1 Feerisito Yohaannisi caala Yessuusi heddo manna hordofeeyye asseexxanna xammaqeexxa laqqe; 2 kaddo malee xammaqeek Yessuusite kadebaak isixxe hordofeeyyemman. 3 Goottikinna tennee ege'ne'e Yihudaka boga waaleexxi Geliila'a hige me'e. 4 Semaariya giddii'n sa'a isoo hassisse'eemman.

5 Tennexxee isi Semaariya giddo Ya'iqoobi belto ifike Yooseefi'a uwweeke bogi bira hedheeke Siikaar hiyyemaake qachchibaa dage.✝ 6 Ookkonna Ya'iqoobixxi wode'iinxi bale hexxemman. Yessuusinna oriinxe me'anni gopheemmaxxee eettene wode'iinxe bale bira ofo'le; iitti yannanna barrixxe jaane saatebaatemman.

7 Ookkone wodda mitti Semaariyichcho manjichcho wode'e ikkilto'a daggee wodda Yessuusi isee, «Konne wode'inaa'ni ha'wonaa ani'a uwwi» hiyye. 8 Eettene yanna'n hordofeeyye isixxi itatichcho hirto'a qachchi'a me'iteemman. 9 Tinni Semaarichcho manjichcho Yessuusii'i, «Ati Ayihudichchoke kaddee hitta anee Samariyichcho wode'e anee ha'wisi hitatto?» hite; isenna tennee hiteechchi Ayihuudoti Samaritoti mittooma afa gophammaxxeeten.*✝

10 Yessuusinna ise'n, «Mageniinxa uwwa egendeettelenna wode'e ani'a ha'wisi hiyyeeki ayyete kadeexxa sila egendeettele atinni isoo kadhattattan isinna hedhotika wode'e ati'a uwwamman» hiyye hiise haaso'e.

11 Manjichotinna iso'n hitee qici, «Anke Gootta ati ikki'littattochcho affeebexxon: baletinna yo'oshsha qeerraaxxe kaddemmaxxee konne hedhotika wode'eta habaa'n affatto? 12 Dhugaandinni ati tennee wode'iinxa bale no'aa uwweeke anna no'oke Ya'iqoobinaa'n saxxatto? Isinna isixxi oose, hori isikinna tennee balenaa'ninni ha'wineen.» 13 Yessuusinna ise'n hiyyeexxi hiise haaso'ee qici, «Konne wode'enaa'n ha'waak duuchchi higgeenni dheebo'waan; 14 Ani uwwannoke wode'enaa'ni ha'waak kinni haranga dheebo'wabaan; ani isi'a uwwannok wode'i isi giddo duuchchi woddixxa hedho phu'issaaxxe wode'iinxe muumme kadaan.» 15 Manjichotinna isoo, «Anke Goottaa ani dheebo'wabe'noshshanna wode'e ikki'lonaa kaba dagabe'noshsha maganne konnee wode'e ani'a uwwi!» hite.

16 Yessuusi ise'n, «Marte aro'o atika yexxe kabaa higi!» hiyye kule. 17 Manjichchotinna, «Ani aro'o afebe'non» hite hiisite haasote. Yessuusinna ise'n hiyyee qici, «Aro'o afebe'non hiyya atixxi dhugaanden; 18 dhugaaten ati onde aro'o affe'eettan; ta'a atinn welti hedheekinna atike aro'o kada gophemmaxxee tinni haasottetexxi dhugaaten.» 19 Manjichchotinna hite hiissite iso'n haasotee qici, «Anke Goottaa ati wabeekichchoke kaddeetexxa ta'a ege'nenne. 20 Annuwwi no'ok tennee kooba hana sagandeen; ha'no Ayihuudi kinni manji sagada hassissaaki Iyyerusaalemike qachcha'niten hitinaan.»

21 Yessuusinna ise'n hiyyee qici, «Tee manjichcho tenne kooba'ninna kaddo Iyyerusaalemi'ni Aabi'a sagadinaaxxi yanna daggaaxxa anee amani. 22 Ha'noo Samarto egedinebaakee sagaddinaan; no'o kinn anjirema Ayihudakenaa'nite kaddeexxa egeneennaxxee sagandaanen. 23 Dhugaati sagadaakiiri Aabi'a, hafuurikinna dhugaati sagadaaxxe yanna daggaan; ta'anni dagge'een; Aabinna iittanni isoo dhugaati sagadaakaara eeyyaan. 24 Mageni Hafuuraken, isoo sagadaakiirinna Hafuurikinna dhugaati isoo sagada hassissaan.» 25 Manjichchotinna, «Kiristoosi hiyyemeek Mesihi dagaaxxa ani ege'nennen; isi dagaa wodda duuchchiinxa yaane no'n kulaan» hite. 26 Yessuusinna ise'n, «Ateenni haaso'aannengiqa Ani isoten» hiyye.

