1 Higgeen Yessuusi Muuseka seera barsiinsammake mine'ni e'ye; ookko anga gogeeki manji hedhemmani. 2 Iso'ni yaane hasaammaki manni, edike Sanbatixxe barra'ni manjichcho konnee fayyisa'neexa uundo'a heqqe'naamman. 3 Isinna anga gogeeka manjichcho, «Bukki hiyyeeke ardi edo kexxe uurri!» hiyye. 4 Yessuusinna, «Edike Sanbatixxe barra'ni eeti uwwendeek eloxxa assatemo yookaani elobaaxxa assate? Manjiinxa lubbo anjiratemo yookaani shiyate?» hiyye insa'ne'e laqe. Insane kinni sammi hine. 5 Yessuusinna qalbe insa'neexxixxe duudaa yaadeexxi; qarqara isike'ni uurreemmaka manna mufeti uudeexxi; ookkonee manjichcho «Anga atixxa diriirsi!» hiyye. Manjichchikinna anga diriirsse; anga isixxinna fayyite. 6 Feerisitotinna iikki woddi Yessuusi'i hitta assine shinnaaxxa Heeroodisixxe gamo kadeeke manninni welti mari'atatte'ni ke'ne.

7 Yessuusi hordofeeyye ifixxenni welti abbaayyatiba me'e; Geliilanaa'ninna Yihudanaa'n dageemak heddi ardi isoo hordofe; 8 Isi huja'neexxa yaane laqeemmak manni Yihudaa'n, Iyyerusaalemi'ni, Edoomiyaaasii'ni, Yordanoosike galaani wido hedheeke boganaa'ni ittanni Xiroosi'ninna Sidoona qarqarii'n Isibaa dange. 9 Bukki hiyyeek ardi isoo dhiibabaashsha shiixxoxxa hobolo hordofeeyye isixxi giissitaashsha ajaje. 10 Isinna heddo manna fayyiseemmaxxee; elagonpe'e abara uudaammaki duuchchi angati Isoo kisatee hokkokisaamman. 11 Fuggichchi hafuurruwwi isoo uudeexxe qixxe'ni Isi edo inba'ni, «Ati Mageniinke Beltoni» hiyya'ni raarrammani. 12 Isi kinni ayyumma ifixxa ege'nishabaashsha jabeesse insa'nee xixaamman.

13 Yessuusi koobatee'ni fuleexi eettenee isi eeyyeexxa ifiba'a dangaasha ye'e; insa'nenna isibaa dange. 14 Insa'nenna isinni welti he'naashsha, insa'neenna lallabateenna ergo'a tommenna lamiinga baalloonse; insa'neenna ergameeyye hiyye summa fulche*. 15 Insa'nenna fuggichcha hafuurruwwa fulchinashsha baalloonse. 16 Hariiremeeke tommenna lame hordofeeyye, Pheexiroosi hiyye summa fulcheek Simi'ooni, 17 Bo'aanergeesi yookaan dindimiinxe oose hiyye summa fulcheek Zebidewoosixxa labbaxxa oose Ya'iqoobinna dayyo isika Yohaannisi, 18 Indiryaasi, Filiphphoosi, Bartelomewoosi, Maatoosi, Toomaasi, Ilfiyoosik belti Ya'iqoobi, Taadewoosi, hinaafalli Simi'ooni; 19 Iittanni Yessuusi'i sa'isse uwweeki Asiqorootuke Yihudamman.

20 Ookkonechchi uduma Yessuusi mitte mine'ni e'ye. Isinna hordofeeyye ifixxi ita itatee dandeennabaaqico'ni higgeenni heddi ardi bukki hiyye. 21 Tennee laqeeki Isik firi, «Yessuusii maraateeni hinaaxxa odo laqeexxi» Iso'o abixxino'a dange. 22 Iyyerusaalemii'n daggeemmak Muuseke seerk barachchiissalluwwi, «Isi Bi'eelzebuuli afeedheen Isinna fuggichcha hafuura fulcha'neek; konne fuggichchi hafuurike akeekisanjo kadeeke Bi'eelzeebulinniten!» hine.

23 Yessuusinna insa'nee, «Durriisi durriisa hitta fulcha dande'a? 24 Weli'an weli qoqqoodendaaxxi moottumma jabaatte uurra dandeettabaan. 25 Mitti minihadi weli'an weli gargar higoole jabaate hedha dande'abaani. 26 Ittanni durriisi weli giba'noolenna weli qodema'noole ibaaxxa malee uurra dande'abaan. 27 Tennenaa'ni kexxeexxa mitti manji edise hunnaameessa manjo usurebaangi; hunnaameessa manjichchike minibaa e'yo'anna karra isixxa saama dande'abaan. Mine isika saama dandeenaak hunnaameessa manjichcho usuraa wodda callaan. 28 Dhugaate ha'no'a hiyyaanne; manjiinxe oose'a cubbonna yowwinaake yowwichchi duuchchi'a gattowwali hiyyendaan. 29 Yaane kinni Woyyichcha Hafuura'ni yowwichiinka hiyyichcho haaso'aaki duuchchi; duuchchi woddixxe cubboke ida kada melee; duuchchi woddi'a isi'a gattowwaali hiyyendabaan» insa'nee hiyye. 30 Yessuusinna tenne hiyyeechchi; «Iso'ni fuggichcha hafuura hedheeni» insa'ne hineemmaxxeetemmani.

31 Ookkonechchi uduma Yessuusixxi amanna dayyuwwi isiki; Isibaa dange; insa'nenna gadho uurrineexxi; manjo isiba eriginne ye'inse. 32 Qarqara isike'ni ofo'leemmaki heddi manni, «Ama atixxinna dayyuwwi atiki gadho uurrinee atee hansa'neeni» iso'ni hine. 33 Isinna hiisseexxi «Ama anxi ayyete dayyuwwi ankisi ayyeera?» insa'nee hiyye. 34 Isinna qarqara ifike'ni ofo'lemmake mannibaa uuda'ni, «Ama anxinna dayyuwwi anki konneterani! 35 Mageniinxa fedhi wonshaaki duuchchi; isi dayyo anke, dayyo anxenna ama anxeni» hiyye.