1 Sa'atikinna xaltiinki ayyaani ulfeessemo'a lame barra gattee'naa: qeesoletikinna Muuseke seerixxi barsiisano Yessuussii abindaakanna shiltaaka toora hansaammani. 2 Yaane kinni insa'ne; «Ardi lola ke'issabaashsha tinni ayyaani barra kaddoqe'e» hinaamman.

3 Yessuussinna Biitaaniya soomi abideeke Simi'oonike mine'n itate'ni hedhee'na'a: manjichcho mitte hiri yo'oshsha fiixxeexxa mako afebaaxxa naardoosixxi shitto* wo'miteexxa albaasxxiroosixxa bilqaaxe aaxxe dagge enqiteexxi eettenee shitto Yessuussike umo'ni dunde. 4 Ookko'o hedheemmake manni giddii'ni mitti mitti tennee assiteexxe yaane'n mufante weli'anni weli: «Tinni shitto mayee tola baxxa? 5 Shitto tinni sase dhibba Diinaare* iima gurgurende'e sila maallaqa ookkonee hiyyeeyyetee uwwa dandessissamman!» hine tennee manjichcho cee'mine.

6 Yessuusi kinni insa'nee: «Waalle! Isee'e mayee rakkisina? Ise ani'a eloxxe yaane assiteen. 7 Hiyyeeyyete kaddoole, duuchchi woddanni ha'nonni welti hexxeen hassineexxe yanna'ni insa'nee gargaara dandeettinaani: ani kinni duuchchi wodda ha'nonni welt hedhabo'noni. 8 Tinni manjichcho ise'e dandeessisseeqico ani'a assiteeni; moogemmebo'nong edi darre maala anke'n shitto issiteeni. 9 Ani ha'noo dhugaate hiyyaanneni: tinni eloxxi odo butta duuchcha'ni kulendaammake booncho'ni: ise ani'a assiteexxi yaane qaabbete kadde'e isexxee kulendaani» hiyye.

10 Ookkonechchi uduma tommenna lame hordofeeyye giddii'ni mitti Asiqorootuk Yihuda, Yessuussii sa'isse uwwo'a qeesoletike akeekisanjiba'a mare. 11 Insa'nenna tennee lanqee wodda gammande: maallaqa isi'a uwwiyyotee weli aange: tennexxee isi Yessuussii sa'isseexxi uwwo'a eldaaxxa yanna heqqedha'nemman.

12 Sa'atike ayyaanik gedhechchi duleemmamake kebbotike ayyaanixxe siretixxe barra'ni, hordofeeyye isixxi Yessuussiba shiqqeexxi: «Sa'atike ayyanixxa ita haba marree ati'a qophpheessinonnaa hassaatte?» hite isoo qorte. 13 Isinna hordofeeyye giddii'ni lame erge insa'nen hiyyee qici, «Ha'no qachchibaa marre! Ookko wodiinxa odolcho dulkeeke manjichchinni futti hitinaan: 14 isinna e'yaake mine'ni duuka e'ye: ookkone minika gootta, ‹Barsiisanji anxe hordofeeyyenni welti sa'atike ayyaanixxa hashshixxa ita itaak keessummatik mini habate?› hiyya'neeni hiyye. 15 Isinna fooqete'ni hedheeka giissemeekanna fayemeeka ba'laka mine ha'no'a leellishaani: ha'nonna ookko'o ani'a qophpheesse» hiyye.

16 Isixxi hordofeeyyenna ookkoo'ni kexxeexxi qachchiinbaa marte: insa'ne'ni duuchchiinxa yaane Yessuussi kulemmashshanni kaddee'na anfe: insa'nenna sa'atike ayyaanixxa itanna qophpheessine. 17 Hashshee wodda Yessuussi tommenna lamiinxe ifixxe hordofeeyyenni welti dage. 18 Insa'nenna itate'ni he'nee'naa, «Yessuusinna dhugaate ha'no'n hiyyaannen ha'no giddii'ni mitti aninninni welti ita'neeke anee sa'isse uwwaani» hiyye. 19 Insa'nenna mitti mitting tenne yaane'ni yaandeexxi, «Ante kadunnu?» hina'ni weli'ani weli qorre. 20 Isinna insa'nee hiyyee qici, «Tommenna lame giddii'ni mitti aninni anga qorete'ni ugga'neeken. 21 Manjiinki Belti isixxee borreesendemmashshanni reya reyaani. Yaane kinni Manjiinka Belto sa'isseexxi uwwaake ookkone manji'a aanne'e: iikki manji ilema gopheele woyyammani» hiyye.

22 Insa'nenna itande'ni he'nee'naanni isi daabbotanna aadheexxi galateeffate: isinna shashshateexxi hordofeeyye ifixxee uwweexxi: «Yawwe kunni anke maalani» hiyye.

