1 Yessuussi tennee yaane duuchcha ardake'n haaso'e bireechchi uduma Qifirnahoomi'a me'e. 2 Ookkoonna mitte dhibbiink ajajalli hedhemmaan; yo'oshsha eeyyaak isik erganjinna dhibemeexxi reyo shiqe'emmaa. 3 Iikki dhibbiink ajajallinna odo Yessuusixxa laqeexxi erganjo ifika isi'aa dagee fayyiso'aa isoo kadhato'aa mitte mitte Ayihudiinxa geedhe Yessuusibaa erge. 4 Insa'nenna Yessuusibaa marreexxi «Konne majichchi'a tennee assiyyo hasissaake manjon; 5 isi arda no'oka eeyyaaken; magenoonfachchotika minenna no'o'a ijaareedheen» hina'ne jabaa qicinni isoo kadhante.

6 Yessuusinna ke'eexxi insa'nenni welti me'e.

Isike minibaa shiqee wodda iikki dhibbiink ajajallinna ifika erganjuwwa Yessuusi'ni hiyya'ni ergee qici, «Anke Gootta ati anke mine'ni e'yatee ani geyennekebaan mee elo'i. 7 Aninna umo aningenninni atibaa dagiyyote'e geyeenneke manjobaan. Yaane kinn mitte hiyyichcho calla hiyyi, erganji anki fayyaan. 8 Aninna umo angeninni baalloomik ani'a iima hedheekee ajajemaanneke manjon. Aninna ani'a hunda ajajemaake loliinke manna afeenne; mitte ‹Me'i› hiyyonnole me'a; welekanna ‹Amo› hiyyonnole daga; anka erganjonna ‹Tenne huji› hiyyonnole huja.»

9 Yessuusinna tenne laqeexxi saade; udumi'anna wirri hiyyeexxi iso hordofammake arda'ni, «Iitta hexxeexxa lumooxxa amanna Isira'eeli giddo midde hara afe ege'nebe'non» hiyye. 10 Ergeme'emmak manninna ookkone dhibbiinke ajajallibaa illee iima hige dagee wodda erganji iikki fayyeena anfe.

11 Ookkonneechchi uduma Yessuusi Nayin hiyyemaake qachchibaa mare; hordofeeyye isixxinna heddi ardinna isinni welti me'e. 12 Yessuusinna ookkone qachchixxe hula bira geyaa wodda manni reyeeke manjika rensha dukeexxi qachchi giddii'n fula'emma; iikki reyeek manjinna amatee mitte beltomman; ama isixxinna aro'o shiwiteexxe hiyyeettemmaa; isenninna welti heddi manninna hedhemman. 13 Goottikinna ise'e uude wodda ise'a marareexxi ise'e «Mee oodh!» hiyye.

14 Yessuusinna shiqeexxi eettene renshiixxa rare angati tuqe; rare dukeemmak manninna uurre; Yessuusinna, «Koo dargaggeessa atee ke'i hiyya'ennen» hiyye. 15 Reyemmaakinna qophphiyye ke'e ofo'leexxi haaso'atte'ni ke'e; Yessuusinna ama isixxe'ni isoo uwwe.

16 Duuchchiing alayyik wexeqemmeexxi Mageno saada'ni, «Lumok wabeek no'oxxe oddo'n ke'edheeni; Magenikinna arda ifika gargaaro'a dage'en» hine. 17 Yessuusixxi odonna Yihudake boga duuchcha'ninna qarqarake'ni hedheeke boga duuchcha'ni gelte.

18 Yohaanisixxe hordofeeyye tennee kaddeexxa yaane duuchcha Yohaannisi'n kulle; Yohaanisinna insa'ne giddii'n lame ifibaa ye'eexxi, 19 «Iikki daga'neen hiyyenda'attak atetemo yookaan weleke heqe'nanno?» hitineexxi iso'o qorre hiyya'n Gootta Yessuusibaa erge.

20 Iikki manninna Yessuusibaa mareexxi, « ‹Iikki dagaan hiyyendaattak atetemo yookaan wele heqe'nanno?› hitineexxi iso'o qorre hiyya'n atiba Yohaannisi no'oo ergeen» hiyye.

21 Eettene yanna'ninni Yessuusi heddo manna gargar gargar hedheek dhukkubanaa'ni, dhibonaa'ninna fuggichchi hafuuruwwinaa'n fayyise; heddo ballauwwixxa illenna baqqi asse. 22 Yessuusinna ookkone ergemeexxi dagemmake manna'ni hiyyeexxi hiisse haaso'ee qici, «Martineexxi laqqineexxanna uuddineexxa Yohaannisi'n, ballaa'i afaan, naafuwwikinna me'aa'ni, soomuwwi fayye ca'a hiyyaan, mansha duudeekiir laqaan, reyeekirinna ke'aan; hiyyeeyyeeteenna wengeele lallabendaa'ni.✝ 23 Ane'ninna guggufatabaak isi eebbisemeeken.»

