1 No'oxxe oddo'n kaddeexxa yaane leellishshaaxxa jirte heddi manni dande'ee qico borreesseedheen. 2 Tennee yaane sireendenaa'n ille ifixxe'n uudeekiirinna ookkone hiyyichchike erganjuwwa kadeemmaakiir no'aa sa'isseexxen. 3 Koo ulfaatteetteke Tewofiloosii, aninna ani darree'n duuchchiinxa yaane ke'itokenaa'n kadda'n daggemmake ori qicinni xexxe'achchoti hubatenneechchi uduma hexxeeshshanni ati'a borreessa ane'n eloxxe labbee leellite. 4 Tenneenna assenneechchi iitti baratteettaxxi yaane dhugaate kaddeexxa egendotaa'ten.

5 Heerodisi Yihudake boga'n moyanjoke kadeemma wodda Abiya hiyyendaaxxe qeesummatixxe ergatensha giddii'n Zakkaariyaas hiyyemaake manjo hedhemman; are isixxi Elsabeexinna Aaroonike gosati minixxe manjomman.✝ 6 Insa'ne lamiing Goottiinka ajajuwwanna seeruwwa duuchcha heqqedhati mitte ci'ma belo Mageni edo qullummati he'naamman. 7 Yaane kinni Elsabeexi ila gophpheemmaxxe'e oose anfe'emmabaan; insa'ne lamiingi woggati lumme'neemman.

8 Barra mitte Zekkaariyaas qeesummatixxa ergatensha, ifixxe bado baro Mageni edo qeesummati ergatema'ammaxxa yanna 9 qeesummatixxe aadashsha Goottiinke Galmi giddo hixaana mare gubatee hixik fileme. 10 Hixaani gubema'ammaxxe yanna ardi duuchchi gadho hedheexxi soodata'emman.

11 Goottiink iimik erganjinna tolchimalchokenaa'n middi darre'ni uurreexxi iso'ni leelle. 12 Zakkaariyaasinna konnee iimika erganjo afee wodda sodaate alayye'e henkekki hiyye. 13 Iimik erganjinna iso'o hiyyee qici: «Koo Zakkaariyaas mee sodaat; soodachcho atixxi laqende'een. Are atixxi Elsabeexi labba belto ati'a ildaan; atinna summa isika Yohaannisi hitee fulchitatton. 14 Isixxi ilema ati'a gammashshotenna ilillisatee kaddaan; heddi manninna isixxe ilensha'a gammadaan. 15 Isi Gootti edo lumoke kadaan; woyinetixxa bookanna machchossaaka ha'wo ha'wabaan. Isinna ama ifixike godobi giddo hedhee'naa Woyyichchi Hafuuri iso'ni wo'ma.✝ 16 Isinna Isira'eelike ardi giddii'n heddo manna Gootta insa'neke Magenibaa wirri asse hiisaan. 17 Isinna annuwwiinxa qalbe insa'nexxe oosebaa, ajajema gophammakaaranna qulliyyetike beekkumiibaa hiisan; qixxeeffateeka arda Goottakee qixxeessatee Eelyaasike Hafuurninna hunnanni Gootti edo me'aan.» ✝

18 Zakkaariyaasinna ookkone iimika erganjo, «Tenne hitta ege'nanno? Ani cimeennen are anxinna lumooxxe woggaxxen.»

19 Iikk iimik erganjinna hiisseexxi hiyye haaso'ee qici: «Ani Magen edo uurrannoke Gebiri'eelin. Tenne ate'ni kulonnaanna tennee eloxxa odo ati'a idagonnaa ergeme'een.✝ 20 Kunnise yanna geltaa wodda uwwendeexxe'n muuxemaaka anka hiyyichcho amana gophpheettaxxe'e tinni yaane kaddaa qioco'ni afo'o duuddatton; dandeettenna haasoottaboxxon.»

21 Eettene yanna ardi Zakkaariyaasii'i Woyyichchi Galmi giddii'n fulebaang tureemmaxxe'e mambe'a hiyya'n iso'o gadho heqqa'emman. 22 Zekkaariyaasi fuleechchi uduma mannik welti haaso'a dande'ebaan; beessiski malee'e insa'ne'n haaso'a dande'a gophpheemmaxxee Galmi giddo waleella afeexxa egenne. Isinna afo'o duudeeshshanni ture.

