1 Okkonneechchi uduma Gootti wele torbaane tommenna lame manna* lame lamiki assa'ni isi mara'neeke qachchuwwa'ninna bonchuwwaa duuchcha'ni ediseexxi marraashsha erge. 2 Isinna insa'nee hiyyee qici: «Bukki assendaaxxi midha yo'oxxen yaane kinni bukki assaak hujetik manni heenooken; tennexxee midhatik anni wele hujaaka manna lebeexxi ergaashsha Mageno kadhate!✝ 3 Yoona me'we, gedhebiinsha yayyetixxe oddo'ni ha'no'o ergaanneni.✝ 4 Subba yookaan qalqaallo, yookaan kophe iyyexxinoqqe'e; orake'ninna ayyeenna nage'a aaxxinoqqe'e.✝

5 «Ayyika minenna e'yitna wodda edissineexxi, ‹Nage'i konne mine'ni hedhowwaali!› hiyye. 6 Nage'iink manji ookko hedhoole, ha'nook nage'i iso'ni hedhaan; kada gophphoole ha'nook nage'i ha'noo'anni higaan. 7 Hujallokee rundi hasisaan; tennexxe ha'no'a shiqinshaaxxa yaane ittinaa'ninna ha'witinaa'ni ookkone mine'ninni offo'le malee mitte mininaa'n mittinbaa mammarendinoqqe'e.✝

8 «Hoone qachchibaanna e'yitinaa wodda manni ha'no'oo adhdhoole ha'no'aa shiqisheechcho itte. 9 Ookkone qachcha'n hexxeexxa dhukkuliyyeera fayyissina'n insa'ne, ‹Mageniinxi mootumma ha'nobaa shiqqe'een› hiyye. 10 Yaane kinni mitte qachchibaa martinnee'naa ha'noo adhdha gonphoole ookkone qachchike ba'lina'n fuldineexxi hitinaa qici, 11 ‹Lekka no'oxxe'n abixxiteexxa ha'nooke qachchixxa buko midde ha'no'a ganga'ninanno; yaane kinni Mageniinxi mootumma shiqqeexxa tennee ege'ne›✝ 12 Ha'noo'ni kulo, ookkone qachchi irra murtettixxa barra Soodomike qachchi'a shollexxaani.»✝

13 Higgeen lebeexxi Yessuusi hiyyee qici: «Korraziinike qachcha aanne ati'a, Beete Sayidake qachchaa aanne ati'a; ha'no'ni hujemeek mambe'i Xiroosi'ninna Sidoonake qachcha'ni hujeme'eexxe kaddeele, ookko hedhammak manni edi woddanni yaaddotixxa seemma odo'weexxi bululokanna ifi'ni fiffilxeexxi silaati aadde aageemman.✝ 14 Yaane kinni murtettixxa barra ha'no'a irra Xiroosikinna Sidoonake qachchi'a shollexxaani. 15 Atinna koo Qifirnahoomike qachchaa! Iimi qico'n ifi lummisa hasseetteta? Butti'a Si'olete'ni saxxatton.✝

16 «Ha'nooxxa laqaak anxanna laqaan; ha'no'o gibaak aneenna giba; aneenna gibaak ane'e ergeekanna giba» insa'ne'aa hiyye.✝

17 Iitti torbaane tommenna lame hordofeeyye gammadda'n illeema higge daggeexxi Yessuusii'i, «Gootta! Fuggichchi hafuuri midde summa atikeni no'a hiremeen» hite.

18 Yessuusi insa'ne'a hiyyee qici, «Seexani banqotishsha iimi'ni ibaa'naa afenne. 19 Yoona bofakanna gaaddo hirbeessitinaashsha naaphphiinxe hunna duuchcha'ni ha'no'aa baallooma uwweennen; ha'noo miidhaachchi mittilchinna hedhabaan.✝ 20 Kaddo malee fuggichchi hafuuruwwi ha'no'aa hiremeexxee tenne'n mee gammadde; summi ha'nooki kinni iimate'n borreessemeexxee gammaadde.»

21 Eettene yanna Yessuussi woyyichchi hafuurinni gammashshoti wo'meexxi hiyyee qici, «Iimatikenna buttatike Gootta annaa! Tenne duuchcha beekkoletennaa'ninna ege'nemmakeerinaa'n shoxxetexxi annoolete'n ifisettaxxee atee galateeffata'enne; Ee annayyo! Tenne assatee eloxxe atixxe fedhi kadde'een.

