1 Yessuusi soodachcho muuxeechchi uduma ifixxe hordofeeyyenni welti hedheexxi Qediroonixxe dhooqabaa widi'a me'e; isinna hordofeeyye isixxenni welti ookko hedhemmake hiddichchiinke fichchi giddi'a e'ye. 2 Heddo yanna Yessuusi hordofeeyye ifixxenni welti ookko afemaammaxxee isoo sa'isseexxi uwweemak Yihuda ookkone booncho ege'neeman. 3 Yihudanna loliinka manna iittanni qeesetika sooreessanna Feerisitotibaa'ni ergemeeka Woyyichchi galmika heqqanjuwwa isi edo hedhe akeeka'ni ookkone hiddichchuwwiinke fichchibaa dage. Insa'nenna xassa, faanosenna loliinka miya abixxineemman.

4 Yessuusinna iso'ni gelta'neexxa duuchcha ege'ne fuleexxi insa'nee, «Ha'no hassina'neek ayyete?» hiyye.

5 Insa'nenna isoo, «Naazireetike Yessuusi hansaannen» hine. Yessuusinna insa'ne'n, «Anten» hiyye. Sa'isseexxi uwwammak Yihuda insa'nenn welit uurreemman. 6 Yessuusinna insa'ne'ni, «Anten» hiyye wodda insa'nenna udumi'a shikki shikki hineexxi buttinake'n inbe.

7 Higgeenni Yessuusi insa'nee, «Ha'no hassina'neek ayyete?» hiyye qore. Insa'nenna iso'ni, «Naazireetike Yessuusi hansaannen» hine.

8 Yessuusinna insa'ne'n hiisseexxi, «Ha'no'n, Anten hiyyeennen; Ha'no Anee hassina'neexxe kaddoole, me'inuun insa'nee waalle» hiyye. 9 Tinninna kaddeechchi isi, «Konne Ati ani'a uutetteeke manni giddii'ni mittikinna midde Anenaa'ni ba'ebaan» hiyyeeki hiyyichchi muuxemaashshaten.

10 Wolaantichcha abixxemmak Simi'ooni Pheexiroosinna wolaantichcha golsheexxi qeesetike soorersike erganjixxa middixxa mansha woxe. Ookkone erganjik summinna Malkoositemman.

11 Yessuusinna Pheexiroosii'i, «Wolaantichcha atika gonofi giddi'a hiissi! Aabi ani'a uwwaaxxa rakkotixxa buuda Ani ha'wabe'nota?» hiyye.✝

12 Ookkonneechi uduma loliinki mann insa'nek ajajallinninna Ayihudiinke heqanjuwwinni welti Yessuusii'i abinde usureexxi, 13 Edinseexxi isoo Haanna hiyyemaake manjichchibaa iyyemarre. Eettene wogga'n Haanna umo qeesichcho kadeemmake Qeyyaafa'a ballokemman. 14 Qeyyaafanna, «Mitti manji ardakee hiyyeexxi reyole woyyan» hiyyeexxi Ayihuda gorseemmake manjomman.✝

15 Simi'ooni Pheexiroosinna mitti weli hordofalli Yessuusii hordonfe. Iikki weli hordofallinna ookkone umo qeesichcho'n ege'nemeeke kade'eemmaxxee isi Yessuusinni welti ookkone umo qeesichchike dalla'i giddi'a e'ye; 16 Pheexiroosi kinn hulati gadho uureemman. Qeesetike akeekisanjo'ni ege'nemeeki iikki weli hordofallinna udumi'a hige'e hula heqqitammaxxa yaansiseexxi Pheexiroosii aadhe e'ye.

17 Iitti hula heqqitammaxxi dubarrichcho Pheexiroosii, «Konne manjichchixxe hordofeeyye giddii'ni mitti atetebaa?» hite. Isinna, «Waawwoti» hiyye. 18 Iitti yannanna boojjetixxe kaddemmaxxee ergatemaammak manninna hula heqqammakiiri giira ha'ishee uurreexxi guba'laa'naa'a, Pheexiroosinna insa'nenni welti uurree giira guba'laamman.

