1 Yessuusi ookko'n ke'eexxi Yihudake bogibaanna Yordanoosike galaani wido hedheeke boonchibaa me'e. Ardikinna higgeenni isike qarqara'ni bukki hiyye; isinna konneechchi edo assaammashshanni insa'nee barsiise. 2 Feerisitotinna isiba shiqqeexxi; «Manji ifixxa are tika hasissaa?» hine isoo hega uundo'a qorre. 3 Yessuussinna insa'nee; «Muuse ha'noo maa hiyyee ajaje'e?» hiyye. 4 Ookkonechchi uduma insa'nenna «Muuseqqa tika ege'nishshaaxxa borro uwweexxi isee tiko'a ajajeen» hine. 5 Yessuusinna insa'nee hiyyee qici; «Muuse konne seera ha'no'a borreeseechchi qalbe ha'nooxi jabaxxe kaddemmaxxeeten. 6 Yaane kinni siretixxe dadanaa'ni safeexxi; Mageni labbakenna meyyaxxe asse insa'nee dade. 7 Tennexxee manji anna ifikanna ama ifixxa waaleexxi are ifixxini welti mitteke kandaan. 8 Insa'ne lamiingi mitte kandaani; ta'inni edi'a yoona insa'ne mitte biso malee lamekebaan; 9 tennexxee Mageni mitteba gudunfeeka; manji gargarti hiissoqqe» hiyye.

10 Insa'nenna higgeenni mini'a e'yinee wodda; hordofeeyye isixxi tenne yaanxee isoo qorite. 11 Isinna; «Are ifixxa tikeexxi wele mellaale aadhaaki are isixxi hedhoti hexxemmaxxee isi yabaabuleeni hiyyoteni. 12 Iittanni isenna aro'o iseka tikkeexxi wele labballo'ni heerundoole yabaabuldaan» hiyyoten.

13 Yessuussi angati qaqqabaashsha manni oose isibaa idage: hordofeeyye isixxi kinni oose idaggeemmaka manna xixxe hoyyite. 14 Yessuusi tennee uudee mufateexxi ifixxa hordofeeyye hiyyee qici «Oose anibaa dagguuni: insa'nee hoyyitinoqqe'e: Mageniinxi mootumma iitta insa'neeshsha hedhakixxeni. 15 Dhugaate ha'no'a hiyyaanneni: Mageniinxa mootumma oosetishsha kadeexxi adhdhabaaki duuchchi: Mageniinxe mootumma'ni hara e'yabaani» hiyye. 16 Isinna ettenee oose lu'medheexxi anga ifixxanna insa'ne'ni hana uggeexxi eebbise.

17 Yessuussi ookkoo'ni ke'eexxi me'a'neenge'ni, mitti manji isibaa gonga'ni dage: isi edo guluffateexxi, «Eloke barsiisanjo! Duuchchi woddixxa hedho alfonaa ani'a maa assiyyo hasissa?» hiyye isoo qore. 18 Yessuusinna, «Mayee anee eloke hitatto? Mitte Mageno malee eloki hedhebaani: 19 atinna ajajuwwa egendeetteni: shiltoxxe'e, yabaabuldoxxe'e, moortoxxee, dhariki dhugaa kuldoxxe'e, dassitoxxe'e, anna atikanna ama atixxa ulifeesi» hiyye hiisse'e iso'ni haaso'e. ✝ 20 Manjichchikinna iso'ni, «Barsiisanjo konnee ajajuwwa duuchcha oosumandenaa'ni heqqedheeneni» hiyye. 21 Yessuusinna isoo uudeexxi eeyye: «Yoona mitte yaane ati'a xe'yiteen: marte affetelcho duuchcha gurgurtettexxi hiyyeeyyetee uwwi! Atinna iimate'ni tuulendeexxa karra affatooni. Isinna ookkonechchi udumi'a dagge anee hordofi» hiyye.

22 Manjichchikinna tennee laqee wodda yo'oshsha yaade: isinna lumoxxa karra afeemmaxxee yaada'ni me'e. 23 Yessuusi elqe kayya uuda'ni hordofeeyye ifixe'ni, «Dureeye Mageniinxa mootumma e'ya hitta tatta a'urtaaxxe!» insa'ne'ni hiyye. 24 Hordofeeyye isixxinna konne isike haaso'a'ni mambe'a hite: Yessuusi kinni higgeenni lebeexxi insa'nee, «Tee oose! Mageniinxe moottumma'ni e'ya hitta ttaa a'urta! 25 Dureesi maniinji Mageniinxe mootumma'ni e'yati irra gaali marfetike qo'i giddii'ni sa'a shollexxaani» hiyye. 26 Hordofeeyye isixxinna weli'ann weli saaddeexi, «Yoona ayyete anjirema dande'a?» hite. 27 Yessuusinna insa'nebaa uudeexxi, «Tinni Magenoke'nite malee manjin darree'ni dandeessissabaan: Magenokee kinni duuchchinxi dandeessiissaani» insa'ne'ni hiyye. 28 Pheexiroosinna isoo, «Kunni no'o duuchchiinxa yaane waaleennexxi atee hordonfeenneni» hiyye. 29 Yessuusinna hiisseexxi, «Ani dhugaate ha'no'a hiyyaanneni; anxeenna eloxxe odoxxe hiyyeexxi mine yookaani dayyuwwakanna dayyuwwa yookaani ama yookaani anna yookaani oose yookaani fichcha waalaaki duuchchi: 30 ta'a konne baro'ni midde shorremat welti minuwwa, dayyuwwa kanna dayyuwwa amuwwa, oose, fichcha waalaaki dhibba dachcha'a adhdhabaaki dagake baro'ninna duuchchi woddixxa hedho alfaabaaki manji hedhebaan. 31 Yaane kinni ta'a ediseeki udu'maan; ta'a udu'meeki kinni edisaan» hiyye.

