1 Eettene yanna heddo kuma'n laakko'emaak manni weli dhiibaa qico'n bukki hiyyeexxi hedhe'naa Yessuussi ifixxa hordofeeyye hiyyee qici: «Feerisitotike lebelenaa'ninna tinninna insa'neexxe iffi uggudhdhanaa'n ifi heqqedhdhe.✝ 2 Buqendeexxi farri hitabaang, sho'endeexxi leellitebaangi gattabaan.✝ 3 Tennexxe dukkanate'ni haasootinaaxxi yaane duuchcha ifake'ni laqendaani; mini giddo manshate'n hashashshineexxi gadhoo minixxe guutonaa'n lallabendaan.

4 «Anke jaaluwwa! Ha'noo'ni ani kulo, maala shiyakaara ookkonneechchi uduma kinni mittelchonna assa dande'abaakaara sodaattinoqqe'e. 5 Yaane kinni ayee'e ha'no sodaataa hasissaaxxa ha'noo'n leellishsho; shiyeechchi uduma gaanemii'n hunatika baallooma afe'eeka iso'o sodaatte; ha'noo hiyyannen eeti isoo sodaatte. 6 Onde diillise lame saantime'n gurgurema gophphaata? Kaddo malee tennee diillisuwwanaa'n mittetinna midde Magenoke'ni dedhendabaan. 7 Umo ha'nookik ordichchi midde laako'eme'eken; yoona mee sodaatte ha'no heddo diillisuwwanaa'n sa'aake hira affine'een.

8 «Ha'no'aa hiyyaannen manni edo ani'a dhugaa kulaake duuchchi'a Manjiink Beltinna Mageniinxe erganna edo isi'a dhugaa kulaan. 9 Yaane kinni manni edo anee waakkataak duuchchi isinna Mageniinxe erganna edo iittanni waakkatema. 10 Manjiinke Belto'n salphisatika haaso'a haaso'eek duuchchi isi'a gattowwaal hiyyenda; Woyyichcha Hafuura yowwaakee kinni isi'a gattowwaal hiyyendabaan.✝

11 «Manni ha'no abideexxi Ayihudinke magenoofachchotike mine'n, gallchalluwwiinba'anna baalloomiinke mannibaa ha'noo iyyemaraa wodda hitta yookaan maa hissiitinaaxxa mee rakkatte. 12 Eettene yanna maa haaso'a hasissaaxxa Woyyichchi Hafuur ha'no'n kulaan.»

13 Ardi giddii'n mitti manjichchi Yessuussi'i, «Barachchiisallo! Dhaala ani'a qoodaashsha dayyo anke'ni kuli!» hiyye.

14 Yessuussinna isoo'o, «Koo manjichcho ha'noo'n murona'a yookaan ha'no'aa qoodonna'a anee baalloonseek ayyete?» hiyye. 15 Lebeexxi insa'ne'n, «Manjiinxi hedho karratixxe birasa'nenni welti abidendeexxe yaane kada gophphemmaxxee, heqqedhdhe; tennexxee haafematena'ni ifi heqqedhdhe.»

16 Ookkonneechchi uduma insa'ne'n hiyya'n mammakee qici, «Fichchi isik yo'oshsha miseeke mitte dureessa manjichcho hedhemman. 17 Isinna, ‹Midha anxa aassedhannoxxi bakka hedha gophphemmaxxe'e maa assanno?› hiyye hede.

18 «Ookkonneechchi uduma isinna heyyee qici, ‹Assannoxi yaaneer, afe'ennaka gootaruwwa diigennexxi wele ba'lallama gootaruwwa ijaarannon; ookkonna midha anxanna afennelcho duuchcha tuulannoni. 19 Lubbo anxanna, «Tee anxe lubbo heddo wogguwwa'aa geltaaxxa karra ati'a tuule'ennen. Yoona hafuura adhdhi, iti ha'wi; gammadi.» ›

20 «Mageni kinni isoo'o, ‹Koo ati bada gowwi lubbo atixxi tenne hashsha atenaa'n adhdhendo'a hasendaan; yoona ati ifi'a tuuldeeteki ayyike kada?› hiyye.

21 «Tennexxe ifi'a karra tuulaak Mageni edo kinni duroomebaake manjinna iittanden.»

22 Ookkonneechchi uduma Yessuussi hordofeeyye ifixxe'n hiyyee qici: «Tennexxe ha'no'ni kula'ennen hedho ha'nooxxe maa ittinaaxxa yookaan biso ha'nooke maa oddo'witinaaxxa wixxixxi hitinnoqe'e. 23 Hedho itatenaa'ni, bisikinna seemmatenaa'n sa'aan. 24 Amme qoodhande uudde! Rolkaba'a, haa'maba'a; bukki assaaka gootara afeba'a; Mageni kinni iso'o itisaan. Ha'noota ci'atenaa'n lumo qico saxxinabaata? 25 Ha'noonaa'ni wixixxi hiyyeexxi hedho ifixxe'n mitte barra* lephpha dande'aak aate? 26 Yoonna heenooxxa yaane midde dandeetine assa gophphineexxenni wele yaanexxeeta mayee wixixxi hitina?

27 «Diidi giddik hiddichchuwwi hitta daraara'neexxa amme uudde! Elo'aba'a, sulqaba'a, yaane kinni ani hanoo'ni kulo, Seloomoon midde konne ifike ulfinni duuchchinni konne daraaruwwanaa'n mittinshanna midde oddo'webaan.✝ 28 Yoona Mageni telcho leelliteexxi soodo giirate'n hunndaaxxa gadhixxa anso iitta oddeessa'neelchinni ha'noo amana xe'yite'ekaara, ha'noofa'i hitatta caala oddeessa gophata? 29 Tennexxe maa ittinaaxxanna maa ha'witinaaxxa yorati qalbe ha'nooxxi wixixxi hitoqe'e. 30 Tenneeqqa buttate'n hedheek ardi duuchchi halsaan; anni ha'nookiqqa tinni duuchcha ha'no'aa hasissaaxxa ege'naani. 31 Tenne irra Mageniinxa mootumma halse, tinni duuchchi ha'no'aa lebende uwwendaan.

