1 Ookkonneechchi uduma hordofeeyye isixxi ifi gophphebaang duuchchi wodda soodachcho insa'ne'a hasissaaxxa insa'ne'n leellisho'a Yessuussi konneechchi butta hedheeka mammaassa insa'ne''ni hiyye mammaakee qici; 2 «Mitte qachchi giddo hedhaak Mageno sodaatabaak manjokanna ulfeessabaake mitte hayyichcha hedhemman. 3 Ookkone qachchi giddo mitte aro'o shi'witeexxe manjichcho hexxemman; isenna ‹Anxenna anke naaphixxe oddo'n hexxeexxa yaane'n ani'a muri!› hita'ni hayyichchiinbaa ora fulchita'nemman.

4 «Hayyichchikinna murte ise'aa uwwebaang heddo barra ture; uduma kinni qalbe giddo, ‹Mageno sodaata gophonnolenna, manjokanna ulfeessa gophonnolenna 5 tinni aro'o shi'witeexxi manjichcho anee rakkissammaxxee ise'a murannon, kada gophphoole kinni duuchchi wodda dagga'n anee rakkissaan.› »

6 Lebeexxi Gootti hiyyee qici, «Iikki Fuggichchi hayyichchi hiyyeexxa laqqe! 7 Magenita hashshanna barra isibaa oodhaake filemeeke ifike manni'a murabaata? Harange insa'ne'n gaga'mi hiyaata? 8 Ha'noo'ni kulo, isi rakee insa'ne'aa muran. Yaane kinni manjiink Belt dagaa wodda buttate'n amana alfuman?»

9 Ifi qullichchake asse uudati ifi saadaakeerii'anna wele manna kinni tuffateeke mannixxee konne mammaassa insa'ne'a hiyya'n mammaakee qici: 10 «Lami manni soodachchotee'e alalle galmi giddi'a me'e; mitti feerisichchoke langak qaraxa bukki assa'emmakemman. 11 Feerisichchikinna uurreexxi ifixxee soodata'n hiyyee qici: ‹Mageno ani wele manni duuchchishsha, bokkaame xaqartichcha, yabaabula giddii'ninni konne qaraxa bukki assaammake manjichchishsha kada gopheennaxxe'e atee galateeffatannen. 12 Ani torbaate'ni lamele agabo goddo hosaannon; alfannochcho duuchchanaa'ninna tommitte ati'aa uwwaannon.›

13 «Iikki qaraxa bukki assammaki kinni bayyanni urreexxi, iimi'anna midde qokki hiyya haseba'a. Yaane kinni qoma ifixxa ga'na'n, ‹Mageno, anee balleessanjokee marar› hiyya'nemman.

14 «Ha'noo'ni kulo, ookkone fariisichchi irra kunni Mageni edo qullichchiinsha uudemeexxi mine ifikibaa higeen; ifi lummisaak duuchchi shiixxedhaan; ifi shiixxishaak kinni lummedhaan.»✝

15 Yessuussi anga ifixxa hana uggaashsha manni annoole isibaa iyyedagaamman; hordofeeyye isixxinna tenne affeexxi insa'ne xixxe. 16 Yessuusi kinni annoole ifibaa ye'eexxi hiyyee qici, «Mageniinxi mootumma insa'neeshsha hedheekeeri'a kaddeemmaxxe'e annoole anibaa daggo'aa waalle hoyyitinoqqe'e. 17 Dhugaate ha'noo'ni kulaannen, Magniinxa mootumma annooletishsha adhdhabaak duuchchi haranga ise'ni e'yabaan.»

18 Ayihudiinke sooresuwwi giddii'n mitti, «Mararallo barachchiisallo duuchchi woddxxa hedho alfonnaa maachcho assanno?» hiyyeexxi Yessuussii qore.

