1 Yessuusinna Sa'atik ayyaani ulfeesemo'a jaane barra gattaa wodda; reyotena'ni ke'isemmak Alaazaari hedhammaba Biitaaniya'a dage. 2 Ookkoo Yessuusi'a hashshixxi ita qophesende Maartanna ergatenda'nemman. Ookkoo itatee Yessuusinn welt ofo'lemmake mannanaa'ni mitti Alaazaaritemman. 3 Ookkonneechchi uduma Maarami hiri fiixeexxa xarmuusetika gamisa ca'ite Nardoosixxa shitto aaxxe daggeexxi Yessuusixxe lekka'ni issiteen: isenna umiinke ordichchinni lekka isixxa filte. Mini giddonna shittotixxi fishshe wo'mite.✝ 4 Yaane kinn hordofeeyye isixxi giddii'n mitti, Yessuusii'i sa'isse uwwaak Asiqorootuk Yihuda hiyyee qici, 5 «Tinni shitto sase dhibba Diinare'ni gurgurre'naa konne maallaqa hiyyeyyetee mayee uwwema gophe?» hiyye. 6 Isi tennee haaso'echchi maallaqiinka subba abidaammak isote kadeemmaxxe'e ookkone massinammake maallaqanaa'ni ifixxe la'o'ni hosisaammake modhalcho kadeemmaxxeete malee isi hiyyeyyetee yaadetebaan. 7 Yessuusinna hiyyee qici, «Tinni shitto ani moogemannoxxe barra'a qophphesitexxe kaddeemmaxxee isee waalle! 8 Hiyyeeyye heene yannanna ha'noonni welti hexxeen; ani kinn duuchchin wodda ha'noon welti hedhabo'non» hiyye.✝

9 Ookkone wodda heddi Ayihudiink manni Yessuusi Biitaaniya hedheexxa insa'ne egenne dange: dangeechchinna Yessuusixxe'e hineete calla kaddeebaak, Yessuusi reyotenaa'ni ke'isemmaka Alaazaari'i uundo'atemman. 10 Tennexxe qeesetik sooreesuwwi Alaazaarinna shinno'a mari'ante. 11 Tinninna Alaazarixxe daafenni heddi Ayihudiink manni Yessuusibaa mara'ni amanaammaxxeeten.

12 Langa barixxa gorsa ayyaanefato'a dageeki heddi ardi Yessuusi Iyyerusaalemi'a daga'neexa laqe. 13 Insa'ne meexxetika shafa abinde isoo qophe'no'a fulle. Insa'nenna hafuura gikki assineexxi:

«Hosa'inna! Goottiinke summinni dagaaki eebisemeken!»

«Isira'eelik moyanji eebbisemeeke!» hina'ni cancine.✝

14 Yessuusinna harretixxa beltanjo afee ise'ni hana gulfe; tinninna kaddeechchi, 15 «Tee Tsiiyoonnixxe belto sodaattoxxee! Yoona moyanji atiki harretixxe beltanjo'n hana gulufe dagaan» hiyyeme borreessemeeki raagi muuxemo'aten.✝

16 Hordofeeyye isixxinna tenne yaane duuchcha sirete'n qalbefatemmabaan; yaane kinn Yessuusi ulfaateechchi uduma ookkone wodda tennee isixxe'e borreessendeexxanna insa'nenna tenne isi'a assendeexxa kassi hine.

17 Isinna Alaazaarii'i mooggokenaa'n ye'e woddanna reyotenaa'ni isoo ke'isse wodda; isinni welti hedhemmaki mann ke'a isixxa dhugaa kullaammani. 18 Heddi manninna konne mambe'iinka beessisa Yessusi asseexxa laqeemmaxxe'e isoo qophedho'a fule. 19 Tennexxe Feerisito weli'aanni weli «Yoona maa assa dandeesissa? Uuddineeni! Butta duuchchik ardi iso'o hordofeen» hine.

20 Ayyanake'ni magenoonfachchote dageeke manni giddi'ni mitti mitti Girkeeke mannammani. 21 Insa'nenna Geliila giddo hexxeexxe Beete sayidake manjo kadeeke Filiphphoosibaa dangeexxi, «Gootta, No'oo Yessuusi'i uundonaa hansaannen» hine. 22 Filiphphoosinna dageexxi Indiriyaasi'ni kule: Indiryaasinna Filphoosi lamiingi ke'ne marreexi Yessuusi'n kulle.

23 Yessuusi hiisseexxi, «Manjiinki Belti ulfessemaaxxi yanna gelteeni. 24 Ani dhugaate ha'no'aa hiyyaannen; dinnetixxi sanne buttinake'ni ibbe reya gophoole qofinni gattaan: ise rertoole kinn heddo gumma gummissaani.✝ 25 Hedho ifixxa eeyyaaki isee gophaan; kaba butta hedho ifixxa gibaaki kinni duuchchi woddi'a hedho isoo heqqitaan. 26 Ani'aa erigato'a hasaaki duuchchi anee hordofowwaal. Ani hedhenneba anki erigajinna ookkoo hehdaan; ani'a ergataakanna Anki Aabii isoo ulfeessaan.

