1 Yessuusi hordofeeyye ifixxe'n hiyyee qici «Mitti dureessi manjichchi karra isixxa isi'a galchaaka mitte manjichcho afe'emman; Kunni galchalli karra atixxa faangessa'neen hineexxi isoo aallanta'n konne dureessichcho'n kulle. 2 Tennexxee isoo ye'iseexxi iso'n, ‹Tinni ate'n laqennexxi yaane maachcho? Ta'ani edi'a ati anxe karrake galchallo kada dande'a gophphattaxxe galchitattaxxe anxe karraka hisaaba hujjettexxi ani'a shiqishi.›

3 «Iikki karrati galchallinna ifike godobi giddo, ‹Goottii anee galchallummatenaa'n hoyyo'aten; wiilsunnaxxe hunna afebe'no; kadhatunnaxxe shoka'enne; tennexxee maassennexxa woyya? 4 Galchallummatenaa'n gatennexxe kaddoole manni ane'e mini'a adhdhaashsha egedhita maa assannoxxa anende ege'neennen.›

5 «Tennexxee ifike goottika liqa afeeka mitte mittenga manna ye'e. Isi taakkeessoka manjichcho, ‹Anke goottika hitteeka liqa affe'ette?› hiyye qore.

6 « ‹Isinna dhibba waaba zayite liqi ane'n hedheen› hiyye.

«Galchallikinna weli aaggotika atika woraqata ya, ‹Rakke ofoldettexxi itti onde tomme waaba hitettexxi borreessi› hiyye.

7 «Langakanna ye'eexxi, ‹Ate'nita me'eke hedhe?› hiyye iso'o qore.

« ‹Isinna, dhibba kuntaala dinne liqa afeennen› hiyye hiisse haaso'e.

«Galchallikinna atike liqika woraqata ya, ‹Ittinna shoole tomme kuntaala› hite borreessi hiyye.

8 «Goottikinna xuurammeessake kadebaaka ookkone galchallo qarumma isixxee isoo jaje. Tenne buttak manni ifike galdumixxe ifiinke manni irra qarontichchake. 9 Tennexxee ha'noo'ni kulo, tenne buttak maallaqi mudaa wodda duuchchi woddike mi'ne'n qophema alfitinaashsha konne maallaqinninni jaaluwwa ifi'a giisedhe.

10 «Shiixxooxxe yaane'ni xuraameessake kadeek lumoxxe'ninna xuurammeessake; hee'nooxxe yaane'n xuurammeessake kadebaak lumoxxe yaane'ninna xuurammeessakebaan. 11 Yoona tenne buttaxxe karra'n xuurammeessake kada gophphinoole dhugaatixxa karra'afa'i ayyete ha'noo'ni maganne uwwa? 12 Wele mannike maallaqa'n xuurammeessumma afa gophphinoole ha'noonxe kaddeexxa karra ayyete ha'noo'ni uwwa?

13 «Mitte yanna'n lame gootti'a ergatema dande'aak huun erganjinna hedhabaan; mitte jibbee wele eeyyaani; yookaan mittinbaa shikki hiyyee wele tuffata; Magenokeenna maallaqakee ergatemma dandeettinaba'a.»✝

14 Maallaqa eetammaxxi Feerisito tenne duuchcha laqqeexxi Yessuus'n gacifatte. 15 Yessuusinna insa'ne'n hiyyee qici, «Ha'noo manji edo ifi qulliyye manna assitinaan; Magen kinni qalbe ha'nooxxa ege'ne'een. Manji edo ulfateechchi Magen edo batto'eechchon.

16 «Muuseki seeriinkinna wabeekkotik maxaafi Yohaannisi qico'n lallabema'n ture'en; ookkonneechchi uduma kinni Mageniinxe mootummaxxi eloxxi odo kulende'eeni; manji duuchchinna ookko e'yatee jaba qico wo'laanaan.✝ 17 Yaane kinni seerakeenaa'ni mitte beddo ibbeexxi mannii'n iimatinna butta sa'a shollexxaan.

18 «Are ifixxa tikeexxi wele aadhaaki duuchchi yabaabula; aro'okenaa'ni tikendeexxa aadhaakinna yabaabula.»

19 «Baddeessittenna eloxxa layino oddo'weexxi, barra barra'n danqasha gala'n gammadaammak mitte dureessa manjichcho hedhemman. 20 Bisi isik duuchchi mada calla kade'ek Alaazaari hiyyemaake mitti hiyyeessi manjichchi konne dureessi manjixxe baxxe edo diiphaamman. 21 Kunni hiyyeessi ookkone dureessichchixxe qorenaa'n ibba'emmaxxa hanba midde ito'a halcha'emman; worshikinna gatebaang dageexxi mada isixxa arraaphpha'emman.

22 «Kunni hiyyeessinna reye; erganatinna isoo Abirihaami biri'a iyyemarte. Dureessichchikinna reyenna moogemeen. 23 Si'oole giddonna abara uuda'neebaa'n qokki hiyyeexxi Abirihaaminna Abirhaami bira hedhemmaka Alaazaarii'i afe. 24 Isinna hafuura gikki asseexxi, ‹Anna anke Abirihaamii! Ani'a marar; kaba giiratike bube'no'n jaba qico abara uudate'n hedheennaxxee'e, Alaazaari qubichcho ifika wodeeke'n cuupheexxi arrabo anka ani'a qiidisaashsha maganneten isoo ani'a ergi› hiyya'n raare.

25 «Abirihaami kinni hiisseexxi hiyyee qici ‹Anke belto! Ati buttate'n hexxattake baro'n eloxxa yaanuwwa adhdhitettexxa, Alaazaarinna fuggoxxa yaanuwwa adhdhemmaxxa qalliyyi. Ta'a kinni isi kaba dayya'aa wodda ati abara uudate'n hexxetten. 26 Tenne gadhi darre kabaa'n ha'noobaa sa'a hasaak dande'abaaxxa, ookko hedheekiirinna no'obaa foofabaashsha no'oxxenna ha'nooxxe oddo'n lumok bowwa'i hedhaashsha assende'een.›

27 «Durreessi manjichchinna hiyyee qici, ‹Anke anna yoona Ala'azaari anke annike minibaa ergitattoshsha atee kadhataannen. 28 Ani onde dayyuwwa afeennaxxe insa'nenna abara konneke boonchibaa dangabaashsha insa'ne xexxe'achchiisuun.›

29 «Abirihaami kinni, ‹Dayyuwwi atik Muusekanna wabeekotika maxaafuwwa afe'emmaxxe insa'nenaa'n laqowwaali!› hiyye.

30 «Dureessi manjichchinna, ‹Anke anna Abirihaamii! Iitatebaan; mitti manji reyotenaa'ni ke'eexxi insa'neba mareele yaandeexxi aadde aangaan› hiyye.

31 «Abirihaaminna, ‹Dayyuwwi atiki Muusekanna wabeekotika maxaaffuwwa laqa gonpha'noole mitti manji reyotenaa'n ke'eexxi insa'ne'n kuloolenna midde amannabaan›.»