1 Mitte Edi Sanbatixxa barra Yessuusi itaa ito'aa Feerisitotike sooreessaa kadeemmake manjike mine'n e'ye wodda manni isoo'o illeti dooyya'nemman. 2 Ookkonna bisi isik duuchchi darshe'naa ela gopheemmak manjichchi Yessuusi edi darree'n hedhemman. 3 Yessuusinna seeriinka muxxalluwwanna Feerisito, «Edik Sanbatixxa barra dhukkulliyye fayyisa seerake moo seerakebaa?» hiyye insa'nee qore. 4 Insa'ne kinni hiissichcho uunebaangi sammine; Yessuussinna manjichcho ookkonee aadhe fayyiseexxi me'aashsha asse. 5 Ookkonneechchi uduma Yessuusi insa'ne, «Ha'noo giddii'ni belti ifike yookaan qotiyyichchi ifik Edike Sanbatixxa barra bale giddo e'yoole rakeexxi fulchabaak ayyete?» hiyye insa'ne qore. 6 Insa'nenna mitte hiyyichchonna tennexxee hiissa dandeennebaan.

7 Yessuusi jilatee ye'eemeek manni ulfaateexxa bakka abixxo'a hokkokkisaa'naa afeexxi hiyya'ni insa'nexxee mammakee qici, 8 «Mitti manji ate'e jilatee ye'oole ulfinniinxe bakka'n ofoldoxxe'e; ati irra ulfeessemmaak manji ye'emeexxe kaddo'oole, 9 ha'noo lamiinga ye'emmak dageexxi, ‹Tenne bakka isi'a waali!› hiyyaan; ookkone wodda atinna shookka'n tuffatendeexxe bakkabaa me'itatton. 10 Yaane kinni ye'endatto wodda heennoxxa bakka uuddettexxi ofo'li; atee ye'emmakinna dageexxi atee, ‹Koo anke jaalo, ulfaatteexxe bakka'n iima saxxe ofo'li› atee hiyyaan; atinna eettene yanna atinni welti jilatee ye'ememmake manni edo ulfaattatton. 11 Tinni kaddaachchinna ifi lummisaak duuchchi shiixxedhaan; ifi shiixxishshaaki duuchchinna lummedhaan.»

12 Yessuusinna ookkone jilatee ye'emmaka manjichchonna «Jilatee dhiyaanna yookaani hiribaata shiqishshatto wodda insa'neenna ati'a bado hiisinabaashsha jaaluwwa atika, dayyuwwa atika, firuwwa atika olla'iinxa dureeyye yexxoxxe'e. 13 Yaane kinni jila qixxeessitatto wodda hiyyeeyye, hokkoluwwa, naafuwwakanna balla'uwwa ye'i! 14 Atinna eebbisendatton. Insa'ne ati'a bado hiissa dande'a gonphammaxxee, qulliyye reyotenaa'n kexxaa wodda ati'a Magen hira hiissaan.»

15 Yessuusin welt itatee ofo'leeki giddii'n mitti tennee laqeexxi, «Mageniinxe mootumma'ni shiqqeexxe itanaa'ni itaakixxa wodo!» hiyye.

16 Yessuussinna iso'n hiyyeexxi hiisse haaso'eeqic, «Mitti manjichchi lumooxxa jila jileexxi heddo manna ye'e. 17 Eettene jilaxxi yannanna gelte wodda ye'endemmaxxa keessumma, ‹Kunse duuchchiingeechch qixxo'emmaxxe amme› hiyye ye'aashsha erganjo ifika insa'ne'n erge.

18 «Yaane kinni duuchchiing ififixxa irkifachcho shiqishate'n ke'e; taakeessok ta'a reefi ‹Boga hidhe'ennaxxe'e marennexxi iso uuda ane'e hasissaan, maganneten ani'a gattowwaal hiyyi› hiyye.

19 «Mittikinna, ‹Ani onde qotiyyo hidheennaxxe'e tenne qotiyyo leenjisa ane'e hasissammaxxe'e magannete'n ani'a gattowwaal hiyyi› hiyye.

20 «Welikinna, ‹Ani reefike waajubichcho kade'ennaxxe'e daga dande'abe'no› hiyye.

21 «Iikki erganjinna illee iima hige dageexxi tennee ifike gootta'n kule. Eettene yanna ookkone mini anni mufateexxi ifika erganjo ‹Rakketexxi qachchiinxe weldeennuwwabaanna qaxxaammura oruwwibaa mari; hiyyeeyye, kooko'iyye, balla'uwwakanna naafuwwa kabaa'a iyyedagi!› hiyye. 22 Iikki erganjinna, ‹Anke gootta! Ajajjettexxi duuchchi assende'een; ta'anna gatte'exxi bakka hexxeen› hiyye. 23 Goottikinna ifika erganjo hiyyeeqic, ‹Weldennuwwate'ninna hadi giddii'a me'ammake oruwwibaa mari; anki mininna wo'maashsha affetteka duuchcha aaxxe iyyedaga'n e'yishi. 24 Ha'noo'ni kulo, ookkone ye'ememmake manni giddii'ni mittikinna midde anxe jilaxxa ita afo'ik maqabaan› hiyye.»

25 Heddi ardi Yessuusinni welti me'a'nenge'n udumi'a wirri hiyyeexxi insa'ne hiyyee qici; 26 «Anibaa dagaak duuchchi annakanna ama ifixxa, are ifixxa oose ifixxa, ifika dayyuwwanna ifixxa dayyuwwa, ifixxa hedhonna midde gattebaang giba gophoole anke hordofallo kada dande'abaan. 27 Umo ifikixxa fannonna ba'edheexxi anee hordofabaak anke hordofallo kada dande'abaan.

28 «Ha'noo giddii'n mitti manji mine ijaaro'a hasoole, hujetixxe muuxaa'a geyaak hitteeke maallaqa kadeexxa ediseexxi ofo'le hira herregabaak aate? 29 Ookkone minixxa booso ofo'lisheexxi muuxa isoo dhibbeexxe kaddoole iso'o uudeek duuchchi iso'n gacifataan. 30 Isoonna, ‹Kunni manjichchi ijaarsa safeexxi muuxa dande'ebaan› hinaan.

31 «Yookaan mitti moyanji wele moyanjinni lolema hasaaxxa yanna lame tomme kuma loliinka manna adhdheexxi iso'n dagaaka moyanjo tomme kumma loliinke manninni ifinaa'n faachcheefata dande'aaxxa afo'leexxi mari'atabaak aate? 32 Dande'abaake kadoole kinni iikki lolo'aa daga'neeki moyanji bayaanni hedhee'naa araarake erganjuwwa iso'n ergedhaan. 33 Iittani ha'no giddii'n afeechcho duuchcha walabaak anke hordofallo kada dande'aba'a.

34 «Maxine elloolchoni; maxine xe'me ifixxa gophpheexxe kaddoole kinni hittata kadde langaxxa maxinummatixxa xe'me afa dandeettataa? 35 Iitta hexxeexxi maxine bogakeenna kadi fichcha shaqqishatee la'o afa gophpheemmaxxe gadho hunendaan:

«Laqqaaxxa mansha afe'eek laqowwaal» hiyye.