23 Ookkonechchi uduma isi buuda aadheexxi: galateeffate'e insa'ne'a uwwe: duuchchiingi eettene buudana'ni ha'we.

24 Yessuussi insa'ne'n hiyyee qici, «Tinni, heddi mannixxee dunenda'neexxe haaroxxe kakoxxe anxe mundeni.»

25 «Ani dhugaate ha'no'a hiyyaanneni: Mageniinxe mootumma'ni haaroxxe woyinexxe gummaka bulubulo ha'wannoqico'n langaxxa tennee ha'wa ha'wabo'noni» hiyye.

26 Insa'nenna ookkonechchi uduma faaro faarsineexxi Dabire Zayitexxe koobabaa fulle.

27 Yessuusinna, « ‹Allalisanjo ganannon, gedhebi xeremaan;› hiyyende borreessendemmaxxee duuchchiing ha'no anee waaldinaan;

28 Yaane kinni ani rewotenaa'ni ke'ennelchi uduma ha'no'a edise'e Geliila'a me'annoni.» 29 Pheexiroosinna, «Weli duuchchiingi atee waaloole midde ani hara atee waalabe'noni» hiyye.

30 Yessuusinna isoo: «Dhugaate ati'a hiyyaanne tennee hashsha'ni lukkichchi lamele baroodebaangi ati sasele anee ege'nebo'noni hitatton» hiyye.

31 Pheexiroosinna hiisseexxi: «Ani atinni welti reyonnole midde hara atee waakkatabo'non» hiyya'ni jabaateexxi haaso'e.

Wele hordofeeyyenna iittanni hite.

32 Ookkonechchi uduma insa'nee Geetesemaani hiyyemaake boonchiba me'ine: Yessuussinna hordofeeyye ifixxa: «Ani soodataannen; ha'no kabanni turre» hiyye. 33 Isinna Pheexiroosii'i, Ya'iqoobiinna Yohaannisii'i adhdheexxi me'e: isinna yo'oshsha yaada'ni wixixxi hiyyate'ni ke'e. 34 Higgenni, «Lubbo anxi lumooxxe yaaddonni rewotee shiqqeeni; ha'no kabanni turtineexxi jabaattine heqqe» hiyye.

35 Isinna shiixxo qico insa'nee sa'e me'e buttinake'ninna ibeexxi dandeessissoole iitti yanna isinaa'ni saxxaashsha soodateexxi, 36 «Anke Anna! Duuchchiinxi yaane ati'a dande'endammaxxee tennee anee'ni gelta'neexxa rakkotixxa buuda anenaa'ni bayyisi: yaane kinni anke hasitishshate kaddebaang atike hasitishsha kaddowwaali» hiyye.

37 Yessuussi illeema hige'e hordofeeyye isixxi diiphphee'naa afexxi, Pheexiroosii hiyyee qici, «Koo Simi'ooni diiphpheette? Mitte yanna midde jabaatte heqqa dandeettebexxoo? 38 Hega uudemate'ni e'yitinabaashsha jabaattine soodatte; irri qophpheeffateeni; maali kinni gophaaleessakeni.»

39 Higgeenna isi me'exxi sirete'n hiyye soodatemanga hiyyichcho lebeexxi soodate. 40 Higgeenn isi hordofeeyyetiba'a illeema hige dagee wodda: ille insa'neexxi mugiki ha'urteemmaxxee; diinphee'na'a afe: insa'nenna hina'neexxa egenna'nemmabaani.

41 Isinna sakkaxxa yanna dageexxi insa'nee hiyyee qici, «Ta'anna diiphphinee hafuura adhdhande'n hexxinee? Yoona gelte'e! Yannatinna gelte! Manjiinki Belti cubbaaleeyyetixxe anga'ni sa'issemeexxi uwwemaaxxi yanna gelte'eeni. 42 Ke'we me'ino! Anee sa'isseexxi uwwa'neeki dage'eeni» hiyye.

43 Yessuussi tenne haaso'a'neenge'n: tommenna lame hordofeeyye giddii'n mitti Yihuda dage: isinni welti wolaantichchakanna meena abixxeekiir qeesetike akeekisanjuwwinaani, Muuseke seerike barachchiisalluwwinaa'ninna geedhe giddii'ni ergemeeki heddi manni hedheemmani.

44 Sa'isse uwwammaki Yihudanna, «Ani sunqedhannoki manji isoteni abidde; xexxe'achchotinna isoo adhdhitineexxi me'e» hiyyeexxi ediseenni hedhe'e insa'ne'a beessisa uwweemmani. 45 Yihuda dageeshshanni hirbange'ni Yessuussibaa shiqeexxi «Barachchiisalloo!» hiyyeexxi isoo sunqedhe, 46 Ookkonechchi uduma manni dage'e Yessuussii abideexxi usure. 47 Ookko bira uurremmake manni giddii'n mitti wolaantichcha gosheexxi qeesetike akeekisanji'a ergataammake manjichchixxa mansha woxe.

