1 Eetten torbatixxe sirtixxe barra'ni iitti melaale qophpheesiteemmaxxa shitto abixite hara bariisa mooginbaa marte. 2 Insa'nennaa moogiinxe bale'ni cunfeemaki kinji goggo'me'naa anfe. 3 Yaane kinni insa'nenna giddi'aa e'yinee wodda Gootta Yessuusika rensha anfebaan. 4 Insa'nenna tenne yaane mambe'aa hena'neege'ni calalqa'neexxa seemma oddo'wee'eki lami mann insa'ne bira uurre. 5 Iitti melaaletinna yo'oshsha sodaatexxi butti'a heeshshi hiteeba manni, «Mayee'e hedhotike kabeeka reyeeke mannixxe oddo'ni hassinna'ne? Insa'ne'e hine. 6 Isi kaba hedhebaani; isi ke'e'eeni. Isi Geliila hedhema wodda ha'noo'ni kulemaxxa kassi hiyye. 7 ‹Manjiinki Belti cubballeeyetixxe anga'ni sa'isseme uwwemo'aana fannote'ni fannsemo'a sakka baronna ke'a isixxi gattabaaxxen› insa'ne hiyye'eman.»✝

8 Ookkonneechchi uduma iitti melaalna Yessuusika hiyyichcho kassi hite. 9 Insa'nenna mooginbaa'ni hingeexxi tenne duuchcha tommenna mittingeenna wele gateke duuchchi'a kulle. 10 Tenneenna ergameeyyete'n kuldeexxi Megidelixxi Maaraminna, Yohaana, Ya'iqoobixxi ama Maaraminna insa'nenni welti hexxemaaxxe wele melaalle. 11 Yaane kinn kunni hiyyichchi insa'ne'ni curruuqate labbe. 12 Yaane kinn Pheexiroosi qophphi hiyye ke'eexxi moogememabaa gonge; ookkonna heeshi hiyye bale uuda wodda layinotixxa seema calla afe; isinna tenne yaanexxe'e mambe'aa hiyya'ni ifike minibaa me'e.

13 Eetene barra'ni Yessuusixxe hordofeeye giddi'ni lame Iyyerusaalemi'ni tommenna mitte kiillo metire qico'ni bayyateke Ema'uusi hiyyemaake olla'ibaa me'inamaani. 14 Insa'nenna tenne kaddeexxe yaane duuchchi'a weli'aan weli haasona'nemaani. 15 Tenne yaane weli'aan weli haasona'ninna mari'anta'nege'ni Yessuusi umi isinginini insa'ne biri'aa shiqeexxi insa'nenni welti me'a'nemaani. 16 Yaane kinni insa'ne isoo illet uunda'n ayyete kadeexxa egenena dandenebaan.

17 Isinna insa'ne hiyyee qici, «Ora me'itinaa'ni weli'aan weli mordina'n haasotina'neexxi tinni yaanuwwa maachcho?» hiyyexxi insa'ne qore.

Insa'nenna yaanda'ni qexerri hine uurine.

18 Insa'ne giddi'ni mitti Qeleyoophpha hinaaki hiyyee qici, «Ati Iyyerusaalemi giddo keesumate kadde hexxeetek atenni calla hiyyotebaata? Eetene barruwwa'ni ookko'o kaddeexxa yaane egendeboxxo hiyyotebaata?» hiyyexxi qore.

19 «Tinni kaddeexxi yaane maachchosi?» hiyyexxi Yessuusi insa'ne qore.

«Naazireetike Yessuusi'n kaddeexxe yaanexxeten!» hine iso'ni hiisine qici «Isi Mageni edonna manji duuchchi edo hujetinna haaso'ik jabake wabeekamman. 20 Isoona qeesetixxi akeekisanuwwanna ja'laabuwwi reyotitte murte'a isoo sa'issine uuneexxi fannote'ni fanniseeni. 21 No'o kinn Isira'eeli'i wodaak isoten hinee iso'ni adde asse'neenan. Kaddo malee'e tinn yaane kaddeexxeni telchi sakkaaxxe barraani. 22 No'o giddi'ni mooginbaa mariteexxi mitte mitte malaale kinn no'oo manmbe'a assite'een. 23 Yaane kinn insa'nen isika rensha gonphee wodda hedhotike kade'eeni hitaaxxa eriganna waleelati uundenben hita'ni higge daggeemman. 24 Ookkonneechchi uduma no'oo giddii'ni mitti mitti mooginbaa marrek manni melaalle haasotemashshanni kaddee'naa anfe. Kaddo malee'e iso'o Yessuusi anfebaan.»

