1 Yannatinna sa'atike ayyaani edi darre; Yessuusinna tenne butta duuchchanaa'ni Aabibaa me'aaxxi yanna gelteexxa ege'nee. Butta duuchcha'n hedhemmakaara, ifike assedheemakaara eeyye; duuchchi woddixxe jaalalanni insa'ne eeyye.

2 Insa'nenna hashshixxa ita inda'neege'ni; daabiloosi Simi'oonik belti Asiqorootuk Yihuda Yessuusii sa'isse uwwaashsha qalbe isixxe'ni fuggoka yaada ugge. 3 Yessuusinna, Aabi baallooma duuchcha isi'a uwweexxa isinna Mageniinbaa'ni dageexxanna iittanni Mageniinbaa me'aaxxa ege'neemman. 4 Tennexxee isi itatenaa'n ke'eexxi hana odo'weemmaxxa seemma butta ugge; hidhake'ninna fooxa usudhdhe. 5 Ookkoneechchi uduma isi qorete'n wode'e ibiseexxi ifixxe hordofeeyyexxa lekka ansha'n hidhake'n usudhdheemmake fooxinni fiyate'n ke'e.

6 Yessuusinna Simi'ooni Pheexiroosibaa dagee wodda Pheexxiroosinna, «Anke Gootta ati anxa lekka anshittatto?» hiyye. 7 Yessuusinna, «Ati ani assaannexxa ta'a egendebexxon: uduma kinn kassi hittatton» hiyye hiise haasoe'e.

8 Pheexiroosinna, «Waawwo'o, haranga duuchchi woddi'a lekka anxa ati anishitabexxoni» hiyye.

Yessuusinna, «Ani lekka atixxa ansha gophonnole ati aninni welti mittooma affeebexxon» hiyye. 9 Simi'ooni Pheexiroosinna «Anke Gootta yoona iittate kaddeexxinni lekka calla kadebaaki anga anxanna umo ankanna anshi!» hiyye. 10 Yessuusinna, «biso anshedheeke manji'a hassissaaxxi lekka ifixxa calla anshadjate; gateeki isik bisi duuchchi kinni ca'ichchaken. Ha'noona ca'ichchaken; yaane kinn ha'no duuchchiingi ca'ichchakebaani» hiyye. 11 Yessuusinna, «Ha'no duuchchiingi ca'ichchakebaani» hiyyeechchi isoo sa'isseexxi uwwaaki ayyete kadeexxa ege'nemmaxxeeten.

12 Isi lekka insa'nexxa ansheechchi uduma, seemma oddo'we ifike booncho'n hige ofo'leexxi insa'nee hiyyee qici, «Ha'no'a assennexxa qalbefatina'nee? 13 Ha'no anee, ‹Barachchiisallokenna Goottake› hitina'neen; ani bariachchiisallokenna Goottake kadennaxxee iitta hiyya ha'nooxxi dhugaaten. 14 Yoona, ani ha'nooke Goottanna barachchiisalloke kadeennexxi lekka ha'noxxa anshennexxenni ha'noonna iittanni weli'ani weli lekka ha'nooxxa ansha hassissaan. 15 Ani ha'no'a assenneshshanni, ha'noonna iittanni assitinaashsha fakkeenna ha'no'a uwweenneni. 16 Ani dhugaate ha'no'n hiyyaannen; garbichchi ifike goottanaa'ni sa'abaan; erganjikinna iso ergaemmakenaa'ni sa'abaan.✝ 17 Yoona ha'no tennee yaane egendineexxi assitinoole eebbisendinaan.