32 «Ha'noo shiixxooke hore kaddine'eek mootumma ha'no'aa uwwatee ha'noke annixxe fedhi kaddeemmaxxe'e mee sodaatte. 33 Afineechcho gurgurtine hiyyeeyyete'e uwwe! Moodhalshe moortabaaba, daamule itabaaba'a, dullo'abaake subba'n muddabaaxxa karra iima bukki assedhdhe. 34 Maallaqi ha'nooki hedheebaa qalbe ha'nooxxinna ookko hexxaan.

35 «Ha'noo ka'litineexxi, xassakanna xassexxine'e heqqedhdhee!✝ 36 Gootti insa'neek aadha heerumiinxe jilanaa'n higaa qico'ni heqqedhammake isinna dageexxi hula ganganaa wodda; ikki woddi hula banate'e qophpheeffateeke manna fakkaatte.✝ 37 Gootti insa'nek dagaaxxa yanna dammaqe heqqedhaak erganjuwwixxa wodo; dhugaate ha'noo'ni kulaannen, gootti insa'neekeinna rake ka'leexxi indo'a insa'nee offo'lishaan; shiqeexxinna insa'ne ergataan. 38 Hashshixxe langaxxenna sakkaxxe kuta'n ittanni dammanqeena'a insa'ne afeeke ookkone erganjuwwixxa wodo. 39 Tenne kinni ege'ne; moodhalshi heene sa'aate'n dagaaxxa minik anni ege'ne'eele ifik mini qotemo'a sammi hiyye uudammabaan.✝ 40 Ha'noonna qixxeffattine heqqedhdhe; Manjiinki belti keekkatinabaaxxe yanna'n dagaan.»

41 Pheexiroosinna Yessuussii'i, «Goottaa konni mammaassi no'o'atemo duuchchingeete?» hiyye qore. 42 Goottikinna hiisseexxi, «Yoona ita insa'ne'aa hasendeexxe yanna'n insa'ne'a uwwo'a Goottik ifike mini ha'do'n baalloonsaak xurameesikinna beeki galchalli aate? 43 Gootti illee iima hige dageexxi iitta assa'naa afaake erganjixxa wodo. 44 Dhugaate ha'no'n haaso'aannen; isi isoo'o afeexxe karra duuchi hana baalloonsaan. 45 Yaane kinni iikki erganji Kunni ‹Gootti anki shiqe dagabaan turaani› hiyya'ne hedeexxi meya labbaka erganjuwwa loloole, iittanni eeyyeshsha ite ha'wate'ninna machcho'ate'n ke'oole 46 konne erganjik gootti isi hedebaaxxe yanna'ninna keekkatebaaxxe barra'n dagaan; tennexxe iso'o kochchisaan; hixa isikanna amanabaake mannin welt assaan.

47 «Gootti ifikixxa halcha ege'neexxi qixxeeffatabaakanna fedhi isixxa assabaak erganji isi fuggo jadhafemaan. 48 Yaane kinni tenne goottinxa fedhii ege'na gophati xixemaaxxa yaane asseexxi afemoole heenoo qico jadhafema. Heddo uwwendeekenaa'n heddo yaane heqqenda; heddo magannenna adhdhoole isonaa'n heddo yaane heqqendaan.

49 «Ani daggennelchi butta'n giira wocci assonna'aten; tinni giiranna ta'anni bubbeele silaa ani hittata gammadanna'a. 50 Yaane kinni ani xammaqemanok xinqata hedheeni; muuxema qico'ninna wixixxi hiyyaannen.✝ 51 Buttate'n nage'a iyyedagatee dageennelcho ha'noo fakkaatta? Waawwo, ha'noo'ni kulo, ani dageenelchi gargar hiissonnaaten; 52 Ta'anni udumi'a mitte mini haddi giddo ondi manji hedhaan; lami saseke'n sasikinna lameke'n ke'eexxi gargar higaan. 53 Anni belto ifiken, beltikinna anna ifikeen, ama belto ifixxe'n beltotinna ama ifixxe'n, ballo beltinxe'n beltiinxinna beltiinxe ama'n kexxeena'a gargar hingaan» hiyye.✝

54 Higgeeni ardake'n Yessuussi hiyyee qici: «Dhidhimidaree'n duumanchee'naa afinaaxxa yanna iikki woddi, ‹Telcho xeeni gano'aten› hitinaani; xeenikinna ganaani. 55 Iittanni bita'ii'n diidalleesse'naa affinaa wodda, ‹Telcho bogi arishshaan› hitina bogikinna arishshaan. 56 Ha'noo ifi uggudhdhalli iimatixxanna buttatixxa bifa gargar hiissat kaddaaxxa egendine'een; hittata tinni barra hittaxxeexxe kadeexxa ege'na ha'no dhibbe?

57 «Mayeete ha'no dhugaatixxa yaane egendineexxi mura gophphinaachchi? 58 Ate'e ku'le'eeke manjinni, hayyichchiiba'a me'itatto wodda oranni isinni araaremate'e wo'laan; kada gophphoole hayyichchi usuraake manjo'n ate'e sa'isse uwwani; usuraaki manjchchinna usurriinke mine'n ate'e takki assaan. 59 Ate'ni kulo, maallaqa uute birtatto qico'ni ookkoo'n haranga fuladdabexxon.»