22 «Duuchchiinxi yaane anke anninaa'n ani'a uwwende'en; iittanni Belti ayyete kadeexxa anna malee ege'naak hedheba'a; Anni ayyete kadeexxanna Belto malee, beltikinna isi'a ifiso'a hasaake manji gadhidarre ege'naak hedheba'a.»✝

23 Ifixxe hordofeeyyeba'aanna wirri hiyyeexxi insa'ne'n qoffinni «ha'no uuddinaaxxa uuddaaxxi ille eebbisendeexxe. 24 Ha'noo'n kulo, heddo wabeekonna moyanjuwwi ha'no uuddina'neexxa uudo'a haseexxi uudeba'a; laqqina'neexxanna laqatee haseexxi laqeba'a.»

25 Kunse mitte barra Muuseke seerik barachchiisalli Yessuussi hega uudo'a haseexxi, «Barachchiisalloo! Duuchchi woddixxa hedho alfonnaa ani maachcho assa hasissa?» iso'o hiyye.✝

26 Yessuussinna «Seerake'ni borreessendeexxi maachcho? Haasoossita'ette qicita hittate?» hiyye iso'ni hiisse haaso'e.

27 Manjichchi iikkinna hiyye hiisse haaso'ee qici, « ‹Gootta atika Mageno atixxe wo'ma qalbenni atixxe wo'ma hunnanninna atike wo'ma yaadinni eeyyi› iittanni ollalcho atika eeyyi» hiyyaan.✝

28 Yessuussinna hiissexxi iso'n, «Hiissitetteki hissichchi dhugaate; yoona atinna tenneenni assi! Hedhotinna hexxattoni» hiyye.✝

29 Iikki barachchiissalluwwinna ifi qullichchake assa haseexxi «Egedhdhitaa, ta'a isi ollalchi anki ayyete?» hiyyeexxi Yessuusii'i qore.

30 Yessuusinna hiyyeexxi hiisse haaso'ee qici, «Mnji mitti Iyyerusaalemi'ni Iyyarko'a me'ammaa wodda bokkaammetixxe anga'n ibe; seemma isixxanna isinaa'n quncinse isoo ganneexxi hedhotixxenna reyotixxe oddo'n waalle me'ine. 31 Keekkatebaang mitti qeesichchi ora ookkone adadde me'aa'n isoo afeexxi qeefate sa'e. 32 Iitaani mitti Leewwichchi ookko'ni sa'nemman; isinna manjichcho ookkonee afeexxi qeefate sa'e. 33 Mitti Semaarichchi kinni ifinxa ookkone ora me'a'n iikki manjichchi hedheebaa ge'e; isoonna afeexxi isi'a marare. 34 Isiba'anna shiqeexxi maduwwa isixxe'ni zayitenna woyinetixxa booka cosseexxi isee usure; ifixxe harre hananna isoo offo'lisheexxi keessumma galdammake mine'n iyyemareexxi isoo gargaare.✝ 35 Langa baro lame diinaarre maallaqa aadheexxi kessummatike mini anna'n uwweexxi, ‹Konnee manjichcho magannete'n dhibensiisi! Konne iimidarre fulchitattoka maallaqanna ani hige daganno wodda ati'a hiissannon› hiyye.

36 «Yoonata konne sase manninaa'n ookkone bokkaametixxe anga'n ibeeke manjichchi'a ollalichchokee kadeek hoonte ate'ni laba?»

37 Iikki seerink barsiisanjinna, «Ookkone isi'a marareekentaa» hiyye hiisse.

Yessuusinna «Yoona atinna martettexxi iitta assi!» hiyye.

38 Yessuussinna hordofeeyye ifixxenni ora me'inaa'naa olla'a mittibaa gore; Maartaa hiyyendaaxxi mitte majichchonna ifike mine'ni isoo keessunsite. 39 Isenna Maarami hiyyendaaxxa dayyo affeemmani; Maaraminna hiyyichcho isika laqqa'ni Yessuussixxe lekka hunda ofoldeemman.✝ 40 Maartaa kinni huje bira saxxee'na weekkende'eemmaxxee isiba marteexxi, «Gootta anxi dayyo huje anee calla'ni waaldeexxi ofoldaa wodda sammi hitatto? Anee gargaartaashsha ise'ni kuli malee» hite.

41 Yessuussinna hiisse ise'ni haaso'ee qici, «Maartaa, tee Maartaa, ati heddo yaane'ni wixixxi hitaatten, weekkenda'etten, 42 hasissaaxxi kinni mitte yaane callan; Maaramiqqa ise'a eldaaxxa mellexxe'een; tinninna isenaa'ni adhdhendabaan.»