1 Ookkone wodda higgeenni heddi manni bukki hiyye. Insa'nenna indacho mittelchona afa gonpheemmaxxee; Yessuussi hordofeeyye ifibaa ye'eexxi; 2 «Kunni manni aninni welti sase barra tureemmaxxeenna indaachcho afa gopheemmaxxee kunni manni anee mararsa'neeni. 3 Insa'ne giddii'ni mitti mitti bayyi boganaa'ni dangeemmaxxee agabonni ifi ifike minibaa me'inaasha assonnole orake'ni shaqqine inbaan» insa'nee hiyye. 4 Hordofeeyye isixxinna hiissiteexxi isoo, «Konne qiilla gammoojje'ni konne manni duuchchi'a itisatee geltaaxxi so'iinxa kebbonna habaa'ni afenda?» hite.

5 Yessuussinna insa'nee «me'e so'iinxa kebbo afinee?» hiyye qore.

Insa'nenna «Torbaane» hine hiissine. 6 Isinna ardi ofo'laasha ajaje; eettene torbaane so'iinxa kebbo aadheexxi galateeffateechchi uduma shashshateexxi ardakee qoondaashsha hordofeeyyete'n uwwe. Insa'nenna ardakee qoonde. 7 Heenoxxi shiixxaramma qulxu'muwwa hexxemman; Yessuussinna qulxu'muwwa aadheexxi galateeffateechchini uduma hordofeeyye isixxi ardakee qoodo'a ajaje. 8 Ardi duuchchi ite godde; ookkonechchi uduma hordofeeyye isixxi indaa'na'a gatteexxa hamba torbaane qore wo'ma bukki assite. 9 Ookkonna shoole kuma geyaaki ardi hedhemman; isinna insa'nee geegeeseechchi udumi'a; 10 Hordofeeyye ifixxenni welti Dalmanuuta hiyyemaake boonchibaa me'e.

11 Feerisitotinna daggeexxi Yessuussinni welti moromate'ni kexxe. Insa'nenna isoo hega uuddo'a hasseexxi iimi'ni mitte beessisa insa'ne'a leellishaashsha qorte. 12 Yessuussi hafuura gikki asse foo'leexxi, «Tinni ila mayee beessisa halsita'nelchi? Dhugaate hiyyaanneni; tenne ilaa mitti beessisi uwwemabaan!» hiyye. 13 Ookkonechchi uduma isi insa'nsa'nee waaleexxi hobolote'ni ofo'leexxi widi'a foofe.

14 Iitti hordofeeyye ita abixxa deetemmaxxee mitte so'iinxa kebbo malee hoboloti giddo mittelchonna affeemmabani. 15 Yessuussinna, «Ifi xexxe'atte, Feerisitotenaa'ninna Heeroodisixxe lebelenaa'n ifi heqqedhdhe!» hiyye.

16 Insa'nenna weli'aan weli, «Isi no'o iitta hiyya'neechchiqa so'iinxa kebbo abixxa gonpheennaxxeten» hine. 17 Yessuussinna insa'neeka heduma ege'neexxi; «So'iinxa kebbo afa gonpheennaxxeteni hitina'ni haassottina'neelchi mayeete? Ta'anna ha'no kassi hitinabaa? Qalbeeffatinabaa? Yookaani qalbe ha'nooxxi dillottee? 18 Ille affineenni hexxinee uudina'nebaa? Mansha affineenni hexxine laqqina'nebaa? Kassi hitina'nebaa? 19 Onde so'iinxa kebbo onde kuma manni'a shashshateenne wodda; me'e qore wo'ma hanba gatteexxa bukki assitine?» insa'nee hiyye. Insa'nenna, «Tommenna lame qoremman» hine.

20 «Iittanni torbaane so'iinxa kebbo shoole kuma manni'a kukkutenne wodda; me'e qore hanba gatteexxa bukki assitine?» insa'nee hiyye.

Insa'nenna iso'ni «Torbaane» hine hiissine.

