1 Ookko bukkiyeemak duuchchiing mitteba ke'eexxi Yessuussi'i iyyemareexxi Philaaxoosi edo shiqinsheexxi 2 hina'ninna iso kulnete'n ke'nee qici, «Kunn manjichchi arda no'oka dedhisanna Qeesaari'aanna irro uwwendabaashsha hoyya'naa anfene; iittanna ‹Ani moyanjo Kiristoosite'n› hiyya'n haaso'aan» hine.

3 Philaaxoosinna Yessuusii'i «Ati Ayihudiinke moyanjoo?» hiyyexxi qore.

Yessuusinna, «Ati hitetenshanden» hiyye hiise haaso'e. 4 Ookkonneechchini uduma Philaaxoosi qeesetike sooresuwwi'aanna ardakee, «Miitte ballesanna midde konne manjichcho'n ani afebe'no» hiyye. 5 Insa'ne kinni, «Kunn manjichchi Geliilaa'n kaba'i qico'n Yihudake bogi giddo duuchcha'n barachchiisa'n arda weekenshate ke'issaan!» hine.

6 Philaaxoosinna, «Galiila» hiyyemaamaka hiyyichcho laqe wodda «Isi kunni Geliilake manjotaa?» hiyye qore. 7 Yessuusi dageek Galilike galchanaa'nite kadeexxa Philaaxoos e'gene wodda iso'o Hordisibaa erge; Heeroodisinna ookkone wodda Iyyerusaalemi hedheman. 8 Heeroodisinna Yessuusii'i afee wodda lumoosha gamade. Yessuusixxa odo laqeemmaxxe iso'o uudo'a heddolle yora'eman; iittanni Yessuusi mambe'a assaana'a uudo'a halcha'eman. 9 Heerodisinna Yessuusi'i heddo qortuma qore; Yessuusi kinni mitte hissichonna isi'a hisebaan. 10 Qeesetiki sooresuwwinna Muusseke seerxxi barachchiisano ookko uurineexxi isoo jaba qico ku'linaamman. 11 Heeroodisinna isike loliinki manninni welti Yessuusi'i tuffante iso'n gacifate; danchite seemmanna iso'n oddeeseenxi Philaaxoosibaa isoo ille iima hige me'aashsha asse. 12 Eetenne barra'n Heeroodisinna Philaaxoosi welti jaalomme; konneechchi edo insa'nexxe oddo'ni kajjo hexxemani.

13 Philaaxoosi qeesetika sooreesuwwa, galchalluwwanna arda mitteba ye'eexxi, 14 insa'ne'ni hiyyee qici: «Isi ‹Arda fuggoxxe ke'issaan› hitineexxi konne manjichcho anibaa iyyedagineen. Aninna kunse isoo ha'noo edo qore qo'nisenexxi ha'noo isoo ku'ltineexxa ku'la duuchcha konne manjichcho'n mitte balleesanna afeebo'non. 15 Iitanni Heeroodisinna iso'n mitte balleesanna afa gopheemmaxxe'e isoo no'oobaa illee iima erge'een. Yoona kunni manjichcho isoo reyote geesisaaxxa mitte balleesanna asse'ebaan. 16 Tennexxee ani isoo jadhafenexxi wocci assaaneni.» 17 (Ayyaanaa ayyaana'ni mitti usuremeek manji insa'ne'aa tikemaashsha hasisaammaxxeten.)*

18 Ardi duuchchi mittebaa «Konnee manjichcho fugguse; Berbaanii'i no'o'aa tiki!» hiyya'n hogise. 19 Baribaaninna qachchi giddo weekensha ke'issat manjo shiyeexxi usurinke mine'ni usuremeemmake manjomana.

20 Philaaxoosi Yessuusii'i tiko'aa haseexxi langaxxa ardake'n haaso'e. 21 Yaane kinni ardi, «Isoo fannsi! Fannsi!» hiyya'ni hogise.

22 Philaaxxoosi sakaaxxa yanna arda hiyyee qici «Kunn manjichchi hujeexxi balleesa maachcho? Ani iso'o reyote geesisaaxxa balleesa afa gopheennaxxee'e jadhafisenexxi wocci asanoni.» 23 Yaane kinni insa'ne, «Fannisi!» hinaa'ni hoginse. Hogi insa'neknna haranga bira sa'eeke kade. 24 Tennexxee insa'ne hansemashshani Philaaxoosi Yessuussi'n murte mure. 25 Lola ke'isseexxi manjo shiye usurememaka Baribaani'i insa'neke hasitishshani tikeexxi Yessuusi'i kinni eenneshsha asino'aa insa'ne'aa sa'isseexxi uwwe.

26 Tennexxe Yessuusi'i aa'nexxi abinde me'inaa'naa Simi'ooni hiyyemeeka Qereenake bogi manji haddi giddi'ni qachchiinbaa dagaa'naa anfe. Isoonna abindeexxi Yessuusixxa fanno dukinseexxi Yessuusi udumi'ni me'aashsha assine.

