1 Xibariyoosi Qeesaar moyeexxe tommenna ondixxe wogga'n Phanxiyoosi Philaaxoosi Yihudaa galchamma wodda, Heeroodisi Geliilaxxe sholgaxxe kutake galchallomman, iittanni dayyi isik Filiphphoosi Ixuriyaasikenna Xirakondoosixxe sholgaxxe kutake galchallo, Lisaaniyoosinna Abileenixxe sholgaxxe kutake galchallo kade'emma wodda, 2 Haannanna Qeyyaafa umo qeese kandeexxi he'nee'naa Mageniink hiyyichchi qiilla gammoojje giddo Zakkaariyaasika belto Yohaannisi'n dage. 3 Yohaanisinna ke'eexxi Yordanoosike qarqarike boguwwi duuchchibaa mara'n, cubbotixxe gattowwaali'a aadde aagatixxa xamaqa lallabe. 4 Tinninna wabeeki Issaayaasi ifike Maxaafa'n hiyya'n borreeseema qici

«Kunse qiilla gamoojje giddo raaraamake manjichchik hafuur;

‹Goottakee ora qixxeesse!

ookkonee hodhdhichchanna isi'a toggi asse.

5 Dhooqa duuchchinna wo'mitowwaal;

Koobatinna tullichchi duuchchinna dirree kadowwaal.

Midaamiddichchi oruwwi toggi hiyyowwaal;

bobboqichchi hodhdhichchuwwinna ca'a hiyyowwaal.

6 Manjiinxi sanne duuchchinna

anjira Mageniinxa uuddaan.› »✝

7 Yohaannisinna xammaqemo'a isibaa dagaammakaara, «Ha'no dhudhdhuufiinxi oose, dagga'neexxe mufenaa'n baajjino'a ayyete ha'noo xexxe'achchiise?✝ 8 Yoona, aadde aggaa leellishshaaxxa huje hujje malee ha'noo ifi'a ‹Abirihaami anna no'oka anfeennen› hiyyate'n kexxinoqqe'e, tennee kinonaa'n Magen Abirihaami'a oose ke'issa dande'aaxxa ha'no'n kulaannen.✝ 9 Ta'a qoce haqichchuwwii hunda hexxeen; eloxxa gumma gummisabaak haqichchi duuchchinna woxemeexxi giirate'n hunemaan.»✝

10 Ardikinna «No'ota maachcho assinanno?» hiyye isoo qore. 11 Isinna insa'ne'n, «Lame seemma afeek, afebaakee qoodowwaal; itaachcho afeekinna afebaake iittanni assowwaal» hiyye hiisse haaso'e.

12 Qaraxa bukkassammakiirinna xammaqemo'a isibaa dageexxi, «Barachchiisallo no'ota maachcho assinanno?» hiyye isoo qore.✝

13 Isinna insa'ne'n, «Ajajendineemma qicinaa'n lebbine qaraxxinoqqe'e» hiyye. 14 Loliink manninna, «No'ota maachcho assinanno? Hiyyeexxi isoo qore. Isinna ayyika maallaqanna hunnat adhdhitinoqqe'e; dharikinna manjo ku'ltinoqe'e; ha'noonge rundinninni hedhdhe.»

15 Ardi duuchchi halchati heqqedha'n, «Kunni dedha Kiristoosite kaduu?» hiyya'n Yohaannisixxee qalbe giddo heda'emman. 16 Yohaannisinna hiisseexxi insa'ne'n hiyye haaso'ee qici, «Ani ha'noo woddi'ik xammaqaanen; yaane kinni anenaa'n sa'aak dagaak isi ani isixxe kopheka usurra midde tikatee geyabe'noken. Isi ha'noo Woyyichchi Hafuurinninna giirat xammaqaan. 17 Isi ifixxe aldumme'n midha huurakenaa'n qulleesso'a ifika qulleessatika mi'a anga afe'een; huura kinni xoxxabaaxxe giira'n gubaan.»

18 Yohaannisinna wele heddo gorsiinke haaso'inni arda gorsa'n eloxxa odo insa'ne'n lallabe.

19 Yaane kinni sholgaxxe kutak galchalli, Galiilak Heeroodisi ifike dayyixxa are, Heerodiyaadaxxeenna wele hujemmaxxe elobaaxxe hujexxee Yohaannisi isoo xixee wodda, 20 Heroodis tennee wele duuchcha'n lebeexxi Yohaannisii'i usurriinke mine'n usursiise.✝

21 Ardi duuchchi xammaqemeechchi uduma Yessuusinna cuupheme. Soodata'nenge'n iima bannendee'naa: 22 Woyyichchi Hafuuri guugenjotixxe fakkenni isi hana dirre; Iimi'ninna «Eeyyaanneki anki belt ateten; ate'n Ani gammadeenne» hiyaak hafuuri laqeme.✝

23 Yessuusi barsiisa safaa wodda isixxi wogga sase tommeba'atemma. Ardakee Yessuusi Yooseefike belto labe'emman.

Yooseefinna Eelike 24 Eeli Maatike, Maatii Leewwike, Leewwii Milkike, Milkii Yoonake, Yoonaa Yooseefike,

25 Yooseefii Maataatiyuke, Maataatiyuu Amootsike, Amootsii Nahoomike, Nahoomii Esiliimike,

Esiliimi Naaggeke, 26 Naaggee Ma'aatike,

Ma'aatii Maataatiyuke, Maataatiyuu Semeyike,

Semeyii Yooseefike, Yooseefii Yoodake,

27 Yoodaa Yoonaanike, Yoonaanii Reesike

Reesii Zerubaabeelike Zerbubaabeelii Selatiyaalike, Selatiyaalii Neerike, 28 Neerii Milkike, Milkii Haadike, Haadii Qoosaamike, Qoosaamii Elmodaamike, Elmodaamii Eerike

29 Eerii Yoosee'ike, Yoosee'ii Eli'ezaarike, Eli'ezaarii Yoraamike, Yoraamii Maaxaatike, Maaxaatii Leewwike,

30 Lewwi Simi'oonike, Simi'ooni Yihudake, Yihuda Yooseefike, Yooseefi Yonaanike, Yonaani Eliyaqeemike,

31 Elyaqeemi Meliyake, Meliyaa Mayinaanike, Mayinaanii Maxaatike, Maxaatii Naataanike,

Naataanii Daawwitike, 32 Daawwitii Isseyike, Isseyii Iyyobeedike,

Iyyobeedii Bo'eezike, Bo'eezii Selmoonike,

Selmoonii Na'asoonike,

33 Na'asoonii Aminadaabike,

Aminadaabii Raamike,

Raamii Aariinike,

Aariinii Hetseroonike, Hetseroonii Faaresike,

Faaresii Yihudake.

34 Yihuda Ya'iqoobike Ya'iqoobi Yisaaqike,

Yisaaqi Abirihaamike,

Abirihaami Taarake,

Taaraa Naakoorike,

35 Naakoorii Seeruugike,

Seeruugii Raagaawuke.

Raagaawu Faaleeqike,

Faaleeqii Ebeerike, Ebeerii Sheelaahike,

36 Sheelaahii Qayinike Qayinii Arfakisiidike,

Arfakisiidii Semike, Semii Nohike, Nohii Laamehike;

37 Laameehii Matusaalake,

Matusaalaa Henookike Henook Yareedike Yareedii Melali'eelike,

Melali'eelii Qayinaanike, 38 Qayinaani Henoosike,

Henoosii Seetike, Seetii Addaamike,

Addaami Mageniinke.