1 Sirende'ni hiyyichchi hedhemman. Hiyyichchi iikkinna Magenik welti hedhemman; iikki hiyyichchinna Magenokemman. 2 Isi sirende'ni Magenik welti hedhemman. 3 Duuchchiinxi yaane isi darree'n dadende; dademeechcho duuchchanaa'n isi belo dademeechchi mittichchinna hedheemmabaan. 4 Iso'ni hedho hexxemman; iitti hedhonna manjiinke ifamman. 5 Iikki ifinna dukkanate'n ifaan. Dukkanatinna ifa ookkone injifattebaan.

6 Magenbaa'ni ergemeeki Yohaannisi hiyyemaak mitti manjichchi hedhemman.✝ 7 Manji duuchchi isi darree'n amanaashsha ifakee isi dhugaa kulaake kade dage. 8 Isi ifakee dhugaa kulo'a dage malee: isi umo ifike'ni ifakemabaan. 9 Manji duuchchi'a ifa uwwaak dhugaatik ifi butta duuchchi'a dagaamman. 10 Kunn ifi butta duuchcha'ni hedhemman; butta duuchchanna dadendeeki isinnitemmani yaane kinn butta duuchcha konne ifa egendeemmabaan. 11 Ifike kadekeribaa dagen: firi isikinna kinni isoo adhdhebaan. 12 Kaddo malee adhdheekeeri'anna summa isike'ni amaneeke duuchchi'a kinni Mageniinxe oose kaddandaashsha baallooma insa'ne'aa uwween. 13 Insa'nenna Mageni darree'n ilemmee malee manjiinxe sannenni yookaan maaliinxe fedhiinn yookaan labbakixxe fedhiinni ilemmebaan.

14 Iikki hiyyichchinna maalake kadeexxi no'oxxe oddo'ni gale. No'onna badhaadhikinna dhugaati wo'meexxi anna ifikibaa'ni dageeke ookkone Mitteelchi Beltika ulfinna uundennen. 15 Yohaannisinna: « ‹Ani udumi'ni daga'neek ani'a ediseenni hedhemmaxxee isi hara anee sa'eeken› hiyyennexxi dhugaa isixxee kuleennak konneten» hiyye'e hafuura gikki asseexxi isixxee dhugaa kule. 16 No'o duuchchiing isixxe wo'muntenaa'ni badhaadhange'n badhaadha adhdhinennen. 17 Seeri Muuse ga'mii'ni uwweme: badhaadhikinna dhugaa kinni Yessuusi Kiristoosi darre'ni dagge. 18 Ijenda Mageno uudek mittikinna hedhebaan: yaane kinn Mageni Aabinni welti hedheek iikki Mitteelcho isike Belto kadeek Mageni isi ifise.

19 Ayihudiink baalloomiink manni, «Ati ayyete» hite Yohanisii qortaashsha Iyyerusaaleminaa'ni qeesetanna Leewwito ergee wodda, Yohaannisi dhugaa kula konneechchinn butti'a hexxeexxen: 20 Yohaannisi hiissexxi, «Ani Kiristoositebaan» hiyyee dhugaa kulee malee waakkatebaan. 21 Insa'nenna, «Atita ayyete? Eelyaasiteeta?» hine isoo qorre. Isinna, «Waawwo'o» hiyye. Insa'nenna isoo, «Atita ookkone dagaani hiyyemaammake wabeekichchoo?» hine. Isinna, «Waawwoti» hiyye.✝ 22 Insa'nenna muuxamake'ni, «Atita ayyete? No'o ergeke manna'n hiissichcho kullannoshsha ati, atike umixxee maa hitaatte?» hine.

23 Yohaannisinna wabeekichchi Issayaasi haaso'eemmashshann, « ‹Goottiinka ora toggi asse!› hiyya'ni qiilla gammoojje'ni raarammake manjichchiki hafuuri anteni» hiyye.✝ 24 Ergemeemmaki manninna Feerisitotixxe gamonaa'nitemman: 25 Tennexxee, «Ati Kiristoosite yookaan Eelyaasite yookaan wabeekake kada gophphottole mayeeta xammaqatee?» hine isoo qorre. 26 Yohaannisinna insa'ne'n hiyye hiissee qici, «Ani wodi'iki xammaqaannen: ha'noo egendinebaaki kinni ha'nooxxe oddo'n uure'een. 27 Isi ani udumii'ni daga'neeken; ani isixxe kopheka usurra midde tika dande'abe'noken» hiyye. 28 Tinni duuchcha kaddeeki Yohaannisi xammaqammake Yordanoosike wode'i wido Biitaaniya hiyyemaake loola'nitemman.

