1 Feerisitoti giddii'n Ayihudiinke sooreessuwwinaa'n Niqodimoosi hiyyemaak mitti manjichchi hedhemman. 2 Isinna hashsha Yessuusibaa dageexxi, «Ee, barachchiisalloo Mageni isinn welti hedheeka manjo malee ati assitetteka mambe'iinka beessisuwwa fedheek assa dande'ammabaaxxee ati Magenibaa'n daggetteke barachchiisallo kaddetexxa egenneennen» hiyye. 3 Higgeenni Yessuusinna, «Ani dhugaate ati'a hiyyaannen; fedheeki manji langaxxa ilemoole malee Mageniinxa mootumma uuda dande'abaan» hiyyeexxi hiise haaso'e. 4 Niqodimoosinna, «Manji cimeechchi uduma hitta ilema dande'a? Isi langaxxa ilemo'a higgeenni amatike godoba'ni higa dande'a?» hiyye qore. 5 Yessuusinna hiyyeexxi hiisse haaso'ee qici, «Dhugaate ate'n hiyyaannen fedheek manji wode'ikinna Hafuuriki ilema gophoole Mageniinxa mootumma e'ya dande'abaan. 6 Maalakenaa'n ilemeek isi maalaken; Hafuurakenaa'n ilemeek hafuuraken. 7 Ani, ‹Ha'no langaxxa ilema hassissaan› iitta hiyyeennexxee ati mambe'a hitoxxe'e. 8 Diidallo eettebaa diidalleessitaan luuljo isekanna laqqatton. Yaane kinn diidallo habaa'n daggaaxxa, habaa me'itaaxxa egendebexxon. Hafuurakenaa'ninna ilemeek duuchchi iitanden.»

9 Niqodimoosinna, «Tinni hitta kada dandeeta?» hiyye iso qore. 10 Yessuusinna Niqodimoosi'n, «Ati Isira'eelike barachchiisanjo kaddeenni hexxe'e tennee yaanuwwa egendebexxoo?» hiyye hiise haaso'e. 11 Aninna dhugaate ate'n hiyyaanneni no'o egennennexxe haasonnannon; uundenexxanna dhugaa kullannoni; ha'no kinn dhugaa kula no'oxxa adhdhitinebaan. 12 Ani buttatixxa yaane ha'no'n kulee'naa amandinebaaki manni iimatixxa yaane ha'no'n kulennele hittata amandina? 13 Iimatenaa'ni dirreeka Manjiinka Belto malee iimi'a me'eek ayyinna hedhebaan. 14 Muuse bago baga'n bofa fannisemmashsha Manjiink Beltinna iittanni fannisema hassissaan.✝ 15 Tinninna iso'ni amanaaki duuchchi, duuchchi woddixxa hedho alfaashshaten.

16 «Iitanni iso'ni amanaaki duuchchi, duuchchi woddixxa hedho afaashshate malee ba'abaashsha Mageni mitte Belto ifika sa'isse uwwaa qico'ni butta duuchcha hara eeyyeen. 17 Mageni Belto ifika kaba butta duuchcha'ni ergeechchi kaba buttike manna'ni muro'aate kaddebaak butta duuchcha isi darree'n anjiro'aaten. 18 Iso'ni amanaake duuchcha'ni murte murendabaan; iso'n amanabaak kinn mitte Mageniinke Beltike summa'n amana gophemmaxxee qaranni iso'ni murende'een. 19 Murtetinna tenneten: iikki ifi kaba butta duuchcha'ni dageeni; manni kinni huje insa'nexxi elobaaxxe kaddemmaxxee ifiin irra dukkana eeyye. 20 Elobaaxa yaane assaaki duuchchi ifa jibbaan; huje isixxinna farri hite leellitabaashsha isi ifiinbaa dagabaan. 21 Dhugaa assaak kinn huje isixxi Mageniinxe fedhiinni hujendeexxe kaddeexxa farri hite leellitaashsha isi ifiinbaa dagaan.»

22 Ookkoneechchi uduma Yessuusinna hordofeeyye isixxi Yihudake bogibaa me'ine: isinna ookkoo xammaqa'ni insa'nenni welti shiixxooxxa yanna ture. 23 Eettene yanna Yohaannisinna, Saalemi bira Heenoon hiyyemaake booncho'ni heddi wode'i hedheemmaxxee isi manna xammaqa'neemman; mannikinna ookkoo xammaqematee dagaa'neemman. 24 Tinninna kaddeek Yohaannisi usuremebaa edi ga'mamman.✝

25 Tennexxe mitte mitte Yohaannisixxi hordofeeyyexxenna Ayihudiinxe oddo'n anshedhatike galdumixxee moronsha kexxe. 26 Insa'nenna Yohaannisibaa dangeexxi iso'n, «Barsiisanjo Yordanoosi wido atinni welti hedhemmak; atinna isixxee dhugaa kuldeettak manjichchi kunse xammaqa'neen; manji duuchchinna isibaa me'a'neeni» hine. 27 Yohaannisinna hiyye hiissee qici, «Iimi'ni isi'aa uwwendeexxe kaddoole malee fedheek manji mitteechchonna alfa dande'abaan. 28 ‹Ani Kiristoositebaan; yaane kinni isi edo ergemeennen› hiyyennashshaanni ha'noo umo ha'noogenninni dhugaa kuldinaan.✝ 29 Waajubichcho, waajubichchiinxen; hafuura isika laqatee isi bira uurraki jaali kinni waajubichchiinka hafuura laqaa wodda isi yo'osha gammadaan. Iikki gammadi anken; isinna ta'a kunni muuxxemeen. 30 Yohaannisi lebeexxi, Isi lummedhdha ani kinn shiixxedhdha hasissaan.

31 «Iimi'ni dagaak isi duuchchiinga caaleeken: buttatike kadeeki buttatingen; isinna buttatinxe haaso'aan. Iimi'ni dagaak duuchchingenaa'ni caaleeken; 32 isi uudeexxanna laqeexxa dhugaa kulaan; yaane kinni dhugaa kula isixxa adhdhaak hedhebaan; 33 isixxa dhugaa kula adhdhaak iikki manji, Mageni dhugaatike kadeexxa kokeesse. 34 Mageni Hafuura ifika laakkossi belo uwwaammaxxee iikki Mageni ergeeki Mageniinka hiyyichcho haaso'aan. 35 Mageni Aabi Belto ifika eeyyaan; duuchchiinxa yaane anga isixxe'ni uwwe'een.✝ 36 Ookkone Belto'ni amanaak duuchchi, duuchchi woddixxe hedho afe'een, ookkone Belto'ni amanabaak kinn Mageniinxi mufe iso'ni hexxaa malee'e hedho alfabaan.»