27 «Ta'a fa'i lubbo anxi wixixxi hite'en; yoona maata hiyyanno? Ee, Annayyoo, tenne yanna'ni anee anjiir hiyyootaa? Waawwoti! Iitta hiyyabo'noshsha kinni Ani dagennelchchi tenne rakkotixxe yaane'aten. 28 Ee, Annayyoo, summa atika ulfeesi!»

Ookkonneechi uduma, «Ani ulfeessennen: higgeenna ulfeesannon» hiyyaak hafuuri iimatena'ni dage. 29 Ookkoo hedhemmak hafuura isixxa laqeeki heddi manni, «Dindinsoten» hine. Weli kinn «Iimike erganjo iso'ni haaso'een» hine. 30 Yessuusinna hiyye hiisee qici, «Kunni hafuur dageeki anxete kadebaang ha'nooxxeeten; 31 tenne butta'a murte murendaxxi yanna ta'aten; tenne butta duuchiki galchanji ta'a gadhi'a hunemaan. 32 Yaane kinni Ani buttii'ni iimi'a shikki shikki hiyyanno wodda manjo duuchcha ifiba'a shiqishanno.» 33 Isinna tenee haaso'echchi hitta hexxeexxe reyonn isi reya'neexxa ege'nisho'atemman. 34 Ardikinna iso'o, « ‹No'oqqa, Kiristoosi duuchchi woddi'a hedha'neexxa seerakena'ni lanqeenen› yoona ati knn hita ‹Manjiink Belti iimi'a shikki shikki hiyya hasissaan› hitatto? Isi kunni Manjiinki Belti ayyete?» hine.✝ 35 Ookkonneechchi uduma Yessuusi hiyye insa'ne'ni haaso'ee qici, «Ta'inni edi'a shiixxooxxe yannaa ifi ha'no'n hedheen; dukkanatinna ha'no'ni daggebaang ifi ha'no'aa hedhee'naanni mammaremme! Dukkanate'ni maremaak isi habaa me'a'neexxa ege'nabaan. 36 Ha'noo ifiinxe oose kaddinaashaa: ifi ha'no'aa hedhe'naanni konne ifa'ni amanne!» hiyye. Yessuusi tenne haaso'echchi uduma insa'nenaa'ni gargar higee ifi sho'e.

37 Yessuusi konne mambe'iinka beessisuwwa duuchcha insa'ne edo assoolenna midde insa'ne iso'ni amanneban. 38 Tinninna wabeekkichchi Issayaasi,

«Gootta dhugaa kula no'oxxa ayyeteta amane?

Goottiinxi hirre ayyi'a leelltee?» hiyye haaso'emmak hiyyichchi muuxemaashshaten.✝

39 Tennexxe insa'ne amana dandeennebaan; tinninna wabeekkichchi Issayaasi wele bakka'ni hiyye haaso'ee qici,

40 «Ille insa'nexxa balla'ake asseen;

qalbe insa'nexxanna jabeessen;

Tennexxee insa'ne ille ifixxenni uundabaan;

qalbe ifixxe'ninna galche'nabaan

Ani insa'ne'e fayyisab'noshsha insa'ne hingabaan.»✝

41 Issayaasinna tenne hiyyeek Yessuusika ulfinna isi uudemmaxxeten tennee isixxee haaso'e. 42 Tinni kaddoolenna Ayihudinke sooresuwwi giddi'ni midde gateebaang heddi manni Yessuusi'ni amane; yaane kinn Feerisito Muuseka seera barantammake minenaa'n insa'nee fulchinabaashsha sodaantemmaxxee insa'ne iso'ni amanneexxa farri assine kullammabaan. 43 Tinninna kaddeechchi insa'ne Magenokenaa'n kadeeke ulfinni irra manjokenaa'n kadeeke ulfinna eenemmaxxeeten.

44 Ookkonneechchi uduma Yessuusi hafuura gikki asseexxi hiyyee qici, «Ayyinna ane'n amanoole ane'ni calla kadebaang anee ergemmake'ninna amaneeken: 45 Aneenna uudaaki isi anee ergekanna uudaan. 46 Ane'ni amanaak dukkanate'ni hedhabaashsha ifake kade'e kaba butta duuchibaa dagenneni.

47 «Hiyyichcho Anka laqeexxi heqqedhabaake'ni murte uwwannok Antebaan. Ani kaba butta duuchchika manna anjironnaa dagenne malee kaba butta duuchcha'n muronaa dagebo'non. 48 Anee adhdhabaake'ninna hiyyichcho Anka tuffataake manjo'ni muraake hedheen; Ani haaso'annok hiyyichchi umi isingininn udumixxe barra baro iso'ni muraan; 49 tinninna kaddeechchi Ani ifike baalominni haaso'ebo'no ani hiyyanexxanna haaso'annoxxa ajaja uwweeki anee ergeeke Aabiten. 50 Isik ajaji duuchchi woddixxe hedho kadeexxa egenneennen. Tennexxe Ani haaso'annoxxi duuchcha Aabi ane'ni kuleexxe haaso'annen.»