23 Zakkaariyaasinna ergatemammaxxi yanna muuxendeechchi uduma ifike minibaa illee iima hige. 24 Ookkonneechchi uduma are isixxi Elsabeexi sila'wite; onde agenjo ifi shoxxe. 25 Isenna «Gootti salphine anka ardiinxe oddonaa'ni fugusso'a uudeexxi elle ifixxenni tenne ani'a asseedheen» hite.

26 Jiyak agenjo'n Magen ifika iimika erganjo Gebiri'eelii'i Geliila giddo hedheeke Naazireetike qachchibaa erge. 27 Ergemeebinna Daawwitxxe sanneke kade'eeke Yooseefi hiyyemaake manjo'n heerundo'a uwwendeexxe dubarchobaatemman. Dubarchotik summinna Maaramitemman.✝ 28 Iikk iimik erganjinna isebaa dageexxi ise'e, «Tee lumoshsha eeyyendeettexxee nage'i ati'a kadowwaal; Gootti atinni hedheen; ati melaalle giddii'n eebbisendeettexxen*» hiyye.

29 Maariyaminna konne Iimike erganjik haaso'inni lumoshsha alalteexxi, «Kunni hittatta hedheeke nage'ixxe aadhaa?» hita'ni saadde. 30 Iikki iimik Erganjinna Maaramii hiyyee qici, «Maaramii mee sodaat! Magenokenaa'n elle alfite'eetten. 31 Kunnise siila'witatton, labbaka beltonna ildatton; summa isikanna Yessuus hite'e fulchitatton.✝ 32 Isinna lumoke kadaan; Lumoke Goottik Beltonna hiyyemaan. Gootti Mageninna isike annixxa Daawwitixxa mootenna isi'a uwwaan. 33 Isinna Ya'iqoobixxe sanne'n duuchchi woddi'a moyaan; mootumma isixxinna muuxama affaba'a.»✝

34 Maaraminna ookkone iimika erganjo, «Ani heeruma gopheennaxxee tinni hitta kada dandeetta?» hita'n qorte? 35 Iimmik erganjinna hiyya'n ise'n hiisse haaso'ee qici, «Woyyichchi Hafuur ate'n hana dagaan; Lumoke Magenixxi hunna ate'n daggaan; tennexxee ilemaak woyyichchi beltinna Mageniinke Belto hiyyemaan. 36 Kunnise firi atik Elsabeexi ildabaaxxen hiyyenda'n turteexxi cimo giddo labbaka siila'witeexxenni kunni jiyake agenjon. 37 Magenokee dandeessissabaaxxi yaane hexxebaan.»✝

38 Maaraminna, «Kunnise ani Mageniinxe garibbitten; hitetteshshanni ani'a kaddaqqata!» hite. Iimik erganjinna ise birii'n me'e.

39 Eettene yanna Maarami rakke kexxeexxi Yihudake koobati bogike mitte qachchibaa me'ite. 40 Zakkaariyaasike mine'ninna e'yiteexxi Elsabeexii'i nage'a aaxxe. 41 Elsabeexinna Maaramika nage'a aadhatika haaso'a laqqee wodda anno isexxi godobi giddo uttaalde; Elsaabeexinna Woyyichchi Hafuurinni wo'mite. 42 Hafuurakanna gikki asiteexxi hitee qici, «Ati melaalle giddii'n eebbisende'ettexxen; ati ildattok beltinna eebbiseme'eeken. 43 Anke Goottixxi ama anibaa daga ani'a hitta hedheeke lumo ulfinna? 44 Kunnise atike nage'ika haaso'a laqenneshshanni anno godobi anki giddo gammashshoti uttaaldeen. 45 Gootti kaddaan hiyye ise'n kuleexxa amandeexxi ise eebbisendeexxen.»

46 Maaraminna hitee qico,

«Lubbo anxi Gootta jajja;✝

47 Hedho anxinna Mageno anke anjirallo'n gammadda;

48 Isi anee heenooxxe isixxe garbitteka salphinne uudedheeken.

Telchinni edi'a ila duuchcha ane'e eebbisendeettexxe hitaan;✝

49 Lumoke kade'ek Magen isi

ane'n lumoxxe yaane asse'eeken; summi isikinna woyyichchake.

50 Gattowwaali isixxinna

isoo sodaataakeeri'a ilatenaa'n ilati qico'n hexxaan.

