1 Edike Sanbatixxa barra Yessuusi dinneetike fichchi giddi'n sa'a'nemman; hordofeeyye isixxinna dinneetike tishshika umo kukkutteexxi angate'n qushshexxa'n itta'nemman. 2 Feerisitotenaa'n mitti mitti manni, «Edike Sanbatixxa barra'n assendo'a eeti uwwendebaaxxa yaane mayee assina'ne?» hiyye.

3 Yessuusinna insa'nen hiyyeexxi hiisse haaso'ee qici, «Isinna isinni welt hedhemmak manni solo'wee wodda Daawwiti asseexxa haranga haasoossa gophphine'eta? 4 Isi Mageniinke mine'n e'yeexxi qeesole malee'e weli mittikinna itabaashsha seerik hoyyemeeka tolchaiinka buddeena aadheexxi ite; isinni hedhemmake manni'anna uwwe» 5 Yessuussinna lebeexxi, «Manjiink Belti Edike Sanbatike Goottan» hiyye.

6 Wele Edike Sanbatixxa barra'n Yessuussi Ayihudinke magenofachchotike mini giddo e'yeexxi barsiisa'nemman; ookkoonna middixxi anga isixxi goge'eek mitti manjichchi hedhemman. 7 Feerisitotinna Muuseke seerik barachchiisalluwwi Yessuussi ku'latee buuto haseexxi, isi Edike Sanbatixxe barra'n fayyisaaxxa afatee iso'o heqina'emman. 8 Yessuussi kinni yaada insa'neeka ege'neexxi ookkone anga naafa manjichcho, «Kexxeteexxi oddo giddo uurri» hiyye. Manjichchikinna ke'e uurre.

9 Eetene yanna Yessuusinna insa'nee, «Ani ha'no'o qoro, Edike Sanbatixxe barra'n eeti uwwendeexxi eloxxa assateemoo? Yookaan elobaaxxa hujateete? Yookaan lubbo fayyisate mo'o yookaan lubbo shiyateete?» hiyye.

10 Yessuussinna dowwe ifixxe duuchcha'n hedheeka manna uudeechchi uduma ookkone anga naafa manjichcho, «Anga atixxa diriirsi» hiyye. Manjichchikinna anga ifixxa hiyyendeemmashshanni asse; anga isixxinna haranga fayyaxxe kadde. 11 Insa'ne kinni lumooshsha mufanteexxi Yessuusi'n maa assinaaxxa welt mari'aante.

12 Eettene barruwwa giddii'n mitte barra Yessuussi soodachchotee kooba qabate; hashsha duuchchanna Mageno soodata'n gale. 13 Bogi soode woddanna hordofeeyye ifixxa ifibaa ye'e; insa'ne giddii'n tommenna lame file; insa'neenna «Hordofeeyye» hiyye suumma fulche 14 Insa'nenna Pheexiroosite hiyye summa fulcheeke Simi'ooni, dayyi isik Indiryaasi, Ya'iqoobi, Yohaannisi, Filiphphoosi, Bertelomewoosi, 15 Maatoosi, Toomaasi, Ilfiyoosik belti Ya'iqoobinna, «Hinaatichchake» hiyyeme ye'emeeke Simi'ooni, 16 Ya'iqoobik beti Yihudanna Yessuusii sa'isse uwweeke Asiqorootuke Yihuda.

17 Yessuusi koobatenaa'ni dirreexxi heddo ifixxe ergameeyyen welti diidake'n uurre; isixxe hordofeeyye giddii'n heddi manni ookko hedhemman; iittanni weli heddi ardinna ookko hedhemman; insa'nenna dangeek Yihudake boginaa'n, Iyyerusaalemike qachchanaa'n, abbaayyati qarqara hedheeke Xiroosikenna Sidoonake qachchuwwi giddii'n dageeke lumoshsha heddi manni ookko hedhemman. 18 Insa'nenna dangeek hiyyaaxxa lanqo'anna ififixxe dhibenaa'n fayino'atemman; fuggichchi haafuuruwwinni rakkatammakriinna dageexxi faya'neman. 19 Hunna isonaa'n fulda'n duuchchinga fayyissaammaxxe'e ardi duuchchi isoo kiso'a halcha'emman.

20 Yessuusinna ifixxe hordofeeyyebaa uuda'n hiyyee qici:

«Mageniinxi mootummanna ha'nooxxe kaddemmaxxe

Ha'no hiyyeeyye eebbisendineeken.

21 Ha'noo ta'a solo'w'tina'neek

uduma godditinammaxxee eebbisendine'eeken

Ha'noo ta'a ooxxina'neek

uduma oso'litinammaxxee eebbisendine'eeken

22 Manni ha'noo Manjiinke Beltixxee hiyyeexxi jibbaa wodda

ha'noo fooya woddanna ha'noo'n gacifata wodda,

ha'noo gibeexxi fuggoka summanna ha'no'a uwwa wodda, ha'noo eebbisendineeken.

23 «Kunse hiri ha'nook iimate'n lumooke kadeemmaxxe eettene barra gammadde; fananaqqe; ha'nooka edika annuwwa'ninna wabeeko'n iitta hexxeenxe fuggo assine'emman.

24 «Ha'noo kinni dureeyye ta'a danqasha galdinaachcho alfitineemmaxxe'e

ha'no'aa aanne'e.

25 Ha'noo ta'aa goditineeke dokko solo'witinammaxxe

ha'no'aa aanne'e.

