1 Heenoxxe barra uduma Yessuusi Qifirnahoomik qachchibaa hige dage mini'a e'yeexxa ardi laqe. 2 Tennexxee minxi soro duuchcha midde gattebang boonchi gophemaa qico'ni heddi ardi bukki hiyye: Isinna Mageniinka hiyyichcho insa'ne'a lasse. 3 Ookkonechi uduma heenoki manni mitte gogeeka manjichcho shoole manjo'ni dukinsee Isibaa aa'ne idange 4 Insa'nenna aradiinxe bira sa'nenaa'ni kexxeexxa konnee majichcho Yessuusi hedheebaa idagatee dande'a gonpheexxi; miniinxe guutonaa'ni isi hedhemma darree'ni heellicho iimi'ni qo'a fulchineexxi gogeedhemaki manjichchi diipheemmaxxa rare ookkoo'ni butti'a dirrinse. 5 Yessuusinna insa'neexxa adde uudeexxi konnee gogeemmaka manjichcho, «Koo belto cubbo atixxi gattowaali hiyyendeeni» hiyye. 6 Ookko ofo'le hedheemmak mitti mitti Muuseke seerxxi borreessano tenne yaanexxee godob insa'neeki giddo, 7 «Kunn manjichchi mayee iitta heyye? Isiqqa Magenoke'ni yowwichiinka haaso'a mayee fulchedha'ne? Mageno mitte malee'e ayyete cubbo gattowwali hiyya dande'aki?» hine hende.

8 Yessuusinna hirbange'ni insa'nee godobik henda'neexxa irriki ege'neexxi; «Mayee'e iita heddina'ne? 9 Gogeeka manjichcho ‹Cubbo atixxi gattowwaali hiyyende'eeni› hiyyatena'ninna ‹Kexxettexxi rare atixxa dulkitetexxi me'i!› hiyyatena'ni heente shollexxa? 10 Yaane kinni Manjiinki Belti buttate'ni cubbo gattowaali hiyyate'e baallooma afeexxa egendinaashsha» hiyyati gogeemmaka manjichcho; 11 «Kexxe rare atixxa dulkitettexxi mine atikiba'a me'i!» hiyye. 12 Manjichchi kinna ke'eexxi duuchchiingi uudda'na rare ifixxa dulkeexxi me'e; ookkone booncho'ni hedhemmak duuchchi tenne kaddeexxe yaane'ni mambe'a hiyyeexxi; «Iitta hexxeexxa yaane hara uunde egennebo'noni» hina'ni Mageno galateeffante.

13 Higgeenn Yessuusi Galiilixxe abbaayyati qarqari'a me'e; heddi ardi Isiba'a dagee'na barsiise. 14 Ookko'ni sa'a'ni Ilfiyoosik belti Leewwi qarxa bukki assinammake booncho'ni ofo'le'naa uudeexxi, «Anee hordofi» hiyye. Isinna ke'eexxi Isoo hordofe. 15 Yessuusinna Leewike mine'ni ita ito'a ofo'lee'na, heddi qaraxa bukki assaammaki manninna cubbaaleeyye isoo hordofa'n Yessuusinninna hordofeeyye ifixxinni welti ofolle indaamman.

16 Feerisitotixxe gamo kaddeexxi Muuseke seerixxi borrissisano cubbaaleeyyetinna qaraxa bukki assammake manninni welti Yessuusi itaa'naa uundeexxi hordofeeyye isixxa, «Qaraxa bukki assammake manninninna cubbaaleeyyeti welti mayee Isi ita'ne?» hine qorre. 17 Yessuusinna insa'nee haasonna'nexxa laqeexxi, «Elagopheeke manni'a malee'e fayya hedheekee ci'leessi hasisabaani. Ani cubbaaleeyyete malee qulliyye aadde aago'a ye'onna dageebo'non» hiyye.

18 Yohaannisixxi hordofeeyyenna Feerisito agabo goddo honsa'nemmani. Mitti mitti manni dageexi Yessuusi'i, «Yohaannisixxinna Fariisitotixxi hordofeeyye agabo goddo hossaa'naa'a atixxi hordofeeyye agabo goddo hossabaachchi mayeete?» hine. 19 Yessuusinna insa'nee, «Waajubichch insa'nenni welti hedhee'naa jaaluwwi agabo goddo hosa dande'a? Waajubichchi insa'nenni welti hedhee'na'a agabo goddo hosa dandeennabaan. 20 Yaane kinni waajubichchi insa'neexxe oddonaa'ni adhdhemaaxxe yanna daggaani; ookkone wodda agabo goddo honsaani. 21 Fedheeki dullatte seemma'ni haarooxxa seemma eribaaki ayyinna hedhebaani; eribendoole kinni haarooxxi seemma dullatte daddarenshatinna edi irra ba'lataan. 22 Iittanni fedheeki duullatte qalqalo'ni reefika woyinetika bulibulo uggaaki hedhebaani; uggoole woyinetiki bulbuli qalqallo dhoosaan; woyinetiki bulbulinna dunemaan qalqallotinna baxxaani. Tennexxee haarooka woyinetik bulbulo ugga hasissaak haarooxxe qalqalo'niten» hiyye hiisse.

23 Edike Sanbatixxe barra'ni Yessuussi midhatike fichchi giddii'ni sa'a'naa Isinni welti me'itaammaxxi hordofeeyye tisha haa'mate'ni kexxe. 24 Feerisitotinna, «Edike sanbatixxe barra'ni hoyyendeexxa yaane mayee assita'ne?» hite Isoo qorte. 25 Yessuusinna insa'nee, «Daawwiti solo'wee woddanna itaacho harseemma wodda, isinni welti hedheemmake manninni maa asseexxa ha'no haaseessitinebaa? 26 Qeesoletike akeekisanjo Abiyaataarike baro'ni Mageniike mine'ni e'ye qeesoletee malee weli manni itaashsha eeti'i uwwendebaaxa woyyoommeka xalta ifi'a ite isinni welti hedheemmake manni'anna uwwe» hiyye. 27 Higgeenni Yessuusi insa'nee hiyyyee qici, «Edik Sanbati manjokee dademee malee; manji edike Sanbati'a dademebaani. 28 Tennexxee Manjiinki Belti edike Sanbati'a Goottakeni» insa'ne'a hiyye.