1 Edike sanbatixxi barra saxxeechchi uduma, Megidelixxi Maarami, Ya'iqoobixxi ama Maaraminna Seeloomeera kandeexxi Yessuussike rensha'ni fiffinxaaxxa shitto hirre. 2 Torbatixxa siretixxa barra gorsa bariisa arishsho fuldeeshshanni insa'nee moogiinbaa me'inaaman; 3 insa'nenna, «Ayyete no'o'a moogiinxe balenaa'ni kinjo goggo'misha?» hina'ni weli'anni weli haasonnaammani. 4 Yaane kinni insa'ne toggi hine uundaa wodda, iikki heenobaaki kinji mooggiinxe hulanaa'ni goggo'mee'naa uunde. 5 Insa'nenna hirreessi giddi'a e'yineeshshanni, golalooxxa seemma oddo'week dargaggeesi middi darree'ni ofo'lee'na'aa uundeexxi alanne. 6 Isi kinni insa'nee hiyyee qici, «Alaltinoqqe'e; ha'no hassina'neeki fannisemeemmake Naazireetike Yessuusin. Isi mooggokenaa'ni ke'edheeni; kaba hedhebaani; isoo moongeemmak boonchi kunse uudde! 7 Yaane kinni ha'no martineexxi hordofeeyyete'ninna Pheexiroosi'n, ‹Isi ha'no'a edise Geliila'a me'aani. Isi ha'no'ni kuleemmashshanni ookko isoo affinaani› hitine insa'ne'ni kulle.» 8 Melaalletinna alayyik roqonsita'n hirreessinbaa'n baajje fulde: insa'nenna lumo qico sodaanteemmaxxee ayye'ninna mittechchonna haasonnebaani.

9 Yessuussinna torebatixxe sirtixxe barra'ni, gorsa bariisa reyotenaa'ni ke'echchi uduma torbaane durriissa ise giddii'ni fulcheemmaaxxe Megidelixxi Maarami'ni sire leelle. 10 Isenna marteexxi isinni welti hedheemmakiir yaada'ni oodha'naa isi rewotena'ni ke'eexxi hedhoti hedheexxanna ise'ni leelleexxa insa'ne'n kulde. 11 Insa'ne kinni iseka haaso'a amanneba'a.

12 Ookkonechchinni uduma hordofeeyye isixxi giddii'n lame hadi giddi'a me'itaa'naa wele bifanni insa'ne'n leelle. 13 Insa'nenna illeema hingeexxi wele gatteemmaxxee hordofeeyye'ni kulle; kaddo malee insa'ne kulleexxanna amanneba'a.

14 Ookkonechchinni uduma Yessuussi tommenna mitte hordofeeyye ifixxi itate'ni hexxeeba insa'ne'n leelle: «Isi rewotenaa'ni ke'eechi uduma isoo uuddeeki manni insa'ne'n kuleexxa amanna gonpheemmaxxee isi amana gopha insa'neexxanna qalbe insa'neexxika jabeenna uudeexxi insa'nee xixe.» 15 Yessuussinna insa'ne'n hiyyee qici, «Butta duuchcha'n me'e; eloxxa odonna manjo duuchcha'ni lallabbe. 16 Amaneekinna xammaqemeek anjiremaan; amanebake'ni kinni murte iso'n murendaani. 17 Ane'ni amanaaki duuchchi mambe'a assatika beessisuwwa alfaan: insa'nenna anke summinni fuggichcha hafuura fulchinaani: harrooke laagadinninna haassonnaani. 18 Insa'ne bofuwwa angati abindaan; shiltaaxxa ha'la ha'winoolenna midde insa'ne'e miittabaani; angatanna elagopheeke manni hana ugginaa wodda mannikinna fayyaani.»

19 Gootti Yessuusi tennee insa'ne'n kuleechchi uduma iimi'a me'e. Isinna Mageniinke midda'ni ofo'le. 20 Ookkonechchi uduma hordofeeyye isixxi booncho booncho duuchcha'ni mammarenda'ni lallabe. Goottikinna insa'nenni welti huja'nemaani. Insa'ne'aanna beessisuwwa hunjaaka baallooma uwwati insa'nee barachchiiseemmaxxi barachcho dhugaatixxe kaddeexxa kokeessaamman.