19 Yessuusinna iso'n: «Anee maayee marachchiisanjo hitatto?» isinna hiisexxi «mitte Mageno malee ayyinna mararaalli hedhebaan. 20 Ajajuwwi isikinna: ‹Yabaabuldoxxe'e, shiltoxxe'e, mortoxxe'e, dhark dhugaa kuldoxxe'e, annakanna ama atixxa ulfeessi!› hiyyaka ajajuwwa egendeetteni.»✝

21 Manjichchikinna: «Konneeraqqa oosummandenaa'n safee'e heqqedhennen» hiyye.

22 Yessuusi tennee laqee wodda manjichchoke'n, «Yoona mitte yaane calla ati'aa gattaan; affettelcho duuchcha gurgurte hiyyeeyyete'e uwwi! Iimate'ninna tuulendeexxe karra affatton; ookkonneechchi uduma anee dagge hordofi» hiyye.

23 Manjichchi kinni tenne laqee wodda lumooshsha dureessake kadeemmaxxe'e yo'oshsha yaade. 24 Yessuusinna kunni manjichchi lumooq qica yadeexxa uudeexxi isoo hiyyee qici, «Dureeyyete Mageniinxe mootumma'ni e'ya hittatta selli assitaaxxee! 25 Dureessi Mageniinxe mootumma'ni e'ya irra gaali miiletike qo'i giddi'ni sa'aa isi'aa shollexxaan!»

26 Tenne laqeek manni, «Iittate kaddooleta ayyete anjirema dande'a?» hiyye.

27 Yessuussinna, «Manjoke'n dande'endabaaxxi Magenoke'n dandendendaan» hiyye.

28 Pheexiroosinna Yessuussi'i, «Kunse no'o anfenelcho duuchcha waallee atee hordonfeenneeni» hiyye.

29 Yessuussinna insa'ne'aa hiyyee qici, «Dhugaate ha'noo'ni kulaannen Mageniinxe mootummaxxee hiyyeexxi ifika mine, yookaani are ifixxa, yookaan, dayyuwwa ifika yookaan hado ifika yookaan oose ifixxa waaleek 30 konne baro'ni heddo dachcha'a, dagaake barro'ninna duuchchi woddixxa hedho alfabaaki ayyinna hedhebaan.»

31 Yessuussi tommenna lame hordofeeyye ifixxa ifibaa shikki asseexxi insa'ne'n hiyyee qici, «Kunse allalle Iyyerusaalemi'a me'inonnaaten; wabeeko Manjiinke Beltixxee borreessiteexxi duuchchi muuxendaan. 32 Isi Ayihudake kadebaake mannixxe anga'ni sa'isseme uwwemaan; insa'nenna iso'n gacifantaan, yowwinaan, iso'ninna tunfaan. 33 Isoo jadhanfeechchi udumanna shinnaani; isinna sakkaxxa barra reyotenaa'n ke'aan.»

34 Hordofeeyye kinni tenne yaane duuchchanaa'n qalbeeffateexxi mitte yaanenna hexxeba'a; konne hiyyichchixxi tikanna insa'nenaa'n sho'ondeemmaan; Isi mayiinxe yaanexxee haaso'eexxanna egenneemmabaan.

35 Yessuussi Iyyarko'a shiqee wodda mitti balla'i oriini qarqara ofo'lee kadhata'nemmani. 36 Iikki balla'inna ardi ookkoo'n sa'a'neexxa laqeexxi, Kunni maachcho? Hiyye qore. 37 Insa'nenna, «Naazireetik Yessuusi kabaa'n sa'ate'n hedheen» hine iso'ni kulle. 38 Isinna, «Yessuusi, Daawwitike Belto ani'a marar!» hiyya'n raare. 39 Edi darree'n me'ate'n hedheemmakiiri sammi hiyyaashsha isoo xixe. Isi kinni, «Daawwitike Beltoo! Ani'a marar» hiyya'ni caala raare.

40 Yessuusinna uurreexxi ookkone manjichcho isibaa iyyedangaashsha ajaje. Isiba'anna dagee wodda 41 «Ati'a maa assonnaa hassaatte?» hiyye isoo qore. Iikki ille afammabaakinna, «Anke Gootta afonnaa hasaanne» hiyye.

42 Yessuusinna, «Afi amana atixxi atee fayyisse'eni» hiyye. 43 Manjichchikinna hiribange'n afa dande'e; Magenokanna ulfeessa'ni Yessuussi'i hordofe. Ardi duuchchi tennee uudaa wodda Mageno galateeffate.