Mateus 8

Dhibba Lolinka Manna Akeekammake Manjichchixxa Amana

5 Yessuusi Qifirnahoomike qachcha’n e’yee wodda mitti Roomik dhibba loliinke mannik ajajalli isiba dageexxi, 6 «Gootta erganji anki naafee shiilexxi mine diipheen» hiyye kadhate.

7 Yessuusinna iso’n, «Ani dage iso’o fayyisannon» hiyye. 8 Dhibba lolinka manna ajajammaki kinni Yessuusi’i «Goottaa, anke mine’ni e’yitota’a ani geyeennekebaan. Yaane kinn mitte hiyyichcho calla haaso’i! Erganji ankinna fayya fayyaan hiyye hisse haaso’e. 9 Lebeexxi, aninna baalloomiinke weli manni hunda ajajemaanneken; higgeen ani’a ajajema’neeka lolinka mannanna afeennen. Mitte ‹Me’i!› hiyyonnole me’aan; welekanna ‹Amo!› hiyyoonnole dagaan. Anka erganjonna ‹Konneechcho huji!› hiyyoonnole hujaan» hiyye.

10 Yessuusi konne’e haaso’a laqe wodda, mambe’a hiyyeexxi isoo hordofammake manna’ni hiyyee qici, «Dhugaate ha’no’n haaso’aannenni, iita hexxeexxa lumoxxa amana afeeka mitte manjo midde Isira’eeli giddo afeebe’no. 11 Tennee kassi hiyye! Heddi manni borotenaa’ninna dhidhimakenaa’n dagaan. Abirihaaminni, Yisaaqinninna Ya’iqoobinni welti mootumma iimixxe’n itatee ofo’laan.✝8:11 13:29. 12 Iimixxi mootumma alfan hiyyeme hedememmak manni kinn dukkanati giddo gadhi’a huinemaan. Ookko’o oodhishshatenna isso qarate kaddaan.»

13 Yessuusinna ookkonee dhibba lolinka manna ajajammaka «Amana atixishsha ati’a kadduun; missiyyi!» hiyye. Erganji isikinna eettene yanna’inni fayye.