27 Heddi ardinna Yessuusi'i horidofa'nemaani. Insa'ne giddini lumoo qico yaada'ni laphphe ga'nitaa'ni ooxxaamaxxi melaalle hexxemani. 28 Yessuusi knn melaalletibaa wirri hiyyeexxi, «Ha'noo Iyyerusaalemixxi melaalle ha'no'aanna ha'nooxxe oose'aa oodhdhe malee'e ani'aa ooxxinoqqe'e! 29 Kunnise, ‹Ilde egendebaaxxi, oosse afebaaxxinna unuunsite egendebaaxi melaale eebisendexxi› hiyyendaaxxe barra dagaani. 30 Eetene yanna

« ‹Manni koobuwwa, «No'o'ni hana ibbee!»

tullichwwakanna «No'oo sho'wee!» hiyyate'ni ke'aani.›✝

31 Tinni yaane duuchcha manji shamooxxe haqqee'ni iitta assa'neexxe kaddoole bagoxxi haqqee'n fa'ii hitata assinu?» hiyye.

32 Iitaani fuggoxxa asseeka wele lame manna Yessuussini welti shino'a adhdhine me'ine. 33 «Qeraanyyote uminke qoonjo» hinna bonchcho genne wodda ooko'o Yessuussi'i fannote'ni fannise. Iittani lamiinxa dabbaleeyyenna Yessuussike midda'ninna bitta'a'ni fannse. 34 Yessuussinna «Anke anna kunn mann huja'nexxa ege'na gophphemaxxe'e insa'ne gattowaali hiyy!» hiyye.✝

Mannikinna Yessuusixxe seemma'ni hixxa ibilseexxi qoodemme. 35 Ardikinna uurexxi uuda'nemman. Akeekisano Yihudiinxi Yessuusi'i «Wele manna fayyiseemaani; yoona isi Magenokenaa'ni fileme'eke Kiristoosite kaddole ta'a umo ifika fayyilsowaali!» hiyya'ni isoo gacifaamman.✝ 36 Iittani loliinki manninna iso'n gacifata'n isibaa shiqeexxi qararitaaxxa ha'waa isi'a uuwwe.✝ 37 «Ati Ayihudiinke moyanjo kadetexxenni amoo umo atika anjir!» hina'nemman. 38 Isike umi iimi darre «Kunn Ayihudiinke moyanjoni» hitaaxxi borro Yessuusike umi iimi darre fannote'n uggineemman.

39 Yessuusinni welti fanniseendeexxe dabaaleeyyeenaa'ni mitti Yessuusii'i, «Ati Kiristoosindebaa? Amo mee umoo atikanna no'oo anjiri!» hiyya'ni isoo yowwaammani. 40 Yaane kinni langaki balleesanji Yessuusi'i yowwamaka manjichcho, «No'oo kaba tenne fakkaattaaxxe murte giddo he'nee'naa ati tennee hitato wodda Mageno midde soddataboxxo? Hiyye xixe. 41 No'o hunjeneexxe balleesa'aa murrite adhdhiyyo no'oxxi dhugaandeni; kunn manjichchi kinn balleesechchi hedhebaani.» 42 Ookkonneechchi uduma iikki manjichchi Yessuusii'i «Moottuma atixxe'ni dagato wodda anee kassi hiyyi!» hiyye. 43 Yessuusinna isoo, «Dhugaate ati'aa hiyyaanen telchonni aninni welti Gannatette'ni hexxatoni» hiyye.

44 Tinni kadde'ek barrixxe Jaane saate woddaman; eettene yannanaa'ni safee sallane saate qico'ni bogi duuchchi dukkane. 45 Arishshotinna dukkande; Woyyichchi Galmiinke seematik golinna haqqi hiyye oddo dareme.✝ 46 Yessuusinna hafuura gikki asseexxi, «Anke anna lubbo anixxa atixxe anga'ni magane uwwaneni» hiyye; tennenna hiyyeechchi uduma hafuur isik fule.✝

47 Ookkoo hedhemak dhibba loliinka manniki sooresi tenne kaddeexxa yaane uude wodda, «Kunn manjichchi dhugaandinni qulchakemaani!» hiyye Mageno ulfeese.

48 Tenne kaddeexxa yaane uudatee ookkoo bukki hiyyemaaki ardi duuchchi kaddeexxa yaane duuchcha uude wodda yaado lumoxxenni qoma ifixxa ga'na'ni ifi ifike minibaa hige. 49 Yaane kinn Yessuusii'i addaa ege'neemak manni duuchchi Geliilaa'n kexxe isoo hordofaammaxxi melaalna tenne kadda'nexxa yaane uuda'ni hanqonni uuriteemaani.✝

50 Yoona elokinna qullichchi manji Yihudenxe songoxxe geedhexxe gamo kade'ek Yooseefi hiyyemaak manjichchi hedheman; 51 kaddo malee'e isi Ayihudiinxe mari'eninna huje insa'nexxe'ni welti guddemabaani. Isinna Armatiyaasi hiyyemaake Ayihudink qachcha'ni hedhe'e Mageniinxe moottumaxxa dago heqqedhaaman. 52 Isinna Philaaxoosiba mareexxi Yessuusika rensha isi'aa uwwo'a kadhate.

53 Ookkonneechchi uduma isi renshakanna butti'a dirriseexxi layinotixxe seemmani mirqe. Huuni manjinna moogemebak kinjo qonte giisinek hirreesi giddo mooge. 54 Tenneenna assek Edi Sanbatixxe qophpheefachchotixxe yannaxxe safa'nittemman.

55 Yessuusi'i hordofeexxi Geliilaa'n daggeemaxxi melaale Yoosefini welti marte'e moogi boochonna rensha hitta massineexxa uude. 56 Ookkonneechchi uduma insa'ne ifike minibaa hingeexxi eloka foole affe'exxa shittonna qimame qophpheesine. Yaane kinni seerinshanni Edike Sanbatixxa barra hafuura adhdhine.✝