25 Yessuusinna insa'ne'ni hiyyee qici, «Ha'noo qalbeefatinabaakinna wabeeko haasoteexxa duuchcha qalbe ha'nooxxi rakkine amandabaake! 26 Kiristoosi tenne rakko adhdhiyyo ulifnibaa e'yiyyo isi'a hasisangebaata?» 27 Muusenaa'ninna wabeeko duuchchinaa'n safeexxi isixxe'e maxaafuwwa duuchcha'ni borreesendeexxa insa'ne'aa tike.

28 Insa'nenna me'inamake olla'ibaa shinqe wodda Yessuusi bayya me'a'neechcho insa'ne'ni labbe. 29 Yaane kinni insa'nenna «Bogi galigalo'ee'eeni; arishsho e'yito'aaten; tennexxee no'onba gali malee'e me'itooxxe!» hineexxi jabeesine iso kadhante. Isinna insa'neniba insa'nen galo'a gore. 30 Isinna insa'neni welti ofo'lee wodda so'iinxa kebbo aadhdhe galatefateechini udumi'a shahshateexxi insa'ne'a uwwe. 31 Ookkonneechi uduma ille insa'nexxi banendee'naa isote kadeexxa egeene. Isinna ille insa'nexxi edii'ni miliqe. 32 Insa'ne weli'aani weli hinee qici, «Isi orake'ni no'o haasoosa'ni maxaafake'ni borreesendeexxa farri asseexxi kula wodda qalibe no'oxxi giiratishsha gubataamaba?» hine.

33 Insa'nenna eettene yanna'ni ke'neexxi Iyyerusaalemi'a hinge me'ine; ookkonna tommenna mittiinga welti hedhemakeerinni mitteba bukki hinee'na afe. 34 Insa'nenna «Gootti Yessuusi dhugandinni ke'e'eeni! Simi'oo'ninna leelleen! Hina'nemman.»

35 Ookkonneechchi uduma orake'ni kaddeexxanna so'iinxa kebbo shashshate wodda hitta insa'ne'n egenemeeexxa insa'ne'ni kulle.

36 Insa'ne tenne haasona'nege'ni Yessuusi umi isingeninni oddo insa'nexxe'ni uureexxi, «Nage'i ha'no'aa kadowwaal!» insa'ne hiyye. 37 Yaane kinn insa'ne geela uundeechcho labbe'naa alane sodaante. 38 Isinna insa'nee «Mayee sodaatina'ne? Mayee'e qalbe ha'nooxxi manda? 39 Ante kadeennexxa anga anxanna lekka anxa uude! Ane'ni uudinesha hafuuri maalakanna micco afa gopheemmaxxe'e anee qaqqabine uude» insa'ne hiyye. 40 Isinna tenne'e hiyyexxi angatanna lekka ifixxa insa'ne'ni leelishe. 41 Insa'ne gammashshotena'ni kexxeexxa isoo amana gonpheemmaxxe'e mambe'a hiyyande'ni he'nee'naa isi insa'nee «Indaachcho affine'e?» hiyye qoro. 42 Insa'nenna dudhinsheexxe qulixxu'meka kutemaalcho mittenna aa'nexxi uune. 43 Isinna aadhdhexxi insa'ne edo ite.

44 Yessuusi insa'ne'n, «Ani ha'nonni welti hedhee'na Muuseke seera'n, wabeekoletike'ni, faarotik maxaafa'ninna anxe'e borreesendemaaxxi yaane duuchchi muuxema hasisaan hiyye'e ha'noo'ni kuleenek hiyyichcha konneten» hiyye. 45 Ookkonneechchi uduma Woyyichcha maxaafuwwa qaabantaashsha sammo insa'nexxa bane. 46 Isinna insa'nee, «Kiristoosi rakko adhdhaani sakka baro reyotenaa'ni ke'aaxxa ediseen borreesende'en. 47 Isike summini aade aagatixxenna cubbotixxe gattowali'a Iyyerusaalemi'ni kexxe'e gosa gosake ardi'a lallabendaan. 48 Tenne yaanuwwaa ha'noo dhuga kula ha'noten. 49 Yoonaa! Ani anni aniki uwweexxa addachchiisa ha'no'aa erganoni; ha'noo kinni iimi'ni hunna seematishsha oddo'witina qico'ni Iyyerusalemik qachcha'ni turre.»✝

50 Ookkonneechchi uduma Yessuusi hordofeeye ifixxa Iyyerusaalemike qachchanaa'ni fulcheexxi Biitaaniya qico'ni adhdhe me'e; ookkonna anga ifixxa ke'isseexxi insa'ne eebisse. 51 Isinna insa'nee eebisa'ni insa'nenaa'n garigariti higee iimi'aanna me'e.✝ 52 Insa'nenna isi'a sagandeexxi lumoke gammadinni Iyyerusaalemi'aa illee iima hinge. 53 Insa'nenna duuchchin wodda Mageno galtenfa'nita'n Woyyichchi Galmi giddi'n qoona'emaba'a.