1 Ookkonechchi uudma Yessuusssi ifike bogiba dage; hordofeeyyetinna isoo hordoffe. 2 Edike Sanbatixxa barra Muuseka seera barantaammake mine'ni barsiisa safe; tennee isixxa barsiisa laqeemmak heddi manni mambe'a hiyya'ni.

«Kunni manjichchi tenne yaane duuchcha habaa'ni alfe?» insa'nenna hiissineexi «Maa beekkuma Isi'a uwwemee? Konne manmbe'uwwa huja'neeki isi hitaate! 3 Isi kunni haqichcho bocaammakenna Maaramike belto, Ya'iqoobikenna Yoosake, Yihudakenna Simi'oonike dayyobaa? Isixxi Dayyuwwanna no'on bira hexxebaa?» isoo hine. Tennena'ni kexxeexxa insa'nenna tuffet baracho isixxa adhinebaangi gante.

4 Yessuusinna insa'nee, «Wabeek ulfeessemabaak ifike boga'ni, ifike fira'ninna ifike mini hado'nite callani» insa'ne'e hiyye. 5 Isinna ookkoo heenoke elagopheeke manna'ni anga ifixxa hana ugge fayyise malee'e; wele mambe'a yaane hujebaani. 6 Isinna amana gopha insa'neexxee lumo qico mambe'a hiyye.

Ookkoneechchi udumii'a Yessuussi ola'uwwake'ni marema'ni barisiisa'ne'mmani.

7 Isinna tommenna lame hordofeeyye ifiba'a ye'eexxi lame lame asseexxi erge; fuggichcha hafuuruwwa'ni baallooma insa'ne'a uwwe. 8 Yessuussinna insa'nee, «Ora me'itinaakee siqqo malee'e gala'a, yookaan subba, yookaani maallaqakanna abixitinoqqe'e; 9 lekka ha'noxxe'ni kophe uggudhdhe; yaane kinni odo'witineexxe seemma'ni hana lephphitine oddo'witinoqqe'e. 10 Fedheeke booncho'ni martine e'yitinaa wodda; hoone mine'ninna e'yitinoole ookone qachcha waaldine fuldinaqico'ni ookkoni turre. 11 Manni ha'nooxxa laqa'nebaakenna ha'no adhabaake kadoole ookkone boonchonaa'ni fuldiina wodda; lekka ha'noxixxa buko ganiga'nitine ookko'ni fulle. Tinninna insa'ne'a xexxe'achchiisatike beesisa kaddaan» hiyye'e ajaje.

12 Insa'nenna ookkoo'ni fulleexxi mann aade agaasha lassine. 13 Insa'nenna heddo fuggichcha hafuuruwwa fulchine; heddo elagopheeke manna'ninna zayite isinaa'ni fayyinse.

14 Yessuussiki summi ege'nema'ni dagemaxxe'e moyanji Heeroodisi tennee laqe. Mitti mitti manninna, «Xammaqammak Yohaannisi rewotenaa'ni ke'edheeni; tennexxee kunni mambe'i duuchchi kada'neeki isi gamii'niteni» hina'nemman.

15 Weli manni; «Eelyaasiteni» hiyya'nemmani; weli kinni, «Edixxe wabeekotenaa'n mitteken» hina'nemmani. 16 Heeroodisi tennee yaane laqee wodda kinni; «Ani gooba gorrasiseennake Yohaannisi rewotenaa'ni ke'eeni» hiyye. 17 Heeroodisi ifike dayyixxa Filiphphoosixxa are Heerodiyaadaa'a adheemmaxxe'e; isexxe buutonni isi Yohaannisi'i abindaashsha ajajeexxi usursiiseemman. 18 Yohaannisi Heeroodisii'i, «Atike dayyixxa are ati ifi'a aadhiyyote'e Muusek seeri hoyyaani» hiyya'nemman.

19 Tennenna asseelchi Heerodiyaada tenne yaane'ni haloonfatte'e Yohaannisi'i shilchiisso'a hassa'nemmani; yaane kinni dandeettebaan. 20 Dande'a gophpheechchinna Yohaannisi qullichchakenna woyyichcha manjo kadeexxa Heerodisi ege'neemmaxxee isoo sodaata'ni ifi heqqedha'nemani. Isinna Yohaannisi haaso'a'nexxa Heeroodisi laqaa wodda kunni yaadi iso'ni a'urroolenna gammashshoti laqa'nemmani.

21 Heeroodisi ilemeexxa barra ulfaateeka ja'laabuwwa loliinka manna ajajaammakanna Geliilake bogi giddo ege'nemeeke lumolli manni'a ita qophpheesse: tinni yanna Heeroodiyaada'a eloxxe yanna ise'a kadde. 22 Heerodiyaadaxxi belto itatike mine'ni e'yiteexxi siribita'ni Heeroodisinna isinni welti itate'ni hedheemmaka manna gammachchiise. Moyanji tennee belto; «Eeteteexxa yaane duuchcha anee laqqottole ati'a uwwannoni» isee hiyye; 23 Isinna higgeen; «Anxe mootummaka gamisa kadoolenna midde; laqqettelcho duuchcha ati'a uwwannoni» hiyye ise'a kakate.

24 Isenna ifixxe amabaa marteexxi; «Maacho isoo laqanno?» isee hite. Ama isexinna; «Xammaqanjo Yohaannisika gooba woxxe umo» ani'a uwwemowwali hite.