21 Isinna insa'nee, «Ta'anna kassi hitineeba hiyyotee?» insa'nee hiyye.

22 Ookkonechchi uduma insa'ne Beete Sayida dange, heenoki manni ille ba'eeka mitte manjichcho Yessuussibaa idangeexxi angati qaqqabaashsha kadhante. 23 Isinna konne ille ba'eemmake manjichchixxa anga abideexxi olla'i gadho fulche manjichchiinxe ille'ni hancufa tufeexxi angatanna iso'ni hana uggeexxi, «Maachcho ate'ni leella'neechchi hedhe?» hiyyeexxi isoo qore.

24 Isinna toggi hiyye uudeexxi, «Manni haqqetishsha lele'maa'naa uudaannen» hiyye. 25 Higgenni Yessuussi manjichchinxe ille'ni hana anga ugge; ookkone wodda manjichchi dhaphphi hiyyeexxi uude; isinna fayyeexxi duuchchiinxa yaane qulleesseexxi uudate'ni ke'e. 26 Ookkonechchi uduma Yessuussi, «Manjichcho olla'i giddi'a e'yitoxxe, olla'i giddonna ayye'ninna kuldoxxe'e» hiyyeexxi ifike minibaa geegeesse.

27 Yessuusinna ifixxe hordofeeyyenni welti Filphoosi Qiisaariya olla'uwwibaa me'e; insa'nenna orange'ni he'nee'naa hordofeyyetanna: «Manni Anee ayyete hiyya'ne?» hiyyeexxi insa'nee qore.

28 Insa'nenna, «Mitti mitti cuuphaammake Yohaannisiten hiyyaakiiri hedheen; weli kinni Atee Eelyaasiten hiyya'neeni, weli kinni wabeekoleti giddii'ni mittekeni hina'neeni» hineexxi iso'ni hiissine. 29 Higgeenni Yessuussinna insa'nee, «Ha'nota Anee ayyete hitina'ne?» hiyyeexxi qore. Pheexiroosinna, «Ati Kiristoositen» hiyye. 30 Yessuussinna insa'ne'nee isixxee ayye'ninna haasoonnabaashsha xexxe'achchiise.

31 «Manjiiki Belti heddo rakko adhdhaan, geedhuwate'ni, Qeesoletike akeekisanjuwa'ni, Muusseke seerixxe barsiisano'ni shiyemaan, sase barra uduma rewotena'ni ke'a hasissaan» hiyya'ni insa'ne'ni barsiisate'ni ke'e. 32 Isinna tennee yaane insa'ne'ni farri asse kule. Eettenee yanna Pheexiroosi Yessuussii qofitti adhdhe me'eexxi xixe. 33 Yessuussi kinni wirri hiyyeexxi hordofeeyye ifixxa uuda'ni Pheexiroosii, «Ati duriissa anenaa'ni udumi'a higi!» isinna hiisseexxi «Ati manjiinxa malee Mageniinxa yaane heddaabexxoni» hiyye isoo xixe.

34 Ookkonechchi uduma Yessuussi arda ifixxe hordofeeyyenni welti ifibaa ye'eexxi, «Anee hordofatee eeyyaaki hedhoole ifi hunowwaal; fanno ifixxa dulkeexxi anee hordofowwaal; 35 hedho ifixxa anjiratee eeyyaaki duuchchi hedho ifixxannxa balleessaani; anxenna eloxxe odoxxee hedho ifixxa balleessaaki duuchchi kinni hedho ifixxa anjiraani. 36 Manji butta tennee duuchcha ifixxe assedhe'e lubbo ifixxa balleesseexxe kaddoole; isi'a maa la'oonda? 37 Manjingi lubbo ifixxa wodo'a maa hira uwwiyyo dande'a? 38 Tenne amana gibba'neekixxenna cubbaaleeyye ilaxxe oddo'ni Ane'ninna hiyyichcho Anke'ni shookaaki duuchchi; Manjinki Belti ifike annike ulifinninna iimixxe woyyoole Ergannanni welti dagaa wodda; iso'ni shookaani» insa'ne'a hiyye.