29 Yohaannisi langa baro Yessuusi isibaa daga'naa uudeexxi, «Yoona buttatike mannixxa cubbo fugussaaki Mageniink gedhechchi konneten!» hiyye. 30 «Iikki ani udumii'n dagaaki ani'a ediseenni hedheeke kademmaxxee isi anee sa'aan» hiyyeennaki isoten. 31 «Ani umo anigee isoo ege'neennabaan; yaane kinn ani wodi'iki xammaqa'n dageennechchi isi Isira'eelike arda'ni ege'nemmaashshaten» hiyye. 32 Ookkoneechchi uduma Yohaannisi hiyyeexxi dhugaa kulee qici, «Woyyichchi Hafuur guugenjotishsha iimatenaa'n butti'a dirreexxi isi hana ofo'laa'na uudennen. 33 Aninna isoo ege'neenabaan; yaane kinni wodi'iik xammaqannoshhsa anee ergeek ‹Woyyichchi Hafuuri dirreexxi iso'n ofo'leenaa uuddaatek iikki Woyyichchi Hafuurinni xammaqaak isoten› hiyye ane'n kule. 34 Aninna uudennen, isi Mageniinke Belto kadeexxa dhugaa kulaannen.»

35 Higgeenni langaxxa barra Yohaannisi leme ifixxe hordofeeyyenni welti ookkone booncho'ni uurreemman. 36 Yohaannisi Yessuusii'i ookko'ni sa'aa'naa uudeexxi, «Kunse Mageniinka gedhechchi!» hiyye. 37 Lame Yohaannisixxi hordofeeyye Yohaannisi tennee haaso'aa'naa laqqeexxi Yessuusii hordoffe. 38 Yessuusinna isoo hordonfa'naa udumi'a wirri hiyye uudeexxi «Maa hassina'ne?» hiyye isa'nee qore.

Insa'nenna, «Rebbi, ati haba hexxaatte?» hine. «Rebbi» hiyya «Barachchiissalloo» hiyyaten. 39 Isinna insa'nee, «Daggineexxi uudde!» hiyye. Tennexxee insa'ne marreexxi isi haba hedha'neexxa uunde. Insa'nenna eettene barra isinni welti honse. Yannatinna barrixxe tomme saatebaattemman. 40 Yohaannisi haaso'eexxa laqqeexxi Yessuusii'i hordofeexxe lame hordofeeyyenaa'ni mitti Simi'ooni Pheexiroosike dayyo Indiryaasitemman. 41 Indiryaasi sirete'n dayyo ifika Simi'oonii haseexxi, «Mesihii alfineenna!» hiyye iso'n kule. Mesihi hiyya (Kiristoosi yookaan hariiremeeke hiyyaten.) 42 Ookkoneechchi udima Indiryaasi Simi'oonii'i Yessuusibaa iyyedage. Yessuusinna isoo uudeexxi, «Ati Yoonake belto Simooniten; ati Keefa hiyyendee ye'endatton» hiyye. (Keefa hiyya Pheexiroosi yookaan rassa) hiyyaten.

43 Langa baro Yessuusi Geliila'a me'a hase; Filiphphoosiinna afeexxi isoo, «Anee hordofi!» hiyye. 44 Filiphphoosi Indiryaasishshanna Pheexiroosishsha Beete Sayidake qachchike manjomman. 45 Filiphphoosi Naatina'eelii'i afeexxi iso'n, «Muuse seeriinke maxaafa'n, wabeekotinna isixxee maxaafake'n borreessiteeka Yooseefika belto Naazireetika Yessuusi alfineennen» hiyye.

46 Naatina'eelinna hiisseexxi, «Naazireeti'ni eloxxi yaane hara afema dandeetta?» isoo hiyye.

Filiphphoosinna, «Daggetexxi uudi!» hiyye.

47 Yessuusinna Naatina'eeli isibaa daga'naa uudeexxi isixxee isoo, «Kunni xaqaro afebaake dhugaatike Isira'eelike manjon» hiyye. 48 Naatina'eelinna Yessuusii'i, «Hitta anee egendette?» hiyye.

Yessuusinna «Filiphphoosi atee ye'ebaa edi darre ode'iinke haqichchi hunda hexxe'naa atee uudennen» hiyye. 49 Naatina'eelinna, «Rebbi ati Mageniinke Belton; Ati Isira'eelike moyanjon» hiyye hiise haaso'e.

50 Yessuusinna isoo, «Amandeettechchi ode'iinke haqichchi hunda atee uudennen hiyyennexxeete? Ati edi'a tennee saxxaaxxa yaanuwwa uuddatton» hiyye. 51 Lebeexxi, «Dhugaate ha'no'n hiyyaannen iima bandee'naa Mageniinxi erganna Manjiinke Belti hana iimi'ni butti'a dirrita'naanna iimi'a me'ita'naa uuddinaan» hiyye.✝