1 Yessuussi Iyyarkoke qachchi giddo e'ye'e ookko'n sa'eexxi me'ate'ni hedhemman. 2 Summi isiki Zekewoosi hiyyemaak mitti manjichchinna ookko hedhemman; isinna qaraxxa bukkassammakeeri'a umokenna dureessa manjomman. 3 Isinna Yessuusi hiyyema'neek hoonte kadeexxa iso'o uudo'a hasa'nemman; yaane kinni isi hojja harumaake kadeemmaaxxe'e isoo afa dande'ebaan. 4 Yessuusi ookkone ora sa'nemmaxxee edi'a gongeexxi mitte odi'i hana da'me.

5 Yessuusinna ookko geyee wodda qokki hiyyeexxi, «Koo Zekewoosi! Techcho ani atike mine'ni hosonna'a haseennen, rakke dirri!» hiyye. 6 Zekewoosinna rake dirreexxi gammashshoti Yessuussii mini'a adhdhe.

7 Ookko hedhemmak manninna tenne afeexxi, «Kunni manjichchi cubbaaleessiinke mine'ni keessummummati e'yeen!» hiyya'n Yessuusi'ni gungume.

8 Zekewoosi kinni uurreexxi Goottaa, «Goottaa kunse ani afennexxe karra duuchchinaa'n gamisa hiyyeeyyete'e uwwannoni; ayyennaa'ninna seeribelo adhdho'onnole, shoole anga assee hiissannon.»

9 Yessuusinna isoo, «Kunni majichchi Abirihaamixxe sanne kadeemmaxxee telcho anjirema konne mine'ni kadde'een. 10 Tinni kaddaachchinna Manjiink Belti dageechchi ba'eeka haso'anna anjiro'ate kadeemmaxxeten.»✝

11 Ardi tenne laqande'n hedhe'naan Yessuusi mitte mammaassa insa'ne'n mammaake; Yessuussi Iyyerusaalemi'a shiqe'emmaxxee mannake'n Mageniinxi mootumma ta'anni leellita'neechcho insa'ne'n labbemmaxxeetemman.✝ 12 Tennexxe isi hiyyee qici: «Mitti ulfeesseme'ek manjichchi moyanjummatika baallooma adhdhe higo'a bayyi boga me'e. 13 Ifike erganjuwwi giddii'n tomme ye'eexxi mitte mittenge tomme tomme minaane uwweexxi insa'nee, ‹Illee iima hige dagannoxxee konnee maallaqinni daddalle› hiyye.

14 «Ookkone bogik manni kinni isoo gibe'emmaxxe'e, ‹Kunni manjichchi no'o'ni moyo'a eenabe'no› hina'n isi me'eechchi uduma erganjuwwa ergine.

15 «Kaddo malee kunni manjichchi moyanjooke kadeexxi illee iima higeexxi ifike bogiba dage. Iikki ergajuwwinna isi uwweeka maallaqa daddalee me'e ibiseexxa ege'natee insa'ne ye'ise.

16 «Taakkaak erganji shiqeexxi iso'ni ‹Goottaa! Ane'ni uutettaxxi minaane tomme minaane ibisse'een› hiyye.

17 «Iikki goottinna; ‹ati xuraameessi erganji eloxxe assitetten heenooxxe yaane'n xuurameesake kadde afendeettaxxee tomme qachchuwwa'ni ati'a baalloomi uwwemeedheen› hiyye.

18 «Langak ergajinna shiqeexxi ‹Gootta! Ane'n uutettaxxi minaane onde minaane ibisse'een› hiyye.

19 «Gootti isikinna, ‹Ateenna onde qachchuwwa'n baalloonse'ennen› hiyye.

20 «Weli erganjinna shiqeexxi hiyyee qici, ‹Anke Goottaa! Ane'ni uuteettaxxi atixxii minaane kunnise; iseenna hoccote'ni guduunfe masseennan. 21 Tennee assennechchi ati massexxebexxong adhdhitattoke rokkebexxonginna haa'mitattoke hunnaameessa manjo kaddeettaxxe'e atee sodaatennaxxeeteni.›

22 «Gootti isikinna iso'ni hiyye hiisse haaso'ee qici, ‹Koo ati fuggichchi erganji, afo'o atikenni haasoottettenxe ate'n murannoni. Ani massedhebe'noong adhdhannoke rokebe'nookinna haa'mannoke hunnaammeessa manjo kadeennexxa egendeetexxen, 23 mayeeteta maallaqa anka daddale ibisammake manna'n uwwa gophpheettachchi? Silaati aninna dagennexxi maallaqa anka ibisemmalchinninni welti adhdhannan.›

24 «Ookkonneechchi uduma iikki goottinna ookko uure'emmake manna'n ‹Isixxa minaane isonaa'n aaxxineexxi tomme minaane afe'emmakee uwwe!› hiyye.