18 «Ani tennee haaso'annechchi ha'noo duuchchingeetebaani; ani fileenneekara ani ege'neennen. Yaane kinn ‹Budeena anka aniinni iteengi naaphummati ane'ni ke'e› hiyyaki Maxaafiinki hiyyichchi muuxemaashshaten 19 Tinni kaddaa wodda ante kadenneexxa amandinaashsha tinni kadebaang ediseenni ta'a ha'no'ni kuleenneni. 20 Ani dhugaate ha'no'n hiyyaannen; ani ergenneka adhdhaak anee adhdhaan; anee adhdhaakinna anee ergeeka adhdhaan.» ✝

21 Yessuusi tennee hiyyeechchi uduma yaadik akkateexxi «Ani dhugaate ha'no'n hiyyaannen, ha'no giddii'n mitti anee sa'isseexxi uwwaan» hiyya'n farri asse haasso'e. 22 Isixxi hordofeeyyenna isi tennee ayyixxee haaso'eexaa ege'na gophat mekki hiteexxe weli'aanni weli uudde. 23 Insa'ne giddii'n, mitti Yessuusi eeyyammaak, hordofalli Yessuusixxe qoma bira ofo'leemman. 24 Simi'ooni Pheexiroosinna konne hordofallo qipheexxi «Ayixxee haaso'eexxa isoo qori!» hiyye. 25 Isinna Yessuusixxe qomabaa cillaaqeexxi «Goottaa! Ayyeete isi?» hiyye qore. 26 Yessuusinna «Ani konnee ga'masuma buddeena qore giddo bookkennexxi iso'n uwwannoke manjon» hiyye. Iitta hiyyeechchi uduma buddena qore giddo bookkeexxi Simi'oonike belto'n Asiqorootuke Yihuda'n uwwe. 27 Yihuda buddeena adhdheenge hirba'ni durriisi iso'ni e'ye. Yessuusinna Yihudaa «Assitaattexxa rakkettexxi assi!» hiyye. 28 Kaddo malee Yessuusi mayee iso iitta hiyyeexxa ayyinna ege'nemmabaan. 29 Yihuda maallaqa abida'neeke kadeemmaxxee mitte mitte hordofeeyye ayyaanake hasisaachcho no'aa hiro'a yookaani hiyyeeyyetee maallaqa uwwo'a Yessuusi haaso'eechcho insa'ne'n labbeemman. 30 Yihudanna ookkonee ga'masuma buddeena adhdheeshshanni fule me'e; yannatinna hashshatemman.

31 Yihuda fuleechchi uduma Yessuusi hiyyee qici, «Ta'a Manjiink Belti ulfaate; iso'ninna Mageni ulfaate. 32 Yooni Mageni iso'n ulfatoole, Magenikinna Belto ifika ifike umininni lummisaan; isinna iikki woddi isoo ulfeesaan.

33 «Anxe oose, ani ha'noonni welti turaanneki heenooxxe yanna'aten; ha'noonna anee hassinaani; Ayihudiinke baalloomiinke manna'n ‹Ani me'anobaa ha'noo dagae dandeetinabaani› hiyyennashshanni, ta'anna ha'no'n tennende lebe hiyyaannen.✝

34 «Ani ha'no'n haarooka ajaja uwwaannen; kunninna ha'no weli'aanni weli eetino'aate; yoona ani ha'noo eeyyennashshann ha'noonna weli weli eeyye.✝ 35 Ha'no welinn weli eetineexxe kaddoole hordofeeyye anxe kaddineexxa manni duuchchi tenne'ni ege'naan.»

36 Simi'ooni Pheexiroosinna Yessuusii'i, «Gootta ati habaate me'itaatteki?» hiyye qore.

Yessuusinna iso'n, «Ani me'aannobaa ta'a ati hordofa dandeettabexxoni yaane kinni uduma anee hordofatton» hiyye hiise haaso'e.

37 Pheexiroosinna iso'n, «Goottaa mayee ta'a atee hordofa dande'a gophanno? Ani atixxe buuto'a lubbo anxanna kaddoole midde ati'a sa'isse uwwannon» hiyye.

38 Yessuusinna iso'n, «Ati dhugaandinn anxe buuto'a lubbo atixxa ani'a sa'issitee uutatto? Ani dhugaate ate'n hiyyaannen; lukkichchi baroodebaa edi darre sasele anee waakkattatton!» hiyye hiise haasoe'e.