1 Lebeexxi Yessuussi insa'ne'a, «Dhugaate hiyya'enneni; Mageniinxi mootumma lumooxxe hunnanni daggaa'naa uundaaqico'ni ta'a kaba butta hedheeke mannixxe oddonaa'ni mitti mitti reyabaakera hedheeni» insa'ne'a hiyye.

2 Jaane barra uduma Yessuusi Pheexiroosii, Ya'iqoobinna Yohaannisii'i adhdheexxi mitte qerraaxxe koobaba qabate; insa'nenna qofittinni he'nemman; bifa isixxinna insa'ne edo jijjiirende. 3 Yessuussixxi seemmanna fedheeki manji borce ca'a assa dande'abaqico'ni hara golalooxxe kadde. 4 Ookkoo Eelyaasinna Muuse Yessuusinni welti haasoonna'ni insa'ne'a leelline.

5 Pheexiroosinna Yessuusii'i, «Barsiisanjo no'oke kabanni he'nennele no'o'a eloxxeni. Tennexxee mitte fooqa ati'a, mitte Muuse'a, mitte Eelyaasi'a kadaaka sase fooqa ijaarro!» hiyye. 6 Insa'ne yo'osha sodaanteemmaxxee; Pheexiroosi haaso'a'neexxa ege'naammabaan.

7 Ookkonechchi uduma duumanchi dageexxi insa'nee golle; duumanchi giddii'ni, «Kunni ani eeyyannok anke beltoni; isi hiyyaaxxa laqqe!» hiyyaaki hafuuri laqeme.

8 Insa'nenna hirbange'ni qarqara ifika wirri hinne uundee wodda; Yessuusii malee'e insa'nenni welti ayyinna hedhemmabaa.

9 Insa'nenna koobatenaa'ni dirrina wodda, Yessuussi insa'ne'ni Manjiinki Belti rewotenaa'ni ke'aqico'ni tenne uuddineexxa yaane mitteke'ninna kuldinoqqe'e hiyye ajaje. 10 Insa'nenna Isi haaso'eemmak hiyyichcho godoba galche'ne; yaane kinni «Rewotenaa'ni ke'a» maa hiyyote kaddeexxa weli'anni weli haasona'nemman. 11 Insa'nenna; «Muuseke seerxi barsiisano mayeete edisse Eelyaasi daga'neeni hita'neeki?» hine isoo qorte. 12 Yessuussinna insa'nee; «Dhugaate, Eelyaasi edise dageexxi duuchchiinxa yaane edo hexxemmashshanni assaan; kaddo malee, Manjiinki Belti lumoxxa rakko adhdhaaxxanna tuffatemaaxxa borreesendeechchi mayeete ha'no labba'ne? 13 Yaane kinni Ani ha'no'a hiyyaanneni; Eelyaasiqqa ediseenni dageemmani; mannikinna isixxee borreesendemmashshanni insa'nee hanseexxa duuchcha iso'ni asseeni» insa'ne'a hiyye.

14 Insa'nenna gatteexxe hordofeeyyebaa hinge dangee wodda; heddi ardi insa'nee buqe Muuseke seerixxi barsiisanuwwa eettenee gatteemmaxxe hordofeeyenni welti moroondaa'naa uunde. 15 Ardi duuchchi Yessussii uudee wodda mambe'a hiyyeexxi nage'a aa'no'a isibaa gongine. 16 Yessuussinna, «Insa'nenni welti morondinaammaki mayiinxeteemma?» hiyye qore. 17 Ardiinxe oddonaa'ni mitti manjichchi isoo hiyyeeqici; «Barsiisanjo; fuggichchi hafuuri giddo galee'naa afo'o duudeeka anka belto Atibaa idageennani; 18 kunni hafuuri ke'issedhaa wodda duuchcha isoo ibisaani, afo'okenaa'ninna honba yaasaani; isso ifixxanna qaraani, bisi isikinna bagaani; konnee fuggichcha hafuura fulchitaashsha hordofeeyye atixxa laqenneni; yaane kinni insa'ne dandeennebaani» hiyye.

19 Yessuussinna insa'ne'a hiisseexxi; «Ha'no amandinabaaxxe ila! Haaniqico'ni Ani ha'nonni welti hedhanno? Haaniqico'nita ha'noo ossano? Ookkonne belto Anibaa idagge!» hiyye. 20 Mannikinna ookkonee belto Yessuussibaa idage; fuggichchi hafuurinna Yessuussii uudee wodda; belto hirbange'ni butta ganganlche; beltikinna buttinake'ni ibeexxi gangalata'ni honba yaasate'ni ke'e. 21 Yessuussi beltiinka anna; «Tinni dhibo abiddeexxenni hitteexxe yanna?» hiyye qore. Annikinna; «Oosummandenaa'niteni; 22 isoo shiwo'a haseexxi heddo yanna giirate'ninna wode'eke'ni ibisaani; yaane kinni ati dandeettattole ballo'o no'o'a mararte'e no'o gargaari!» isoo hiyye. 23 Yessuusinna; «Mayee dandeessissa'noole hitatto? Amanaake manji'a duuchchiinxi yaane dandeesissaan» isi'a hiyye. 24 Hirbange'ni beltiinki anni raara'ni, «Ani amanaannen; amana gopha anxee anee gargaari!» hiyye. 25 Yessuusi ardi ookko'a raanka'ni isibaa dagaa'naa uudee wodda; «Ati mansha laqqabexxokinna afo'o duuddeetteki hafuuri isonaa'ni fuli! Konnechchinni udumi'a iso'ni higgabexxoshsha atee Ani ajajaannen!» hiyye fuggichcha hafuura xixe. 26 Fuggichchi hafuurinna raara'ni belto fuggo gangalcheechchi uduma beltokena'ni fule; heddi manni «Belti reyedheen» hinaaqico'ni belti reyeechchishsha kade. 27 Yaane kinni Yessuusi beltiinxa anga abideexxi ke'isse; beltikinna ke'e uurre.