48 Yessuusinna insa'nen hiyyee qici, «Ha'no moodhalcho abiddina'neeshsha wolaantichchakanna meena abixxitineexxi anee abiddino'a dagginee? 49 Heddo barra Woyyichchi Galmi giddo barsiisa'n ha'nonni welti hedhenne wodda anee abiddineemmabaani; Maxaafiinki hiyyichchi muuxxemasha tinni kaddeeni.» 50 Ookkonechchi uduma duuchchiingi isoo waaleexi baaje.

51 Saala ifika buqedhate'e bayyanii calla odo'weeki dargaggeessi mitti kinni Yessuussii hordofa'nemmani. Iikki manninna konnee dargaggeessa belto abido'a hiyyee wodda: 52 Isinna bayyaanii ka'leemmaxxa huneexxi duwwittinni baaje.

53 Insa'nenna Yessuusii'i qeesetike akeekisanjibaa adhdhine me'ine: ookko qeesetiki akeekisanjuwwi, geedhetinna Muuseke seerik barachchiisalluwwi duuchchi bukki hiyye. 54 Pheexiroosinna isoo bayyii'ninni hordofa'ni qeesoletike akeekisanjike dalla'iqico'ni me'e: isinna ookko ofo'leexxi heqqanjuwwik welti giira gubadhdha'nemmani.

55 Qeesetik akeekisanjuwinna songotixxi geedhe duuchcha Yessuusii shinno'a dhugaa kulaaka manjo hanse: yaane kinni afa dandeenneba'a. 56 Heddi manni dhariki iso'n dhuga kulaa'naa hiyyichchi insa'neeki weli qabeba'a.

57 Mitti mitti manni dhariki dhugaa iso'ni ke'exxi kulaammaa qici, 58 «Konnee, ‹Manji ijaareka Woyyichcha Galma diigeennexxi, sase barra giddo wele manjiinxe anganni ijaaremebaaka ijaarannoni› hiyyaa'naa lanqeenneni.» 59 Iittanna kaddoole dhugaa insa'neexxi mitte afo'o kaddebaani.

60 Ookkonechchi uduma qeesoletiki akeekisanji insa'nee edo ke'e uurreexxi: «Kunni manni atee ku'la'neexxi ku'la maachcho? Hiissichcho affebexxoo?» hiyyexxi Yessuusii qore. 61 Yessuussi kinni sammi hiyye mittelchonna hiissebaani. Qeesetiki akeekisanjinna higgeenni isoo'o «Eebbisemeeke Magenik Belti Kiristoosi atette?» hiyyeexxi isoo qore.

62 Yessuusinna hiisseexxi: «Eeti anedeni; Manjiinki Belti Mageniinke midda'ni ofo'laa'naanna iimatenaa'n duumanchiki dagaa'naa uuddinaani» hiyye.

63 Qeesoletiki akeekisanjinna mufeti seemma ifixxa dareexxi «Yoona wele dhugaa kula no'aa mayee hassissa? 64 Ha'no yowwaa'naa laqqineeni: yoona ha'no'n maa fakkaatta?» Insa'nenna rewote isi'a hasissaani hine'e mitte afo'o kandeexxi iso'n murre. 65 Ookkonechchi uduma mitti mitti manni iso'ni hancufa tufate'n ke'e: ille isixxanna seemmati bunqeexxi tuntummoti isoo gana'n isoo'o, «Amo mee raaga haaso'i» hina'neemmani. Heqqamaki manni kinni kabaloti isoo gana'ni aadheexxi me'e.

66 Pheexiroosi dalla'i giddo aadi darree'ni hedhe'naa qeesetike umi'a ergataammake dubarri giddii'n mitte dagge. 67 Pheexiroosi giira guba'laa'naa dhaphphi hite isoo uuddeexxi: «Atinnaqqa Naazireetike Yessuusinni welti hexxettani» hite.

68 Isi kinni: «Ati hitaatenga ani ege'nebo'non, isoonna qalli hiyyabe'non» hiyyeexxi waakkate. Ookkoo'ni isi e'yinammaxxe hulabaa'n gadhi'a fule; eettene yanna lukko baroodde.

69 Iitti ergatendammaxxi dubarrichcho Pheexiroosii uudee wodda ookko uurreeke mannaa'ni: «Kunni manjichchi insa'ne giddii'ni isi mitteken» hita'n langaxxa insa'ne'ni haasootte. 70 Isi kinni higgeenni isoo ege'nebe'noni hiyye waakkate.

Shiixxoxxe yanna uduma ookko uurreeki manni Pheexiroosii'i, «Ati Geliilake manjo kada atixxi kokaken; ati insa'ne giddii'ni mitteken» hiyye.

71 Isi kinni «Konnee hitina'neeka manjichcho ani ege'nebe'ni» hiyya'ni ifi bada'ni kakate.

72 Ookkone hirba'ninni lukko langaxxa barroodde; Pheexiroosinna, «Lukko lamele barroddebaa ediga'ma sasele anee waakkattatton» hiyyeexxi Yessuusi haaso'eemmaka haaso'a qaabbate; ookkoo'ninna hiiqise oodhe.