19 Ookkone wodda umi qeesichchi Yessusii'i isixxe hordofeeyyexxeenna isi barachchiisaammaxxe barachchoxxee qore. 20 Yessuusinna iso'n hiyyeexxi hiissee qici, «Ani kaba butta duuchchike manna'n farri assee haaso'eennen; Ayihudi duuchchi bukki hiyyeexxi Muuseka seera baratammaba, woyyichchi galmi giddo duuchchi wodda ani barachchiiseennen. Ani sho'ik haaso'enechchi hedhebaan. 21 Mayeete ati anee qortaattechchi? Haaso'aa'naa leqemmaka manna qori! Yoona Ani haaso'eennexxa insa'ne egennaan.» 22 Yessuusinna tennee haaso'ee wodda, ookko isi bira uureemmake hula heqqammakerinaa'n mitti, «Umo qeesichcho'n iitta hiissitee haasotatto?» hiyyerxxi isoo kabale. 23 Yessuusinna isoo, «Ani fuggoxxa haso'oonnole fuggoxxe haasotteetteni hiteetexxi ku'li. Dhugaa haaso'oonnole kinni mayee Anee gandatto?» hiyye. 24 Ookkoneechchi udum Haanna Yessuusi usureemeeshshanni hedhee'naa umo qeesichcho Qeyyaafaba'a erge.

25 Eettene yanna'ni Simi'ooni pheexiroosi uurreexxi giira guba'la'neenge'ni weli manni isoo, «Ati hordofeeyye isixxi giddii'ni mitti atetebaa?» hiyye. Isinna hiisseexxi, «Waawwoti» hiyye waakkate. 26 Umi qeesichchi'a ergataammake manni giddii'ni mitti Pheexiroosi mansha woxemmake manjichchike fira kadeek isoo, «Hiddichuwwiinke fichchike booncho'ni Ani atee isinni welti uudeennabaa?» hiyye qore. 27 Higgeeni Pheexiroosi waakkate; hirba ookkone'ninni lukko baroodde.

28 Ookkoneechchi uduma Ayihuudooti Yessuusii Qeyyaafabaa'n Roomike bogike galchallike dalla'i giddi'a adhdhe me'e. Yannatinna gorsa bariisatemman. Ayihudikinna sa'atike ayyannika beltanjo ita hasissammaxxee iteexxi batto'abaashsha galchaliinke dalla'i giddi'a e'yebaan. 29 Tennexxee Philaaxoosi insa'neba'a gadhi'a fuleexxi, «Ha'no konne manjichcho ku'litina'neechchi maacho?» hiyye qore.

30 Insa'nenna iso'n, «Kunni manjichchi balleesa afa gopheechcho kaddeele sila no'o ati edo shiqinshannabaan» hineexxi hiisine haasonne. 31 Philaaxoosinna insa'nen, «Ha'no umo ha'noogeenninni isoo adhdhitine me'itineexxi ha'nooke seerishshanni iso'ni murre» hiyye. Ayihudikinna isoo, «No'o ayye'ninna reyotixxa murte murratee seera anfebe'non» hiyye. 32 Tinni kaddeechchi Yessuusi hitta hexxeexxe reyonni reyaaxxa isi umo ifingenninni haaso'eemmak hiyyichchi muuxemaashshaten.✝ 33 Ookkoneechchi uduma Philaaxoosi dalla'i giddi'a e'ye; Yessuusiinna ye'iseexxi, «Ati Ayihudiinke moyanjoo?» hiyye isoo qore. 34 Yessuusinna, «Kunni yaadi ati ifi'aanni hitaattekemo'o? Yookaan weli manni anxee ate'ni kuleeke?» hiyyeexxi hiisse haasoe'e. 35 Philaaxoosinna iso'n, «Ani Ayihudichchokeeta? Atee anibaa ergeeki atinge firanna umo qeesen. Ati maacho balleesitete?» hiyyeexxi hiise haaso'e. 36 Yessuusinna isoo hiisseexxi, «Anxi mootumma tenne buttaxxebaan; iitta kaddeele Ayihudi anee abidabaashsha erganjuwwi ank ani'a lolamman. Yeene kinni anxi mootumma tenne buttaxxebaan» hiyye. 37 Philaaxoosinna isoo «Yoona Ati moyanjoke hiyyotebaataa!» hiyye. Yessuusinna, «Ani moyanjoke kadennexxa ati hiteettexxi dhugaaten: Ani ilemennechchi, kaba butta dagenechchi dhugaatixxee kulonnaaten; dhugaatenaa'ni kadeek duuchchi ani hiyyennexxa laqaan» hiyyeexxi hiise haaso'e. 38 Philaaxoosinna, «Dhugaa isii maachcho?» hiyye. Isinna tennee haaso'echchi uduma higgeenni Ayihudiinbaa mareexxi insa'nee hiyyee qici, «Ani iso'ni mitte balleessanna afebe'no: 39 yaane kinn ha'no sa'atike ayyaana'ni mitti manji usurrakenaa'ni tikemaaxxa baranno affineen: tennexxee ‹Ayihudiinka moyanjo ha'no'a tikonnaa hassina'nee?› » 40 Insa'nenna higgeenni cancina'ni, «Waawwo'o; isotebaan! Berbaanii'i no'aa tiki!» hine. Barbaani kinn shittakemman.