1 Mitte yanna Yessuusi mitte booncho'n soodata'nemmani; soodachcho bireechchinni uduma hordofeeyye isixxi giddii'ni mitti iso'o, «Gootta! Yohaannisi hordofeeyye ifixxa soodachcho barachchiissemmashsha no'onna soodachcho barsiisi!» hiyye. 2 Yessuussinna insa'nee, «Soodattinaa wodda hittina'ni soodattinaa qici

« ‹(Iima hexxetteke no'oke anna)* no'oke!

Summi atik woyyoomowwaal.

Mootumma atixxi daggowwaali!

3 Barratixxa ita barra barra'ninni no'aa uwwi.

4 No'o balleessemmakeri'a gattowwaal hinannashshan,

balleessa no'oxxa no'aa gattowwaal hiyyi.

Fuggoxxenaa'n no'o ba'ati malee'e;* hega uudematiba'anna no'o mee e'ishi.› »

5 Lebexxi Yessuussinna hordofeeyye ifixxe'e hiyyee qici, «Ha'noo giddii'ni jaalo afe'ek mitti wodhakka isiba mareexxi, ‹Koo anke jaalo! Sase buddeena ani'a liqeessi! 6 Miti ank jaal orii'n ane'n dagee'na'a isi'a shiqishannoxxa mitte itanna afe'ebe'non hiyyeexxi iso'o kadhatoole.›

7 «Iikkinna mini giddii'ni iso'n, ‹Ane'e rakkissooxxe! Hula danqarende'en; oose anxinna aninni welti dhiphpheen; tennexxe'e ke'ennexxi ati'a uwwa dande'abo'non› hiyyaata? 8 Ha'no'ni kulo ifike jaalo kadeemmaxxeenna uwwa gophoole midde iso'o ko'wisemmaxxe calli'a hasaaxxa isi'a uwwaan.

9 «Tennexxe ani ha'noo'ni hiyyanee qici: kadhate ha'no'a uwwendaani; halse, alfitinaani; hulatanna gangaanne ha'no'aa banendaan. 10 Tinni kaddeechchi kadhataak duuchchi adhdhaan; halsaaki duuchchinna alfaan, hula ganganaakeenna isi'a banenda.

11 «Ha'noo giddii'n annake kadeek belti ifik (Daabo kadhatoole kinjo uwwaak ayyete?)* qulxu'me kadhatoole, bofa isi'a uwwaaki hedheeta? 12 Yookaan qulxu'me kadhatoole is'a gaaddo uwwaata? 13 Ha'noo fuggaaleryyende kaddineen hexxineexxi oose ha'nooxxe eloxxa uwwa, uwwa egendinoole iimate'n hedheek ha'nook anni isoo kadhataakeeri'a hittatta Woyyichcha Hafuura caala bira sa'isseexxi uwwa gopha?»

14 Mitti barra Yessuussi afo'o duudeeka fuggichcha hafuura fulcha'nemmani; fuggichcha hafuuranna fuleechchi uduma iikki afo'o duudeemak manjichchi haaso'e; mannikinna mambe'a hiyye. 15 Mitti mitti manni kinni, «Fugguchchi hafuurike umo kade'eeke Bi'eelzebuulinni fuggichcha hafuura fulcha'neen» hine.✝ 16 Weli kinni iso'o hega uudo'a iimatenaa'n beessisa insa'ne'n leellisho'a isonaa'n hansa'emman.✝ 17 Yessuussi kinni heduma insa'neeka ege'neexxi insa'nee hiyyee qici, «Weli weli qoodendaaxxi mootuma baxxaan; iittanni mitti mini hadi wel welinaa'n gargar higoole ibaan. 18 Seexanikinna weli welinaa'n gargar higoole mootumma isixxi hitta uurritata? Ha'noo kinni anee, ‹Isi Fuggichcha hafuura Bi'eelzebuulixxe hunnan fulcha'neen› hitina'neeni. 19 Yoona ani fuggichcha hafuura Bi'eelzebuulixxe hunnan fulcha'ennelchinni oose ha'nooxxita ayyixxe hunnanita konnee fuggichcha hafuura fulchita'ne? Tennexxe oose ha'nonxi ha'noo'n murtaan. 20 Ani kinni fuggichcha hafuura fulcha'ennek Mageniinxe hunnanni kaddeechchinni Mageniinxi mootumma ha'noobaa daggeexxa ege'ne.