25 «Insa'nenna iso'ni, ‹Goottaa! Woldonni isiqqa tomme minaane afe'een!› hine.

26 «Gootti iikkinna hiyye hiisse haaso'ee qici, ‹Ha'noo'n kulo, afeenge manji'a caala uwwendaan, mitteelchonna afebaakenaa'n kinni itti afeenxi midde isinaa'n adhdhendaan.✝ 27 Yaane kinni ani insa'ne'ni moyajoke kada anxa gibeemmaka ookkone anka naapha kabaa iyyedaggineexxi ani edo insa'nee gorra'we!› »

28 Yessuusi tenne haaso'echchi uduma Iyyerusaalemi'a me'ate'n insa'ne edo hedhemman.

29 Debire Zayiti hiyyendaaxxe kooba qarqara hedheeke Beetefaagenna Biitaaniya hiyyemmaake olla'uwwibaa shiqeexxi ifixxe hordofeeyye giddii'n lame hiyya'n ergee qici, 30 «Ha'noo edo hedheeke olla'uwwibaa marree! Giddi'anna e'yitineexxi ayyinna iso'ni haranga gulufe ege'nebaaka harretiki darmichchi usuremeena'a affinaan; isoonna tikkine iyyedagge. 31 Ayyinna ha'noo, ‹Maye'e isoo tikkina'ne?› hiyye qoroole, ‹Isi Goottake hasisammaxxeeten hitineexxi ookkone manjo'n kulle.› »

32 Ergememmakiirinna mareexxi Yessuusi insa'ne'n kulemmaqicishsha yaane duuchchi kaddee'na anfe. 33 Insa'nenna ookkone harretika darmichhco tinka'neenge'n annuwwi isiki, «Konnee harretika darmichcho tikkina'neechchi mayeete?» hiyye qore.

34 Insa'nenna, «Goottakee isi hasisaammaxxeeten» hine hiissine haasoonne. 35 Insa'nenna ookkone harretika darmichcho Yessuusibaa iyyedangeegechchi uduma seemma ifi ifixxa ookkone darmichchike dudduri hana uggineexxi Yessuusii gulufinse. 36 Yessuusinna me'aa wodda manni seemma ifi ifixxa orake'n fayaamman.

37 Yessuusinna Debire Zayitexxe koobaba'a adadde me'aammake oribaa shiqee wodda isoo hordofaammak lomooshsha heddi manni ookkone uudeemmake mambe'uwwixxee gammada'n hafuura gikki asseexxi Mageno saadate'n ke'e:

38 «Goottiinke summinni daga'neeke moyanjixxa wodo!»✝

«Nage'i iimate'n, ulfinnikinna ale iimate'ni Magenoke'e kadowwaal!»

39 Ookkonneechchi uduma ardi giddii'n mitte mitte Feerisito Yessuusii'i, «Barachchiisalloo! Hordofeeyye atixxi sammi hitaashsha xixi!» hite.

40 Yessuussinna, «Ha'noo'ni kulo insa'ne sammi hinoole kino raartaani» hiyye hiisse haaso'e.

41 Yessuusi Iyyerusaalmike qachchibaa shiqeexxi ookkone qachcha uude'e hiyya'ni isi'aa oodhee qic, 42 «Atike nage'i'a hasisaachchi maachcho kadeexxa silaati telcho egende'ettele hitta eloxxemmaa! Yaane kinn tinni yaane atixxe illenaa'n sho'onde'een. 43 Naaphi atiki atixxe dowwe'ni dalla'iinsha buqeexxi atee rakkisaaxxe barra daggaani! 44 Ateenna atike dallaa'i giddo hexxeexxa atixxa oose buttinake'ni gangalchinaan. Weli hana diingeebaak waale'naa'a ati giddo gaataak mitti kinji midde hedhabaan. Tinni kaddaachchi Mageni ati'a dageexxa yanna ege'naa gophphettaxxeeten.»

45 Yessuusinna galmi giddi'a e'yeexxi ookko dadda'laammaka manna gadhi'aa shorra'n 46 insa'ne'ni, « ‹Mini anki soodachchotike mine hiyyemaan› hiyyende borreessende'en; ha'noo kinni ‹isoo bokkaammetixxe wolo'o assexxine'en!› » hiyye.✝

47 Yessuusi barra barra'nini galmi giddo barachchiisa'nemmani. Ookkone wodda qeesetiki sooreessuwwi Muuseke seeriki barachchiisalluwwinna ardiinki akeekisanjuwwi isoo shiyatee hasa'nemmani.✝ 48 Yaane kinn manni duuchchi Yessuusika haaso'a laqatee qalbeti iso'n hedhemmaxxee isoo shiyatee hasa'emmak manni mitteelchonna assa dande'ebaan.