32 Insa'nenna Iyyerusaalemi'a me'aammake ora'ni he'nee'naa'a, Yessuusi hordofeeyye isixxi edo me'a'nemmani: insa'nenna mambe'a hine; weli isoo hordofaammakiir sodaateemmani. Higgeenna isi tommenna lamiinga ardi giddi'ni gargar hiisseexxi iso'ni geltaaxxa yaane insa'ne'a kula'ni hiyyee qic, 33 «Yoona Iyyerusaalemi'a qabantaanneni: Majiinki Belti qeesoletike akeekisanjuwwa'ninna Muuseke seerixxe barreessano'ni sa'isseme uwwemaani: insa'nenna rewotixxa murte iso'ni murraani: Yihudoota kadebaake manna'ni isoo sa'isine uunaani: 34 Isoo gacifantaan, iso'ni hancufakanna tunfaani, isoo jadhanfaani, ookko'ninna isoo shinnaani: isi kinni sakkaxxe barra uduma ke'aani» hiyye.

35 Ookkonechchi uduma Zebidewoosixxi labbaxxi oose Ya'iqoobinna Yohaannisi isiba shinqeexxi, «Barsiisanjo, Atee kadhantaaneexxa duuchcha no'aa assitotta'a hansaanneni» hine. 36 Isinna insa'ne'ni hiisseexxi, «Maa assonnaa hassina'ne?» hiyye. 37 Insa'nenna isoo, «Moottumma Atixxe'ni, mitti no'oki midda Atike'ni; mitti no'oki bita'a atike'ni ofollannoshsha no'o'a eetii uwwi» hine. 38 Yessuusi kinni insa'nee, «Kadhatina'neexxa egendinebaani; ani ha'wanoxxe buudanaa'ni ha'witino'a, ani cuuphemaannexxa cuuphensha ha'no cuuphema dandeettinaa?» hiyye. 39 Insa'nenna isoo, «Eeti dandeenannoni» hine. Yessuusi insa'nee hiyyee qici, «Ani ha'wannoxxe buudanaa'ni ha'witinani: Ani cuuphemaannexxa cuuphensha ha'nonna cuuphendinaani. 40 Yaane kinni midda anke'ni yookaan bita'a anke'ni ofo'laaki bakka iitti qixxesendeekiri'ate malee uwwannoki antebaan» hiyye.

41 Gatteexxi tomme hordofeeye Ya'iqoobi'ninna Yohaannisi'ni mufatte. 42 Yessuusi kinni insa'nee duuchchiinga mitteba ifiba bukki asse'e hiyyee qici, «Mageno ege'nebaake ardiki akeekisanjuwwi ardiinke galchalluwwa hiyyemme'e ye'emaaxanna insa'neeki akeekisanjuwwi insa'ne'ni baallooma anfeexxa ha'no egendineen. 43 Ha'nooxxe oddo'ni kinni iittatebaan: ha'nooxxe odd'ni lumoke kado'a hasaaki duuchchi ergatemaake kadowwaal. 44 Iittani ha'nooxxe oddonaa'ni sa'eeke kado'a hasaaki duuchchi duuchchiingike garba kadowwaali: 45 Manjiinki Belti dageechchi, ergatemo'anna heddi manni'a wodote kado'a dagee malee; isi'a erigatemmo'a dagebaan» hiyye.

46 Ookkonechchi uduma insa'ne Iyyarkoke qachchibaa dange. Yessuussinna hordofeeyye isixxi heddi ardinni welti Iyyaarikoo'ni fulla'neengge'ni; ille ba'eeki Xemewoosik belti Berxemewoosi orake'ni ofo'le kadhata'nemmani. 47 Ookko'ni sa'a'neek Naazireetike Yessuusi kadeexxa laqee wodda, «Daawwitike belto Yessuussi ballo'o; ani'a marari!» hiyya'ni raare. 48 Heddi manni sammi hiyyi hina'ni xinxe: isi kinni, «Daawwitike belto ballo'o ani'a marari!» hiyya'ni woldi irra raare. 49 Yessuusinna uurreexxi insa'nee, «Isoo ye'we!» hiyye. Insa'nenna ille ba'eemmaka manjiichcho, «Mee co'o ke'i! Atee ye'a'neeni!» hine. 50 Isinna seemma ifixxa huneexxi utaale ke'eexxi Yessuusibaa dage. 51 Yessuusinna isoo, «Maa ati'a assonnaa hassaatte?» hiyye. Ille ba'eemmakinna, «Barsiisanjo afonnaa hasaannen!» hiyye. 52 Yessuusinna isoo, «Misiyyi! Amana atixxi atee fayyisse'eni» hiyye. Iikki woddi ille afate'e dande'e: isinna Yessuussixxa duuka hordofa'ni me'e.