1 Yessuusinna tennee haaso'eechchi uduma iimi'a toggi hiyyeexxi soodatee qici:

«Ee, Anna ta'a yanna gelte'een. Belti atik atee ulfessaashsha Belto atika ulfeessi! 2 Ati isoo ulfessitatechchinna isi'a ati uutetteke manni duuchchi'a duuchchi woddixxa hedho isi uwwaashshanna manni duuchchi isike baalloomi hunda hedhaashsha utettexxeen. 3 Dhugaatike Mageno kaddeeteka atenna ati ergiteeteka Yessuusi Kiristoosii'i egennaashsha tinni duuchchi woddixxe hedhon. 4 Ati Ani'a uutettexxa huje birennexxi kaba butta atee ulfessennen. 5 Ee, Annayyoo! Butta dadendebaa edi darre ani atinni welti afeennake ulfinninni ati Anee uulfeessi.»

6 «Konne kaba butta duuchchinaa'n fildetexxi Ani'a uutetteke manna'n ayyumma atixxa ani leellisheennen. Insa'nenna atikeeramman; ati insa'nee Ani'a uuteten; insa'nenna hiyyichcho atika heqqe'ne'een. 7 Ani'a uutettelchchi duuchchi atiba'nite kaddeexxa ta'a insa'ne egene'een. 8 Ani'a uutetteka hiyyichcho insa'ne'a Ani uwwe'naa insa'nenna adhdhineen: Aninna atibaa'ni dagennexxanna dhugaandiinni insa'ne egenenneen: ati anee ergitetteexxa insa'ne amanneen. 9 Insa'ne atike kandeemmaxxee Ani insa'neexxe soodataanne; yaane kinni ati ani'a uutetekeenna atike kadeeke malee ani buttatee soodatabe'non. 10 Aniichcho kadeechi duuchchi atiken: atike kadeki duuchchinna anken: aninna insa'nenni ulfaatennen. 11 Yoona Ani kaba butta duuchcha'n turaabo'non: insa'ne kinn kaba buttanni he'neen: Ani atiba dagaanen. Ee, Woyyichcha Annayyoo, konni ani'a uteteekiir no'oshshanni insa'ne mitteke kandaashsha summa atikenni insa'nee heqqi. 12 Ani insa'nenni welti hedhenna wodda, Ani'a uuteetteke summinni insa'ee golleennen; heqqeennen: Maxaafiinki hiyyichchi muuxemaashsha ookkonee ba'aka belto malee insa'nenaa'ni mittikinna ba'ebaan.»

13 «Ani taa atibaa dagaannen: yaane kinn gammashsho Anxi insa'ne'n wo'mitaashsha, ta'a buttande'n hedheennexxi Ani tennee haaso'aanneni. 14 Ani hiyyichcho atika insa'ne'n uwweenneni; Ani kaba butta duuchchike kada gopheenneshshanni insa'nenna kaba butta duuchike kada gompheemmaxxee butta duuchchik manni insa'nee gibe'een. 15 Ani atee soodataannechchi fuggoxxenaa'n insa'nee heqqitotta'ate mallee: butta duuchchanaa'n insa'ne fulchitottatebaan. 16 Ani kaba butta duuchanaa'nite kada gophenneshshanni insa'nenna kaba butta duuchchanaa'nitebaan. 17 Hiyyichchi atik dhugaaten: dhugaa atixxenni insa'nee woyyoonsi 18 Ati butta duuchchike mannibaa Anee ergitetteshshanni Aninna insa'nee butta duuchchike mannibaa ergeennen. 19 Insa'ne dhugaati woyyoolete kandaashsha ani umo anka insa'nexxee woyyoonseenneni.

20 «Insa'nexxa barachcho adheexxi Ane'ni amanaakeeri'anna soodataane malee'e konneri'a calli'a soodataabe'no; 21 tinninna Ee, Annayyoo, ati ane'ni, Aninna ate'ni hedhenneshshanni duuchchiing mitteke kandaashsha, iittanni ati anee ergitettexxa butta duuchchik manni amanaashsha, insa'nenna no'o'ni he'naashshaten. 22 No'o mitteke kandeenneshshanni insa'nenna mitteke kandaashsha ati Ani'a uutettaka ulfinna insa'ne'a uwwe'eennen. 23 Tinninna Ani insa'ne'ni, atinna Ane'ni hedhaten. Ati Anee ergitettexxanna anee eetettexxe qixxe'ni insa'neenna ati eete'eettexxa kaba butta duuchchiki manni ege'naashsha, mittoomi insa'neki haranga gargar higebaake kadowwaal.

24 «Ee, Annayyoo! Kunni Ani'a uutettekiiri ani hedhenneba insa'ne he'naashsha, butta dadendebaang anee eeteettaxxee ati ani'a uutetteka ulfinna insa'ne uundaashsha hasaannen.

25 «Qullchcha Annaa, buttatik manni atee ege'na gophphoolenna Ani atee ege'neennen. Insa'nenna ati anee ergitettexxa egenne'een. 26 Ati ani'a affeettexxi eeyya insa'ne'ni hexxaashsha, Aninna insa'ne'ni hedhannoshsha, insa'ne atee egennaashsha asse'eenneni; edi'anna atee egennaashsha assannon.»