21 «Worbi manjichchi hasisaa qico'n loliinka miya ka'le'e mine ifika heqqedhoole karra isixxi nage'ik hexxani. 22 Yaane kinni isi irra caala worbi manjichchi dageexxi isoo lole injifatoole isi addate'emmaka ookkoone loliinka miya isonaa'n adhdhaan; karra isixxa duuchchanna adheexxi welekee qoodaan. 23 Aninni welti hedhebaaki anee gareera; aninni welti bukki assedhabaakinna xeeraake.✝

24 «Fuggichchi hafuur manjokenaa'ni fulaaxxa yanna hafuura adhdhatika hasto wodi'i hedheebaake booncho'n dowaan; hafuura adhdhaaxxa bakkanna afa gophoole kinni ‹Fulenneke anke minibaa ilee iima higannon› hiyyaan. 25 Illee iima hige dagaa wodda mini iikkinna fiyemeexxi qixxeseemmena'a afaan. 26 Ookkonneechchi uduma mareexxi wele isi irra fuggataaka wele torbaane fuggichcha hafuuruwwa aadhe dagaan. Isi edo hedhemmake mine'ninna e'yineexxi ookko he'naan; ookkone majichchi'a edixxe isixxe jironaa'n udumixxi hara iso'n fuggatteexxe kaddaan.»

27 Yessuussi tennee haaso'ande'n hedhee'naan ardi giddii'ni mitte manjichcho hafuura gikki assiteexxi, «Ate'e ilde unuunsiteexxe amaxxa wodo» hite. 28 Yessuussi kinni hiisseexxi «Wodo, Mageniinka hiyyichcho laqeexxi ajajemmaakeerixxen» hiyye.

29 Heddi ardi bukki hiyye wodda Yessuussi «Tinni ila fuggoxxen; beessisa uuddo'a hassaan; yaane kinni wabeeka Yoonaasike beessis gadhi darre weli isi'a uwwemaba'a. 30 Tinni kaddeechchinna Yoonaasi Neneweke qachchike manni'a beessisake kademmashshanni Manjiinki Beltinna tenne ila'a beessisake kadaan.✝ 31 Bita'ixxi mootitte murtetixxa yanna tenne ilanni welti kexxeexxi insa'ne'ni murtaan; ise Solomoonika beekkuma laqatee buttatixxe gabalanaa'n daggeemmaxxee kunse Solomoonaa'ni sa'aak kaba hedheen.✝ 32 Neneweke qachchik manninna murtetixxe barra'ni tenne ilanni welt ke'eexxi tenne ila'ni muraan; Nenewek manni Yoonaasika lallaba laqeexxi cubbo ifixxee aadde aange'een; kunse Yoonaasinaa'n sa'aak kaba hedheen.

33 «Xassa xasseexxi sho'ondeexxe bakka'n yookaani qoreti hunda uggaak ayyinna hedhebaan; tenne irra e'yaak manni ifa uuddo'a xassemalchoke'n hana ugginaan. 34 Bisiink xassi Illeten; ille atixxi fayyaxxe kaddoole bisi atik duuchchi wa'a hiyyeeke kadaan. Ille atixxi fayya afa gophphoole bisi atik duuchchi dukkanate kadaan. 35 Tennexxe ati giddo hedheek ifi dukkanate kadabaashsha heqqedhi! 36 Yoona bisi atik duuchchi wa'a hiyyeeke kadoole; dukkanate kadeek bisi atik hedha gophoole xassi wa'a hiyye ifammashsha bisi atikinna ittanni wa'a hiyye ifaan.»