24 Yohaanis ergemmak manni me'eechchi uduma Yessuusi Yohaannisixxee ardake'ni hiyya'ni haaso'ee qici: «Maa uuddino'a qiilla gammoojje giddi'a martine? Diidallo lelle'misaake shonbooqo? 25 Yookaan maa uuddino'a martine? Dancha seemma odo'weeka manjo uuddino'aan? Dancha seemma oddo'waakiirinna danqashaa galaakiir mootomatike mi'ne'nten hedheek. 26 Maachchota uuddino'a martine? Wabeeka? Eetti, ani ha'no'n kulo, wabeeka sa'aaka uudateeten. 27 Tinni isixxee

« ‹Kunse ati edo me'aani ora ati'a

qixxeessaaka anka eranjo ergannon› hiyyende borreesendeek isoten.✝

28 Ani ha'no'n kulo melaalletenaa'n ilemeekeerinaa'n Yohaannisii'i sa'aak ayyinna hedhebaa; yaane kinni Mageniinxe mootumma'n duuchchiingenaa'n heeno'maak isinaa'n sa'aan.»

29 Qaraxa bukki assammaakiir midde gatebaak koonne Yessuusika haaso'a laqeek ardi duuchchi Yohaannisixxe anga'n xammaqemat Mageniinxa dhugaalessumma kokeesse.✝ 30 Feerisitotinna Muuseke seerixxi beettuwwa kinni Yohaanisixxe anga'n xammaqema gophat Mageni insa'ne'a afeeka yaada ginbe.

31 «Yoona, konne barika manna mayik fakkeessanno? Insa'neta maachcho fakkaanta? 32 Dikko giddo ofoldeexxi weli yexxa'n

« ‹Suusu'le ha'no'a ufuunfennen

ha'no kinni sirbitineba'a;

Wi'lishsha ha'no'a wi'lishinenne

ha'no kinni ooxxineba'a› hitaaxxe oose fakkaantaan.

33 Iittani xammaqalli Yohaannisi itebaakinna woyinetixxa booka ha'webaak dagee wodda, ‹Iso'n duriisake hedheen› hitine. 34 Manjiink Belti kinni ita'n ha'wa'n dagee woddi isoo, ‹Itallokenna ha'walloke; qaraxa bukki assamake mannikenna «cubbaaleeyyetike» jaalon› hitineen. 35 Yaane kinni beekkumiinxi dhugaaleessumma oose ifixxe'ni kokeessende.»

36 Ookkoneechchi uduma Feerisitotenaa'n mitti isinni welti ita ito'a Yessuusii'i ye'e. Yessuusinna ookkone Feersichchi mine'n e'yeexxi ito'a ofo'le. 37 Ookkone qachcha'n mitte cubbaaleette manjichcho hexxemman; isenna Yessuusi Feerisichchiinke mine'n ita ito'a offo'leexxa laqqee wodda Albasixxiroosixxe bilqaaxxe'n wo'ma shitto aaxxe dagge.

38 Yessuusi udumi darreenna lekka isixxi bira uurrite ooxxa'n lekka isixxa indiiddot shanshita'n, ifike umike oridichchinninna fiyate'n kexxe; lekka isixxanna sunqexxa'n shittotanna itti issite.✝

39 Yessuusii'i ye'emmak iikki Feerisichchi tennee uudee wodda ifike godobi iddo, «Kunni manjichchi wabeekake kade'eele tinni manjichcho ayyete kaddeexxanna hitta hexxeexxe cubbaalleette kaddeexxa ege'namman» hiyya'n hede. 40 Yessuusinna iso'n hiyye hisse haaso'ee qici, «Koo Simi'ooni ate'n kulaannechcho hedheeni» hiyye.

Isinna «Barachchiisallo ane'n kuldaata» hiyye.

41 «Mitte liqeessallonaa'n liqe'effate'emmak lami manni hedhemman. Mitteke'n onde dhibba dinaare, mitteke'ninna onde tomme dinaare hexxemman. 42 Liqeeffateek lamiing manni liqa hissa gonphee wodda liqeessalli insa'nee lamiingee waale. Yoona konne lamenaa'n ookkone liqeessallo caala eeyyaak honte?»

43 Simi'ooninna, «Ani'a jirak liqi isi'a waalemeeke laba» hiyya'n hiisse haaso'e.

Yessuusinna Simoonii'i «Hissitette qici dhugaate» hiyye.

44 Yessuusinna eettene manjichchobaa wirri hiyyeexxi Simi'oonii'i, «Tennee manjichcho uudda'inn hexxebexxo? Ani mine atike'n e'yennen; ati lekka anxee midde wode'e uutebexxo; ise kinni lekka anxa indiddo ifixxen shanshita'n ifike umike ordichchinni filte. 45 Ati anee sunqexxebexxo; ise kinni e'yennexxe yannanaa'n lekka anxa sunqecca uurrisseba'a. 46 Ati umo anke'n zayite issitebexxo; ise kinni shitto lekka anxe'n issite. 47 Tennexxee, ani ate'n kulo ise lumoo qica eettemmaxxee isexxe heddo cubbo ise'a gattowwaal hiyyende'een. Cubbo isixxe shiixxo qica gattowwaal hiyyendeek kinni eeyyaak shiixo qicon» hiyye.

48 Yessuusinna eettene manjichcho, «Cubbo atixxi gatowwaal hiyyende'een» hiyye.

49 Isinni welt ito'a ofo'lemmak manni duuchchinna, «Cubbo midde gattowwaal hiyyaak isi kunni ayyete?» hiyya'n qalbe giddo hedate'n ke'e. 50 Yessuusinna eettene manjichcho, «Amana atixxi atee anjirte'een, nage'ik me'i» hiyye.