1 Ardikinna dowwe isixxe'n weli dhiiba'n isi barsiisaammaka Mageniinka hiyyichcho laqaama wodda Yessuusi Geensareexxixxe abbaayya bira uurreemman. 2 Eettene yanna lame hobolo abbaayyati qarqara uurrite'na'a afe; qulxu'me abidammak manni hobolo giddii'n fuleexxi marabe anshedha'emman. 3 Yessuusi eettene hoboluwwa giddii'n Simi'oonixxe hobolo kaddeexxi giddi'a e'ye; Simi'ooniinna, koo Simi'ooni! Tenne Hobolo shiixxo qico buttinakenaa'n abaayyatiba'a shikki assaashsha laqe. Ookkonneechchi uduma eettene hobolo giddo ofo'leexxxi arda barsiisa safe.✝

4 Haaso'a bireechchi uduma Simi'oonii'i, «Hobolo atixxa dhi'mote'n shikki assi; marabe ha'nooxxanna qulxu'me abidino'a darbe» hiyye.

5 Simi'ooninna «Barachchiisalloo, hashsha duuchcha eloonna'n gallennexxi mittelchonna abindebe'noni. Yaane kinni ati hitettexxe'e marabe darbina'ennen» hiyye.✝

6 Marabe darbinee wodda marabe insa'neexxi qurubbi qurubbi hutaa qico'n hara bira saxxeexxa qulxu'me abinde.✝ 7 Tennexxe wele hobolo'n hedheeki insa'neeki jaaluwwi dangeexxi insa'ne gargarro'a qinphe ye'ne; insa'nenna dangeexxi iitti lame hoboluwwa lixxa shiqa qico'n qulxumuwwa itti wonshine. 8 Simi'ooni Pheexiroosinna tennee uude wodda Yessuusi edo guluffateexxi, «Goottaa! Ani cubbaleessa manjo kadeennaxxe'e ani birii'n me'i» hiyye.

9 Tenne hiyyeechchi isinna isinni welti hedhemmak isiki jaaluwwi abindeexxe qulxu'mexxe bira sa'ne'n saandeemmaxxeeten. 10 Simi'oonike jaaluwwa kadde'exxi Zebidewoosixxi labbaxxi oose, Ya'iqoobinna Yohaannisi iittanni saande'emma.

Yessuusinna Simooni'i, «Mee sodaati; konneechchi edi'a manjo bukki assitattoke kaddaton» hiyye.

11 Insa'nenna hoboluwwa ifi ifixxa woddi'i qarqari'a shikki assineechchi uduma duuchchingechcho waalleexxi Yessuusi'i hordonfe.

12 Mitte barra Yessuusi qachcha mitte'n hedhe'naa soomi biso isika duuchcha bire'eek manjichchi Yessuusiba dage; isinna Yessuusi uudeexxi albik gonbisemeexxi, «Goottaa! Fedhi atixxe kaddoole anee fayyisa dandeettatton» hiyye isoo kadhate. 13 Yessuusinna anga ifixxa diriirseexxi ookkonee manjichcho qaqqabeexxi, «Eeyyannen fayyi!» hiyye; hirbange'n manjichchokenaa'n soomi ba'e. 14 Ookkonneechchi uduma Yessuusi ookkone manjichcho, «Tenne yaane mitte manjo'ninna kuldoxxe; yaane kinni martettexxi ifi qeesichchoke'n leellish; insa'ne'anna dhugaate kaddo'a atixxe fayya'a Muuse ajajemmashsha tolcha shiqishe.» ✝

15 Yaane kinni Yessuusixxe'e haaso'endeexxi odo caala boga duuchcha'n laqende. Heddi ardinna isonaa'n laqo'anna dhibo ifixxenaa'n fayyate'e isibaa daga'nemmani. 16 Yaane kinni isi yanna yanna'n qofibaa me'eexxi soodata'nemman.

17 Mitte barra Yessuusi barissiisa'neeke'n mitti mitti Feerisitotinna Muuseke seerik barachchiisalluwwi isi bira ofolleemman; insa'nenna Geliilakenna Yihudake qachcha duuchchanaa'n iittanni Iyyerusaalemike qachchanaa'n dageeke mannamman. Yessuusi dhibemeeka manna fayyisaashsha Goottiinxi hunna isinni welti hexxemman. 18 Eettene yanna manni gogeeka manjichcho rarete'n dukeexxi Yessuusi hedheeke mine'n iyyemareexxi iso'o isi edo ugo'a wo'laane. 19 Yaane kinni Manniinxe bira sa'nenaa'n kexxeexxa ookkonee gogeeka manjichcho mini'a e'yisha insa'nee rakkisse; tennexxe isoo heellichchoti iima iyyemareexxi heellichcho maanqeexxi rareendinn dirrinseexxi mannixxe oddo'n Yessuusi edo uggine. 20 Yessuusinna amana insa'neexxa uudeexxi ookkone gogeemmaka manjichcho «Koo manjichcho! Cubbo atixxi gattowwaali hiyyende'een» hiyye.