Ha'noo ta'aa osoldina'neek dokko yaaddinammaxxeenna ooxxinammaxxe

ha'no'aa aanne.

26 Manni duuchchi ha'nooxxee elle

haaso'aa wodda ha'no'aa aanne'e;

ha'nook edik annuwwinna dhariyye

wabeekoxxee iittanni eloxxa haaso'emman.

27 «Yaane kinni ha'noo anenaa'n laqina'neekeri'a: naapha ha'nooka eeyye; ha'noo gibaake elooxxa asse. 28 Ha'noo badinaakaara eebbisse; ha'noo miidhaakeeri'anna soodatte. 29 Atixxa mitte boqo dhabanaasakee langaxxaa boqonna isi'a wirri assi. Dudda atika adhdhaake gonfa atikanna isi'a lebbe uwwi. 30 Kadhataake duuchchi'a uwwi; karra atixxa adhdhaak ati'a hiisso'aa mee isoo laqi. 31 Manji ha'no'aa asso'aa hassinaaxxa duuchcha ha'nonna iittanni welekee asse.

32 «Ha'noo eeyyaakaara eetinoole maa hira affine? Cubbaaleeyyetinna midde insa'ne eeyyaange eettaan. 33 Ha'no'aa eloxxa asseekiiri'a eloxxa assitinoole maa hira affina? Cubbaaleeyyetinna midde tennende assitaan. 34 Liqa no'aa hiissinaan hitine heddinaake manni'aa liqeessitnoole maa hira affinaa? Ookkone liqeessiteemanga wirri assinee adhdhatee cubbaleeyye midde cubbaaleyyetee liqeessitaan. 35 Ha'noo kinni naaphaa ha'nooka eeyye; elloxxanna insa'ne'aa asse; no'aa hiissaan hitine addattinebaang liqeesse; tennee assitinoole hiri ha'nook iimate'n lumoke kadaan; Lumoke Magenixxe oosenna hiyyendinaan; tinninna kaddaachchi isi galata afebaakeeri'anna fuggaaleeyyetee arjake kadeemmaxxeeten. 36 Ha'nook Anni mararalloke kademmashshanni ha'noonna marartinaake kadde.

37 «Murtinoqqe; ha'noo'n murendabaan; wele mannanna tuffatinoqqe ha'noonna tuffatendinabaan; welekee gattowwaali hiyye; ha'no'aanna gattowwaal hiyyendinaan. 38 Uwwe ha'no'aa uwwendaan; safartinaake saffaranjo'n iittanni ha'no'aa saffarendaan. Iittanni eloke saffaranjo'ni ranbe sonqee'naa dunemaa qico'ni tullubemeeke eloke saffaranjo'ni ha'no'aa uwwendaan.»

39 Higgeene Yessuussi konne mammaassa hiyya'n insa'ne'n kulee qici, «Balla'i balla'a akeeka dande'aata? Lamiing weli adhdhe balete'n e'yabaata? 40 Baratalli barachchiisallokenaa'n sa'abaa; yaane kinni geltaa qico barateek ifinge barachchiisallishsha kada.

41 «Atike dayyixxe illee'n hedheeka huura mayee uuddatota? Atixxe ille'n hedheeka jirma mayee uudda gophphato? 42 Atixxe ille'n hedheeka jirma affeboxxok atika dayyo ‹Anke dayyoo atixxe ille'n hedheeke huriinxa buko hitta ati'a fulcho?› hiyya dandeettatto? Koo ati ifi uggudhalli edissettexxi illee atixxenaa'ni jirma fulchedhi; ookkonneechchi uduma atike dayyixxe ille'n hexxeexxa huuriinxa buko ca'a asitee afa dandeettatton.

43 «Elok haqichchi elobaaxxa gumma gummisaba'a; ittani elobaaki haqichchinna eloxxa gumma gummisaba'a. 44 Haqichchi duuchchi gumma ifixxenni ege'nemaan. Qosorrotenaa'n odi'iinxa gumma qoncaba'a; iittanni hokokkot haqichonaa'ninna woyyinetixxa gumma qoncabaan. 45 Elok manji qalbe ifixxe'n wo'miteexxe eloxxe yaanenaa'n fulchedhaan; elobaak manjinna qalbe ifixxe'n womiteexxe fuggoxxe yaanenaa'n fulchedhaan. Manji qalbe ifixxe'n wo'mite danbalaateexxe yaane afo'o ifikenni haaso'aan.

46 «Ani hiyya'ennexxa assitina'nebaan, mayyeeta ane'e ‹Gootta anke Gootta anke› hitina? 47 Aniba'a dagaakinna hiyyichcho anka laqeexxi assaak ayyee fakkaataaxxa ha'no'n leellishaannen. 48 Isi mine ijaaro'aa giisse'e butti'a umeexxi hundixxe jabaxxe rassa hana miniinxa booso ijaaraake manjichcho fakaataan. Lola'ikinna dageexxi mine ookonne'e dhibee; yaane kinni jabaxxe booso hana ijaarememmaxxe iso'o lele'misa dande'ebaan. 49 Yaane kinni hiyyichcho anka laqeexxi iso'ni ajajemabaak buttina duwwike'ni hana keffi asseexxi mine ijaareke manjo fakaataan; ookko'ni lola'ikinna dageexxi mine ookkone'e dhiibe hirbange'ni mittenba fottoqeexxi ibe.»