25 Beltotinna moyanjiinba'a rakke marteexxi; «Xammaqanjo Yohaannisika umo ta'a qorete'ni uggite'e ani'a uutattosha hasaanneni» isoo hite. 26 Moyanji tennee yaane'ni lumooshsha yaade; konnee itatee ye'endeexxe keessumma edo kakateexxe kako'a ise laqqeexxa yaane hoyyedha dande'ebaani. 27 Tennexxee moyanji hirbaange'ni heqqaammake sannachchi giddii'ni mitte ergeexxi Yohaannisika umo woxeexxi iyyedagaashsha ajaje; sannachchikinna usurriinke mine'ni mareexxi Yohaannisika umo woxe. 28 Isinna woxeemmaka umo qorete'ni ugge beltotee uwwe; beltotinna amatee uute. 29 Yohaannisixxi hordofeeyye tennee laqqeeshshanni daggeexxi Yohaannisika rensha aaxeexxi moogge.

30 Ergameeyyetinna Yessuusike qarqara'ni bukki hite assiteexxanna barsiisseexxa duuchcha iso'ni kulde. 31 Yessuussinna; «Ha'no qofittinni manji hedhebaaba Aninni welti me'inee'na ookko shiixxo qico hafuura adhdhe!» hiyye. Ookkonechchi uduma heddi manni dagga'ni me'aammaxxee insa'ne ita midde itatee yanna anfeemmabaan. 32 Tennexxee insa'ne qofiti ha'naabaa hobolote'ni gulunfe'e me'ine. 33 Kaddo malee insa'ne me'ina'neenge'ni heddi manni insa'ne'e uude'e ege'ne; tennexxee qachcha duuchchanaa'ni manni fuleexxi gonge sa'eexxi edise geye. 34 Yessuussi eettene hobolonaa'ni dirree wodda heddi ardi bukki hiyyee'na uude; insa'nenna allalisanjo afebaake gedhebishsha kandeexxa uudeexxi insa'ne'a yaade; isinna heddo yaane insa'nee barsiisate'ni ke'e. 35 Bogi hashshee wodda; hordofeeyye isibaa shikki hiteexxi, «Kunni boonchinna qiilla gammoojjeni; bogikinna hashsheeni; 36 insa'nenna qarqarake'ni hedheeke olla'i giddi'a me'ineexxi indaachcho hidhine indaashsha konnee manna geegeessi» isoo hine. 37 Yaane kinni Yessuussi, «Indaachcho ha'nonni insa'ne'a uwwe!» hiyye.

Insa'nenna isoo «Marrennexxi lame dhibba birrenni Diinaarenni* indaacho hirrennexxi uunannota?» hine.

38 Yessuussinna insa'nee, «Me'e so'iinxa kebbo afine'ei?» isinna «Amme, martineexxi uudde!» hiyye.

Insa'nenna uundeexxi, «Onde so'iinxa kebbonna lame qulxu'me hexxeeni» hine.

39 Yessuussinna konnee arda quffeexxe anso'ni qorbi qorbiki ofo'linshaashsha ajaje. 40 Tennexxee ardikinna dhibbi dhibbikinna onde tomme kada'ni qoqqoodemeexxi ofo'le. 41 Yessuussi onde so'iinxa kebbonna lame qulxu'me aadhe iimi'a uuda'ni galateeffateexxi so'iinxa kebbonna kukkuteexxi mannakee qoqqoondaashsha ifixxe hordofeeyye'ni uwwe. Ookkoonechchi uduma Isinna lamiinxa qulxu'me duuchchiingee qoode. 42 Duuchchiingi ite godde. 43 Hordofeeyyetinna inda'naa gatteexxa so'iinxa kebbonna qulxu'me tommenna lame qore wo'ma hanba bukki assite. 44 Tenne so'iinxa kebbo iiteek manninna onde kuma labballomman.

45 Ookkone hirba'ni Yessuussi arda geegesa'na hordofeeyye ifixxi hoboloti Beete Sayida'a isi'a edisse fooffaasha ajaje. 46 Ookkoo'ni Isi insa'nee ookkonni waaleexxi soodato'a koobatibaa fule. 47 Bogi hashshee wodda hobolo abbaayyatixxe oddo'ni hexxemmani; Yessuussinna qofitti gadho bagoba hedhemmani. 48 Insa'ne'ni diidallo itti jabaatteemmaxxee hordofeeyye shaffisik ooffa'ni rakkanta'naa uuddexxi hashshixxe sallaanne saatenaa'ni tommenna lame saateqico'ni hexxeexxe yanna'ni abbaayyati hana tarkaafat'ni insa'neebaa dage. Isinna insa'nee birii'ni sa'e me'o'aatemmaani. 49 Yaane kinni insa'ne Yessuussi abbaayyate'ni hana tarkkaafate me'a'naa uundeexxi; geelate hina'ni raarre. 50 Insa'ne duuchchingi Isoo uunde alanne.

Isi kinni hirbange'ni; «Mee co'o, Anten sodaattinooqe'e!» hiyye. 51 Isinna hobolote'ni hana gulufe insa'nenni welti ofo'le diidallotinna uurrite. Insa'nenna tenne yaane'ni lomoqico mambe'a hine. 52 Insa'ne so'iinxe kebbo'ni hujemeeka mambe'a kassi hiyya gonpheemmaxxee qalbe insa'neexxi duuddemman.

53 Insa'nenna abbaayya fonfeexxi Geensareexxike bogibaa dange genne. Eettene hobolo ookkonni uurrinse. 54 Hobolotenaa'ni dirrineeshshanni ardi Yessuussi'i uude ege'ne. 55 Insa'nenna loola duuchcha'ni gongina'ni elagopheeka manna rarete'ni dunke Yessuussi hedheebaa idanga'nemman. 56 Isi geyeeke olla'a yookaan qachchake'ni yookaan hadi giddo duuchcha elagopheeka manna loola loolake'ni uggina'ni seemma Isixxiki kasi tuqaashsha manni isoo kadhataamman; tuqeeki duuchchinna fayyaammani.