21 Feerisitotinna Muuseke seerik barsisalluwwi, «Isi kunni iitta hedheeka yowwichchiinka afo'o fulchedha'neek aate? Cubbotee gattowaali uwwa dande'aak Mageno malee weli aate?» hina'n hedate'n ke'ne. 22 Yessuusinna heduma insa'neeka ege'neexxi insa'ne hiyyee qici, «Mayee qalbe ha'nooxxe'n tenne hedina? 23 ‹Cubbo atixxi gattowwaali hiyyende'en› hiyyatenaa'inna, ‹Kexxettexxi me'i!› hiyyatenaa'n heente shollexxa? Hiyye. 24 Yaane kinni Manjiinki Belti buttate'n cubbotee gattowwaal uwwatika baallooma afeexxa ege'na ha'no hassisaan» hiyya'n ookkone gogeemmaka manjichcho, «Koo manjichcho, rare atixxa dulkite atike miniba'a me'i!» hiyye. 25 Iikki goge'emmak manjichchinna hirbange'n insa'ne edo ke'e uurreexxi itti hana diipheemmaxxa rare dulke, Mageno galateeffata'n ifike miniba'a me'e. 26 Duuchchiingi lumo qico masoten hiyyati sodaateexxi, «Telcho mambe'a yaane uundenne!» hiyye.

27 Ookkoneechchin uduma Yessuusi ookko'n fuleexxi me'a wodda Leewwi hiyyemaak qaraxa bukki assammak manjichchi qaraxi bukki assemammaxxe baka'n ofo'lee'naa'a afeexxi iso'o, «Ane'e hordof» hiyye. 28 Leewwinna ke'eexxi duuchchiingechcho waaleexxi Yessuusi'i hordofe.

29 Ookkonneechchi uduma Leewwinna mine ifike'n Yessuusi'a lumoxxa jila jile; insa'nen weli heddi qaraxxa bukkassammak manninna wel heddi manni eettene jilaxxa ita itate'n ofo'leemman. 30 Feerisitotinna insa'neek Muuseke seerik barachchiisalluwwi, «Ha'noo qaraxa bukki assammakeerinninna cubbaaleeyyeti itine ha'witinaachchi mayeete?» hina'n Yessuusixxa hordofeeyye aallante.✝

31 Yessuusinna insa'ne'ni hiisseexxi hiyye haaso'ee qici, «Ela gopheekeeri'aate malee fayyakeeri'a ci'leessi hasisabaani. 32 Ani dageennechchi cubbaaleeyye aadde aaggotee ye'ete malee qulliyye ye'onna'atebaan.»

33 Insa'nenna Yessuusii'i «Yohaannisixxi hordofeeyye ita ha'wabelo hossa'n soodattaan; Feerisitotinna iittanni assitaan; atixxi hordofeeyye kinni duuchchi wodda itta'n ha'witaachchi mayeete» hine qorre. 34 Yessuusinna hiisseexxi hiyye haaso'ee qici, «Waajubichchi insa'nen welti hedhe'na'a jaaluwwi isik agabo goddo hedhaashsha assa dandeessisaa? 35 Yaane kinni waajubichchi insa'nenaa'n adhdhemaaxxe yanna daggaan; ookkone wodda insa'ne agabo goddo honsaan.»

36 Yessuusinna lebeexxi mitte mammaassa insa'ne'n hiyya'n mammaakee qici, «Ayyinna haarooxxa seemma dareexxi dullatte seemma'n erbaak hedhebaa; iitta asseexxe kaddoole kinni isi haarooxxa seemma dara hassissa; haarroxxi erbenna dullatete seemmanni welt me'itabaan. 37 Itani ayyinna dullatte qalqallo'n reefixxa woyinetixxa booka uggaak hedhebaan; uggeexxe kaddoole kinn reefixxi woyinetixxi booka qalqallo eettene dartaan; iitti woyinetixxi bookanna dunendaan; qalqallotinna la'o belo gatta. 38 Reefixxa woyinetixxa booka kinni haarooxxe qalqallo'n uggemiyyo hassissa. 39 Turteexxa woyinetixxa booka ha'weechchi uduma reefixxa ha'wo'a hasaaki ayyinna hedheba'a; tinninna kaddaachchi ‹Turteexxa woyinetixxa booka woyyani› hiyyemmaxxeeten.»