1 Ookkone barro'n Roomixxe galcha hunda hedheek ardi duuchchi laakko'emaashsha Awugixoosi Qeesaari ajaja fulche. 2 Kunni Qerenewoosi Sooriyake galchallo kademma wodda assemeeke siretike ardiinke laakkoossan. 3 Tennexxe mitti mitting manji borresemo'a ifi ifke qachchibaa me'e.

4 Yooseefinna Daawwitixxe horteke manjo kademmaxxee'e Geliila giddo hedheek Naazireetike qachchinaa'n ke'eexxi Yihudake boga'n hedheeke Daawwitike qachcha hiyyemaake Beeteliheemike qachchibaa me'e. 5 Borreessemo'aa ookko'a me'eemmak ila shiqe'emmaxxe isi'a uwwendemmaxxe Maaraminni weltitemman. 6 Ookkoonna he'nee'naa ildaaxxi yanna gelte. 7 Angafa beltonna ildeexxi seemmati bukki assite; keessumma galdammaba gallaaxxi bakka gonphendeemmaxxee'e annottanna hori oke'aa itammaxxe bakka'n diiphphisse.

8 Ookkone loola'n hashsha hore heqqexxa'n gadho galdaammaxxe allalisano hexxemman. 9 Goottiink iimik erganjinna insa'ne bira dageexxi uurre; Goottiink ulfinninna qarqara insa'neeke'n xabe; insa'nenna lumoshsha sodaante. 10 Iikki iimik erganjinna insa'ne'n hiyyee qici, «Mee sodaatte, ardi duuchchi'a kaddaaxxa gammashshotixxa eloxxa odo ha'no'n kulonnaa dage'ennen. 11 Telcho Daawwitike qachcha'n anjiralli ha'no'aa ilemeedheen; isinna Gootta Kiristoositen. 12 Ha'no'aa beessisake kadaachchinna anno seemmati bukki assendeexxi hori oke'a itammaxxe bakka'n diiphphee'naa affinaan.»

13 Dedhange'n iimik sannachchi ookkone iimike erganjinni welti leelle; Magenokanna hinna'n galateeffantaamma qici,

14 «Ale iima ulfinni Magenokee,

buttate'ninna isi eeyyaake manni'a nage'i kadowwaal.»

15 Ergannatinna insa'nenaa'n gargar higgeexxi iimi'a me'itee wodda allalisanonna weli'aanni wel, «Ke'we Beeteliheemi marrennexxi Gootti no'o'n leellisheexxa tennee yaane uundo» hite.

16 Allalisanotinna rakke marteexxi Maaraminna Yooseefi'i affe; eettene annonna hori oke'a itammaxxe bakka'n diiphphe'naa affe. 17 Eettene annonna anfe ke'neexxi isixxee insa'ne'n kulendemmaxxa yaane duuchcha oddeessite. 18 Tennee laqeek duuchchi allalisano kuldeemmaxxa yaane saade. 19 Maaraminna kinni tennee yaane duuchcha qalbete'n galchexxeexxi kassi hita'n hedda'emman. 20 Allalisanotinna duuchchiinxi yaane insa'ne'n kulendeemmashsha kaddee'naa uuddeexxeenna laqqeexxee Mageno saadda'ninna galateeffata'n ille iima higge.

21 Jila offo'lo'a saddeetixxi barra geltee wodda siila'wemebaa edi darre iimik erganji isi'a fulcheemmake summinni «Yessuusi» hiyyeme ye'eme.✝

22 Muuseke seerishsha luqqi hiyyatixxi yanna muuxendee wodda Yooseefinna Maariyaami eettene anno Goottakee uuno'a Iyyerusaalemi iyyemarre.✝ 23 Tinninna Goottiinke seera'n, «Labbake kadeek angafi duuchchi Goottakee foyemeeke kadaan» hiyyende borreessendemmaxxeenna✝ 24 iittanni Goottiinke seera'n, «Lame guugenjo yookaan lame guugenjotixxa beltanna shiqishsha hasissaan» hiyyaake ajaja hedhemman.

