1 «Qalbe ha'nooxi yaaddoqqe'e! Magenoke'n amanne; ane'ninna amanne. 2 Anke annike mine'ni heddi hedhati mini hedheen; sila iitta kada gophpheele, ‹Ani ha'no'a booncho giissonaa me'annoni› hiyyannabaan. 3 Ta'a Ani marennexxi booncho ha'no'a giissenechchi uduma Ani hedhennebaa ha'nonna hexxinaashsha langaxxa hige dagannoni anibaanna ha'noo aadhannon. 4 Ani me'annoke boonchibanna geesisaaka ora ha'no egendine'een.»

5 Toomaasi isoo hiyyee qici, «Gootta; ati habaa me'itaateexxa no'o egennebe'no yoona ookkone ora hittata ege'na dandeennanno?» hiyye. 6 Yessuusinna iso'n, «Orii, dhugaatinna hedho Anten. Ani darre'nite malee Aabiba'a dagaaki hedhebaan» hiyye hiise haaso'e. 7 «Ha'no anee egendineele Anna ankanna sila egendinnamman. Ha'noo isoo uuddineemmaxxee ta'anni edi'a yoona isoo egendinaan.» 8 Filiphoosinna, «Gootta! Aabii no'o'n leellishi! Isoo uudan calli no'oo gelte'een» hiyye. 9 Yessuusinna hiyyeexxi iso'n hiissee qici, «Koo Philiphphoosii! Konne qico Ani ha'noonn welti hedhene wodda midde ati anee egendebexxoo? Anee uudeek Aabii uude'een; hittata ati, ‹Aabii no'o'n leellishi!› hitaatto? 10 Ani Aabi'ni hedhenneexxa, Aabinna Ane'ni hedheexxa ati amandabexxoo? Aninna ha'no'ni hiyyaannek hiyyichchi baallooma ankennitebaan. Yaane kinni huje duuchcha huja'neeki ane'ni hedheeke Aabiten. 11 Ani Aabi'ni hedhennashshanni Aabinna Ane'ni hedheexxa ha'no anee amanne: weletinna gattoole ha'no isixxe manbe'iinxe hujexxee anee amanne. 12 Ani dhugaate ha'no'n hiyyaannen; Ane'ni amanaak Ani hujannaxxa huje isinna hujaan. Buutotinna Ani Aabibaa me'aannaxxee isi tennenaa'ni caaldeexxa yaanuwwa hujaan. 13 Beltokenaa'ni kexxeexxa Aabi ulfaataashsha ha'no Anke summi kadhattinaaxxa yaane duuchcha Ani ha'no'a assannon. 14 Ha'no feeteexxa yaane anke summinni laqqinoole Ani assannon.»

15 «Ha'no anee eetina'noole ajaja anka heqqexxinaan. 16 Ani Aabii kadhatannoni: Isinna ha'nonni welti duuchchi wadda hedhaaka wele dayyeessallo ha'no'a uwwaan: 17 Isinna dhugaatike Hafuuran: isoonna butta duuchcha uudabaakenna egendebaake kadeemaxxee isoo adhdha dandeettaba'a. Yaane kinni isi ha'noonni welti hedhammaxxeenna iittanni ha'no giddo afemaammaxxee ha'no isoo egendinaan. 18 Ani ha'noo hado affebaaxxe ooseshsha qofi waalabe'no. Ani ha'nobaa hige dagannoni. 19 Shiixxooxxe yanna uduma kaba butta duuchchiki manni anee uudaba'a. Yaane kinn hano anee uuddina. Ani hedhot hedhannoke kadennaxxee ha'noonna hedhoti hexxinaan. 20 Ani, anke Annake'ni hedhdheennexxa, ha'noonna ane'ni hexxineexxa, Aninna ha'no'ni hedheennexxa eettene barra ha'no egendinaan: 21 Anee eeyyaaki ajaja anka adhdheexxi heqqedhaakeni; anee eeyyaakanna Anni anki isoo eeyyaan: Aninna isoo eeyyaannoni; iso'ninna ifi leellshannon.»

22 Ookkoneechchi uduma Asiqorootuke Yihuda kadebaak weli Yihuda iso'n, «Goottaa! Yoona butta duuchchike manna'nite kaddeebaak ati no'o'n leellittatto qici hittatee?» hiyye.

23 Yessuusinna iso'n hiyyee qici, «Anee eeyyaaki hedhoole hiyyichcho anka heqqedhaan: Anni ankinna isoo eeyyaan: no'o isibaa dangannon; isinni weltinna he'nannoni. 24 Anee eeyyabaak hiyyichcho anka heqqedhabaan. Kunni ha'no laqqina'neek hiyyichchi anee ergeemmake Aabike malee ankebaan.

25 «Ani ta'a ha'noonni welti hedhennaxxee tennee ha'no'n kuleennen. 26 Aabi anke summinni ergaak dayyeessalli Woyyichchi Hafuur kinni duuchchiinxa yaane ha'no'n barachchiisaan; isi ani ha'noo'ni kulennexxa duuchcha kassi hitinaashsha assaan. 27 Aninna nage'a ha'no'a waalannon: nage'a ankanna ha'no'a uwwannon. Ani ha'no'a uwwannok nage'i kaba butta duuchchike nage'ishatebaan. Qalbe ha'nooxxi, yaadoqqe'e, iittanni sodaattoqqe'e.

28 « ‹Ani me'annon higennexxi ha'nooba dagannon hiyyennexxa ha'no laqqine'een› Ha'no silaa Anee eetine'eele Aabi anee caalammaxxee ani Aabibaa me'a anxe'ni silaa ha'no gammaddinnamman: 29 ha'noo'ni Ani haaso'ennexxi muuxende'naa ha'no amandinaashsha iitti yaane kaddebaang edisee ta'a ha'no'ni kuleennen. 30 Kaba butta duuchchiki galchalli durriisi dagaammaxxee konnechchi edi'a Ani ha'noon welt lumo qico haaso'abe'non. Isi ani hana mittechchonna assatika baallooma afebaan. 31 Yaane kinn ani Aabii eeyyaannexxa, Anni ank anee ajajeexxanna assaannexxa butta duuchcha egendaashshaten.

«Ke'we ta'a kabaa'ni me'ino.»