28 Yessuussi mini'a e'yee wodda hordofeeyye isixxi qofittinni; «Konnee fuggichcha hafuura no'o fulchatee dande'a gonpheennelchi mayeete?» hiteexxi isoo qorte. 29 Yessuussinna, «Iitta hedheeki fuggichchi hafuuruwwi fula dande'aak soodachchoti callan» hiyye insa'ne'a haaso'e.

30 Insa'nenna ookko'ni ke'neexxi Geliila darreee'ni sa'ne; Yessussinna insa'nee hebeka booncho ayyinna ege'no'a hasebaan; 31 Isinna hordofeeyye ifixe'ni «Manjiinki Belti manniinxe anga'ni sa'isseme uwwemaani; insa'nenna isoo shinnaani; isinna sakkaxxe barra uduma ke'aan» hiyya'ni insa'nee barsiisaammani. 32 Hordofeeyete'ni tennee yaane qalbeeffateemmabaani; insa'nenna isoo qorrummaxxe'e sodaante.

33 Insa'nenna ookkonechchi uduma Qifirnahoomi'a dange. Yessuussinna mine e'yeechchi uduma; «Woldo orake'ni weli morondinaammaxxi yaane maachchomma'a?» hiyye insa'nee qore.

34 Insa'ne kinni orake'ni morommaammalchi duuchchiingenaa'ni sa'aaki ayyete hina'nemmaxxee sammi hine. 35 Yessuussinna ofoleechchi uduma tommenna lamiinxa ifibaa yeexxi; «Siretike kado'a hasaaki; duuchchiingenaa'ni udu'meekenna duuchchiingike erganjo kadowwaal» hiyye. 36 Isinna insa'nee shiixxoka belto aadheexxi oddo insa'neexxe'ni uurrise; belto konnee luu'meexxi; 37 «Iitta hexxeexxe shiixxaramma annoolenaa'ni mitte anke summinni adhdhaaki duuchchi; anee adhdhaani; aneenna adhdhaaki duuchchi kinni adhdha'neeki anete kaddebaaki anee ergeemmake adhdhaani» hiyye.

38 Yohaannisi Yessuussii, «Barsiisanjo! Mitti manjichchi summa atikenni fuggichcha hafuura fulchaa'naa uundeenneni; yaane kinni isinna no'o hordofa gopheemmaxxee hoyyineenneni» hiyye. 39 Yessuusi kinni, «Waalle hoyyitinoqqe summa ankenni mambe'a huje'e iikki woddi ane'ni elobaaxxa haaso'a dande'aaki hedhebaani; 40 no'oo gareeraaki no'onninni hedheekeni; 41 dhugaate ha'no'a hiyyaanneni: ha'no Kiristoosike kaddineemmaxxee mitte qasha wodde'e Anke summinni ha'no'a uwwaaki duuchchi: hira ifka gophabaani» hiyye.

42 Yessuussinna lebeexxi hiyyee qici, «Ane'ni amanaake konne shiixxarammanaa'ni mitte dedhisaaki duuchchi lumoki daammiinki kinji gooba isike'ni usuremee'naa abbaayyate'ni hunemeel isi'a eldammani. 43 Tennexxee anga atixxi atee dedhissoole; isee kutte huni! Lame anga affe'e gaanametixxe giirabaa me'ati irra tutumake kadde hedhotibaa e'ya ati'a woyyani. 44 (Gaanemi'ni corroqa isixxi retaba: giira isixxi xoxxabaabani.)* 45 Lekka atixxi atee dedhissoole; isee kutte huni! Lame lekka affe'e gaanamete'ni hunemati irra; naafake kadde hedhotibaa e'ya ati'a woyyani. 46 (Gaanemi'ni; corroqa isixxi rertabaa; giira isixxi xoxxabaan.) 47 Ille atixxi atee dedhissoole; isee fulchitettexxi huni! Lame ille affe'e gaanamete'ni hunemati irra mitte ille affe Mageniinxe mootumma'ni aaga ati'a woyyani. 48 Gaanemi'ni

«Corroqa isixxi rertaba'a;

giira isixxi xoxxaba'a.

49 Manji duuchchi giirati hega uudemaan.

50 «Maxxine eloochchoni; yaane kinni maxine bushsheexxi xe'me isexxa gophphoole; mayiki xe'mitaashsha assitina? Ha'noo giddo maxinetixxi xe'me hexxowaali! Ha'no weli aaggine nage'iki hedhdhe.»