27 Ookkone wodda hordofeeye isixxi higge dagge. Insa'nenna isi meyyaxxenni welti haaso'aa'naa uunde mambe'a hine; yaane kinn, «Ati maachcho hassaatte?» yookaan, «Ati isenni welti mayee haasottaatte?» hiyye isoo qoreeki mittikinna hedhemmabaan. 28 Ookkoneechchi uduma manjichchotinna odolcho ookkonni waaldeexxi qachchi giddi'a ille iima higgeexxi ardake'n, 29 «Assennexxa duuchcha ane'ni kuleeka manjichcho amme uudde! Akimagaada isi Kiristoosite kaduu?» hite. 30 Insa'nenna qachchi giddii'ni fulleexxi isi hedhebaa marre. 31 Eettene yanna hordofeeyye isixxi isoo, «Barachchiisanjoo, sagale iti» hite kadhate.

32 Yaane kinn Yessuusi insa'ne'n, «Ha'no egendinebaaxxa ani itannoxxe ita afeennen» hiyye.

33 Ookkoneechchi uduma hordofeeyye isixxi weli'aan weli, «Dedha manji isi'a itaachcho iyyedagu'uu?» hite.

34 Yessuusinna insa'ne'n hiyyee qici, «Anxi ita anee ergemmakixxa fedhii assatenna huje isixxa muuxaten. 35 Ha'no, ‹Shoole agenji uduma haamatixxi maye geltaan› hitina'nebaata? Kunse Ani ha'no'n haamatixxi maye gelteexxa qokki hitine ookkonee fichcha uudde! Hiyyanneen. 36 Iikki haamaki ta'atenna kaddoole midde runda adha'neen; duuchchi woddixxe hedho'a kaddaaxxa gumma bukki assaan; tennexxee iikki rokaakinna haamaak mittenba gammandaan. 37 Tennexxee ‹Mitti rokaan; weli kinn haamaan› hiyyemeemmak iikki mammaasi dhugaaten. 38 Aninna ha'noo elootinebaaxxa haandino'a ha'noo ergeennen; weli eloositaaxxa huje huje; ha'noo kinn insa'ne eloonneemmaxxa gumma bukki assitine.»

39 Manjichchotinna, «Isi ani assennexxa duuchcha ane'n kule» hiteexxi dhugaa kuldemmaxxee, ookkone qachchanaa'n heddo Semaariyak manni Yessuusi'ni amane. 40 Tennexxee Semaariyak manni isibaa dagee wodda isi insa'nenni welti turaashsha jabeessine isoo kadhante: isi ookkoonna lame barra ture. 41 Isike hiyyichchonaa'ninna kexxeexxa weli heddi manni iso'ni amane. 42 Insa'nenna manjichchote'n, «Ta'a no'o iso'n amannaannechchi ati no'o'ni kuldeetexxe calli'aatebaan; no'o umi no'ongenninni isi hiyyeexxa lanqeennen. Kunni manjichchi dhugaaten butta duuchchike anjirallo kadeexa no'o egeneennen» hine.

43 Lame barra uduma isi Geliila'a me'e. 44 Yessuusi ifinge uminninni «Wabeek ifike boga'ni ulfeessemabaan» hiyye haaso'eemman.✝ 45 Yaane kinni isi Geliila geyeeshanni Geliilak manni gammashshoti isoo qophedhe; tinninna kaddeechchi insa'ne sa'atike ayyaana'ni Iyyerusaalemi he'nemmaxxeenna isi ookkoo asseexxa duuchcha uundemmaxxeeten.✝

46 Yessuusi wode'e woyintixxe booka assemabaa Geliilake boga'ni hedheeke Qaanake qachchibaa langaxxa dage. Eettene yanna Qifirnahoomi giddo belti isik elagopheek mitti mootummatike minik ja'laabi hedheemman.✝ 47 Kunni manjichinna Yessuusi Yihudake boginaa'n Geliila'a dageexxa laqee wodda, isi Yessuussibaa mareexxi reyo shiqeeka ifika belto dageexxi fayyisaashsha isoo kadhate. 48 Yessuusinna iso'n, «Haanonna ha'no beessisuwwakanna mambe'uwwa yaane uuddinebaak amandinabaan» hiyye. 49 Iikki ja'laabi manjichchinna iso'n «Anke Goottaa anki belti reyebaang magaanneten ani'a dhaqqabi» hiyye. 50 Yessuusinna, «Belti atik hedhoti hedhaani kexxe missi» hiyye.

Manjichchikinna Yessuusi haaso'eeka hiyyichcho amaneexxi me'e; 51 isinna orange'ni hedhee'naa erganjuwwi isiki isinn afemmeexxi, belti isik lubbondinni hedheexxa iso'ni kule. 52 Manjichchikinna belti ifik heene yanna'ni fowwi hiyyeexxa insa'nee qoree wodda iso'n, «Eebbinji isoo wocci asseeki bereqe torbaane saate'niten» hine. 53 Beltiink anninna iitti sa'aate Yessuussii, «Belti atik hedhoti hedhaan» hiyyexxe yanna kaddeexxa kassi hiyye. Tennexxee isinna isik mini hadi duuchchi Yessuusi'n amanne. 54 Kunninna Yessuusi Yihudake boganaa'n Geliila'a dageexxi hujeeke langake mambe'iinke beesisan.