemmaxxa Feerisitote'n kule. 47 Ookkonneechchi uduma qeesetik sooresuwwinna Feerisito Yihudotiinxi songotixxi gamuwwa bukki hine. Insa'nennaa hinee qici, «Kunni manjichchi heddo mambe'iinka beessisuwwa assaammaxxee isoo'o maa assinennexxa woyya? 48 Iittanni isoo sammi hine waallonnole manji duuchchi iso'ni amanaan; Roomitotinna daggeexxi woyyitte no'oxxa bakanna arda no'oka kuti assite birtaan.» 49 Ookkonneechchi uduma insa'ne giddi'ni mitti eettene wogga'ni qeesetike umo kadeemmak Qeyyaafa hiyye haaso'ee qici, «Ha'nooqqa egendinegeechchi hedhebaan! 50 Ardi duuchchi ba'eexxi manni'ni ardiinxee mitti manji reyeele eldaaxxe kaddeexxa ha'noo qalbeefatinabaan.» 51 Isinna tennee haaso'eki umi isikinnitebaan; yaane kinn eettenee wogga'ni isi qeesetika umo kadeemmashshanni, Yessuusi Ayihudiinke ardi'a reya'neexxa raaga haaso'e. 52 Reya'nechchinna okkone ardi'a calla kadebaang xexxeredemmaxxa Mageniinxa oose mitteba bukki assatteten.

53 Tennexxe eettene barrabaa'n ke'neexxi insa'ne isoo shinno'aa mari'ante. 54 Tennexxee Yessuusi ookkonneechchi kayyi'a Ayihudiinxe oddo'n ba'lifate maremebaan: yaane kinn qiilla gammoojje bira hexxeexxe Efireemi hiyyemaake qachchibaa me'e; isinna ookko hordofeeyye isixxenni welti ture. 55 Ayihudiink sa'atik ayyaani shiqeshshanni; sa'atik ayyaani geyeba edi gama, ca'a hiyyatika seera bidhdhatee heddi manni hedhammange boguwwanaa'n Iyyerusaalemi'a me'e. 56 Insa'nenna Yessuusii'i hansaamman; insa'nenna Woyyichchi galmi giddo uurrineexxi, «Ha'noo'ni maa labba'ne? Ayyaanakee isi daga gopha'nu?» weli'aani weli hine. 57 Qeesetiki sooresuwwinna Feerisito Yessuusii'i abiddo'a isi haba hedheexxa ege'naak manji kulaashsha insa'ne'n ajanjeemman.