51 Hirre ifixxenni jabaxxe yaane asse'e;

ifi giddo ifi dukammaka duuchchaara yaada insa'neengeninni xeere'een.

52 Galchalluwwa mootetenaa'n finqilche'een

tuffatemeeka manna kinni lummise'een.✝

53 Solo'weekaara eloxxe yaanenni goddise'een;

dureeyye kinni duwwixxe anganni me'itaashsha asse.

54 Gattowwaal ifixxen

erganjo ifika Isira'eeli'i gargaare'een;

55 Tinninna annuwwa no'oke'n haaso'emmashsha

Abirihaami'aanna horte isixxee'e hiyyemmaxxa duuchchi woddi'a heqqo'aaten.»✝

56 Maaraminna sase agenjii qico Elsaabeexxiba turteechchi uduma ifike miniba'a illeema higge.

57 Elsabeexixxi ilatixxi yanna geltee wodda labba belto ilde. 58 Olla'uwwi isekinna firuwwi isek Gootti lumooxxa mararte ise'a asseexxa lanqeexxi isenni welti gammande.

59 Saddeetixxe barra'n anno jila ofo'linsho'aa dange; annoteenna anniinke summinni Zakkaariyaasi hine fulchaatee hende.✝ 60 Yaane kinni ama isixxi «Waawwo, summ isik Yohaannisi hiyyemuun» hite.

61 Insa'nenna kinni ise'ee, «Atike firi giddii'n konne summinni ye'emeek ayyinna hedhebaan» hine.

62 Ookkoneechchi uduma annakanna belti atiki ayyete hiyyemee ye'emo'aa hassaate? Hine beessisk isoo qorre. 63 Zakkaariyaasinna hana borreessaaka bidiro iso'n uunaashsha laqeexxi, «Annotika summa Yohaannisi» hiyye borreesse; duuchchiing tenne jaje. 64 Ookkonne hirba'ni Zakkaariyaasi arrabi tikeme; afo'ikinna banemee'na haaso'a dande'e; isinna Mageno galateeffata safe. 65 Olla'a duuchcha'ninna soda'aa galde; tinni yaane duuchcha Yihudake koobatike bogaa duuchcha'n haaso'ende. 66 Tennee laqeek duuchchi, «Tinni anno maa kaddaaxxixxe?» hiyya'n tennee yaane godoba galchedhe; tinni duuchchi kaddeechchi Goottiinxi hunna isinni welti hexxemmaxxeetemman.

67 Eettene annok anni Zakkaariyaasi'n, Woyyichchi Hafuur wo'mee'naa raaga hiyya'n haaso'ee qici,

68 «Arda ifika wodeemmaxxee'e

Gootti Isira'eelik Magen saademowwaal.

69 Erganjo ifike Daawwitixxe hortenaa'n

hunnaameessa anjirallo ke'isseekken.

70 Tinninna olma ifixxe qulliyye raagolyetike afo'o'ni haaso'emmashshanni,

71 No'oo naapha no'okenaa'ninna

no'oo gibammakeerixxe anganaa'n anjireedheen.

72 Tenneenna asseechchi gattowwaal ifixxa annuwwa no'okee leellisho'anna

woyyitte ifixxa kako qalli hiyyatee,

73 Anna no'oke Abirihaami'a kakateexxa kako hedatee

74 Naapha no'okenaa'n no'o'o gatiseexxi

soda'a belo isi'a ergantonna'a,

75 baro no'oka duuchcha isi edo woyyummatinna qullummati no'o uurrisaashshaten.»

76 «Iittanni tee annoo ati Lumoke Mageniinke wabeeka hiyyendatton;

Goottiinka ora qixxeessate isi edo me'itatton.✝

77 Goottikinna cubbo insa'nexxa gattowwaal hiyyat

anjiratixxa ege'na arda ifike uwwaan.

78 Mageno no'okixxe o'watixxe gattowwaalinaa'n kexxeexxa

anjirenshatik ifi iimi'ni no'aa ifaashsha assa.

79 Tinninna dukkana giddo hedhaakeeri'a

reyotike gaaddisi hundanna hedheekeeri'a xabo'anna

Me'a no'oxxa nage'iinke oribaa akeeko'aten.»

80 Anno iittinna nophphiteexxi hedumik jabaatte; Isira'eelike arda'ninna leelle ege'nemaa qico'n qiilla gammoojje giddo ofo'le.