37 Yessuussi konne haaso'a bireeshshanni Feerisichchi mitti Yessuussi'i isinni welti ita ito'a ye'e; tennexxee ke'e mareexxi ito'a ofo'le. 38 Yessuussinna anga anshedhebanggi itaa'naa uude wodda Feerisichchi mambe'a hiyye.

39 Gootti Yessuussinna Ferisichcho, «Ha'no Feerisito! Kubbaayyinkanna qoreti gadhi darre ca'a assitinaan; ha'no'n giddo kinni saamikinna fuggoxxe wo'mite'eni. 40 Ha'no gowwoole! Gadhidarre dadeeki Mageni gidi ddarre dadagopheeta? 41 Yaane kinni giddo hedheechcho hiyyeeyyete'e uwwe! Ookkonneechchi uduma duuchchin gelchi ha'no'a luqqi hiyyaan.

42 «Feerisito ha'no'a aanne'e; bassibelotenaa'ni, sugettetenaa'ni, okoshetenaa'ninna iittanni wele shiixxaramma lataachchuwwanaa'n tommitte Magenoke'e uutinaan; kaddo malee dhugaa assanna Mageno eeyya ga'ma'mi hitinaan; yaane kinni eettene waaldinebaang tenneenna hassa ha'no hassissamman.

43 «Feerisito ha'no'a aanne'e; Muuseka seera barantammake mine'ni ulfinnika barcuma, dikko giddonna duuchchiing anga ha'no'aa ke'iso'aa eetinaan.

44 «Mann ege'nebaangi hana me'ammake mooggo fakkaattinammaxxe'e ha'no'a aanne'e!»

45 Muuse Seerinke muxxalluwwanaa'n mitti hiisseexxi Yessuussi'i, «Baarsiisanjo! Ati tenne'e haasoosattatto wodda no'oteqa yowwita'ette!» hiyye.

46 Yessuussi hiiseexxi, «Ha'no Muuseke seerik muxxalluwwi ha'no'a aanne'e! Manni ba'edha dande'abaaxxa ha'urto ba'o insa'ne'n ba'isinaan; ha'no umo ha'nooken kinni eettene ba'o qubichchi ha'nokenni midde tuqqinabaan.

47 «Ha'nooki annuwwi shiyemmaxxe wabeekoka moogguwwa danchoossitnnammaxxee ha'no'aa aanne'ee! 48 Yoona ha'noo, ha'nooke annuwwixxa huje kokeessitinaaxxe dhugaa kullan; insa'nee wabeeko shinne; ha'nonna mooggo insa'neeka giissitina. 49 Tennexxee Mageniinki beekkumi hiyyee qici, ‹Wabeekonna ergameeyye insa'ne'a ergannon; insa'ne mitte mitte shinnaan; welekanna shorrinshaani› hiyye. 50 Tennexxe tinni ila butta dadendeexxe yannaa'n dunendemmaxxe wabeeko duuchchixxe mundexxee qorendaaxxen. 51 Aabeelixxe mundenaa'n saffeexxi tolchimalchiinxe oddo'ninna woyyichcha galmixxe oddo'n dunedeemmaxxe Zakkaariyaasixxe mundexxee tinni ila qorendaan.

52 «Ha'noo Muuseke seerik muxxaluwwi ege'natixxa qulfe abixxitinemmaxxe'e ha'no'aa aanne'e; ha'noo umo ha'nookenni e'yitinaba'a; e'yammakaaranna hoyyitine'een.»

53 Yessuussi ookkoo'ni fulechi uduma Muuseke seerixxi barachchiisalluwwinna Feerisito fuggo iso'o gareerta'n heddo qortumuwwinni iso'o mekki assate'n kexxe. 54 Tenne assina'nemmachchinna isinge haaso'inninni iso'n yaane illo'atemman.