25 Eettene yanna qullichchi Mageno sodaataak Simi'ooni hiyyemaake manjichchi Iyyerusaalemi hedha'emman. Isinna Isira'eelixxa dayya'a heqedha'emmake manjon; woyyichchi Hafuurinna iso'n hedhemman. 26 Isinna Goottiinka Kiristoosi uudebaak reyabaaxxa Woyyichchi Hafuuri iso'n leellishe'emman. 27 Eettene barra Woyyichchi Hafuuri akekee'na'a Woyyichchi galmibaa mare. Annuyyotik hadi Muuseke Seerishsha hasissaaxxa isi'a assatee'e annuyyo Yessuusii'i Woyyich galmi giddo iyyedangee wodda 28 Simooninna eettene aadhe luu'medheexxi hiyya'n Mageno galateefatee qici,

29 «Anke Goottaa, ani'a uutettexxe addachchiisashsha muuxende;

ta'a anee erganjo atika nage'ik adhdhi.

30 Ille anxi manni duuchchi edo qophpheessitettexxa

31 atixxa anjira uudde'een.

32 Kunninna Mageno ege'nebaake gosa gosake ardi'a Mageno leellishaake ifan;

Isira'eelike ardi'aanna ulfinnaken.»

33 Eettene annoki anninna ama tenne annoxxe kulendeexxa yaane saanda'emman. 34 Simi'ooninna insa'nee eebbiseechchi uduma eettene annoxxa ama Maarami'i hiyyee qici, «Tinni anno Isira'eeli giddo heddi mannixxe anjirenshaxxeenna ba'nexxee buutote kaddo'a murende'een; fuggoxxa assaakeeri'aanna beessisa kaddaan; 35 heddi mannik qalbetik yaadi ege'nemo'a atixxa qalbe kinni yaaddotik wolaantichchi woxxaan» hiyye.

36 Aseerixxe gosatike mininaa'n Faanu'eelixxi belto Haanna hiyyendaaxxi wabeetto hexxemman. Isenna lumooshsha cindeemman; dubarrummati heerunde'eemmak aro'inni welt torbaane wogga turte'eemman. 37 Sadddeeta tommenna shoole wogga kaddaa qico'n Woyyichchi Galmi giddii'n qootebaangi hashsha barra sooddachchotinna agabo goddot ergagatenda'emmaxxe hiyyeettemman. 38 Eettene yanna'n isenna daggeexxi Mageno galateeffatte, Iyyerusaalemixxa wodensha heqqedha'neek duuchchi'ninna eettene annoxxee haasootte.

39 Yooseefinna Maariyam Muusek seer ajajammaxxa duuchcha assineechchi uduma Geliilake looli giddo hedheeke Naazireetii'i ifike qachchibaa ille iima hinge.✝ 40 Anno iittinna nophphite jabaatte; beekkumikinna ise'n wo'me; Mageniink badhaadhi iso'n hedhemman.

41 Sa'atike Ayyaani'a hadi isik wogga wogga'ninni Iyyerusaalemi'a me'a'nemman.✝ 42 Yessuusinna tommenna lame woggake kadee wodda baratendemmashanni ayyaanakee me'ine. 43 Ayyaaniinxi barruwwa muddeechchi uduma ifike miniba'a ille iima hinga wodda belti Yessuusi Iyyerusaalemi gate; Yooseefinna ama isixxi kinni isixxa gata egenneemmabaa. 44 Insa'nen welt hedheechcho labbee'naa mitte barraka ora me'ine. Ookkoneechchi uduma ifike firuwwibanna egeneeke mannibaa isoo hasito ke'ne. 45 Isoo afa gonpheechchi uduma isoo hansa'n Iyyerusaalemi'a ille iima hinge. 46 Sakkaxxe barra uduma woyyichcha galmi giddo Muuseke seerixxe barsiisalluwwiinxe oddo'n offo'leexxi hinaaxxa caqasa'n qortumuwwakanna insa'nee qoraa'naa anfe. 47 Isi hiyyaaxxa laqeek duuchchi qalbeefachcho isixxe'ninna hiissichcho isika saada'emman. 48 Hadi isikinna isoo afee wodda mambe'a hiyye; ama isixxinna isoo, «Koo, anke belto, mayee no'o'n tennee assitette? Aninna atik anniqqa atee wixixxi hinee hansa'nennan.»

49 Yessuusinna «Mayee anee hassine? Anke Annike mine'n afema anee hasissaaxxa egendinebaa?» hiyye. 50 Yaane kinni isi insa'ne'n haaso'eexxa qalbeeffanteba'a.

51 Ookkonechchchi uduma insa'nen welt adadde Naazireeti'a me'e; insa'ne'anna ajajema'nemman. Ama isixxi tennee yaane duuuchcha qalbe ifixxi giddo uggudhita'nemman. 52 Yessuusinna Magen edonna manji edo beekkumik, ejjumikinna elleti nophpha'nemman.✝