1 Ookkoneechchi uduma Yessuusi Xibiryadoosixxe abbaayya bira higgeenni ifixxe hordofeeyye'ni leelle; leellemma qicinna konneechchinn butti'a hedheen: 2 Simi'ooni Pheexiroosi, Didimoosi hiyyemeek Toomaasi, Geliilake bogike Qaanake Naatina'eeli, Zebidewoosixxi labbaxxi oosenna hordofeeyye giddii'ni wele lame welti mitteba hexxemman. 3 Simi'ooni Pheexiroosinna insa'ne, «Ani qulxu'me abixxonnaa me'aannen» hiyye: insa'nenna, «No'onna ati welti me'innano» hine. Insa'ne'na ke'ne me'ineexxi hobolote'ni e'yine: insa'nenna eettene hashsha'ni mittechchonna abindemmabaan.✝

4 Bogi soode wodda, Yessuusi abbaayyati qarqara uurre: yaane kinn hordofeeyye Yessuusite kadeexxa insa'ne egennemmabaan. 5 Isinna insa'ne, «Tee oose, qulxu'me affinee?» hiyye.

Insa'nenna iso'n, «Anfeebe'non» hine. 6 Isinna insa'nee, «Marabe ha'nooxxa hobolotibaa'ni middi darre'ni darbe qulxu'me alfitinaan» hiyye. Insa'nenna marebe darbineexxa yanna qulxu'metixxe bira sa'nenaa'ni kexxeexxa marabe harkisa dandeennebaan.✝ 7 Ookkoneechchi uduma Yessuusii eeyyammak hordofisanji Pheexiroosi'n, «Goottakeqqa!» hiyye. Simi'ooni Pheexiroosinna, «Goottakeqqa» hiyyeeka hiyyichcho laqee wodda; isi fulchedheexxi butta uggemmaxxa fugatammaxxa seemma oddo'weexxi utaale abbaayya giddo e'ye. 8 Wele hordofeeyye kinni abbaayyati birii'ni lame dhibba ciqile calla bayyantemmaxxee, qulxu'me wo'miteexxa marabe insa'ne harkinsa'ni eettene hobolonni iyyedange.

9 Insa'nenna bagoba fullee wodda giiratike kashilo'n qulxu'metanna buddeena uunde. 10 Yessuusinna insa'nee, «Ta'a abiddinemmaxxe qulxu'menaa'n iyyedagge» hiyye. 11 Tennexxee Simi'ooni Pheexiroosi hoboloti giddi'a e'yeexxi marabe bagobaa harkise: marabe giddo mitte dhibbanna onde tommenna sase lumollamma qulxu'muwwa wo'miteemman: konne qicinni marabe wo'mitoolenna darendebaan. 12 Yessuusi insa'nee «Amme itte» hiyye. Insa'nenna isi Gootta kadeexxa egenemmaxxee hordofeeyye giddii'ni, «Ati ayyete?» hiyye isoo qoratee haseeki hedhemmabaan. 13 Yessuusi dageexxi buddeena aadheexxi insa'ne'a uwwe: quluxu'metanna insa'ne'a uwwe.

14 Yoona Yessuusi rewotenaa'n ke'echchi uduma ifixxe hordofeeyye'n leella'naa tinni sakkaxxe yannan.

15 Insa'ne indeechchi uduma Yessuusi Simi'ooni Pheexiroosii'i, «Koo Yoonake belto Simooni! Insa'ne irra ati anee eetaate?» hiyye. Pheexiroosinna hiisseexxi, «Eeti, anke Goootta! Ani atee eeyyannexxa atinn egendeetten» hiyye. Yessuusinna hiisseexxi, «Beltanna anxa bobaasi!» hiyye. 16 Langaxxanna Yessuusi «Koo Yoonake belto Simi'ooni, dhugaandinni ati anee eetaatte?» hiyye. Isinna, «Eeti, anke Gootta, ani atee eeyyaannexxa atinni egendeetten» hiyye. Yessuusinna, «Buruusa anka heqqi» hiyye.

17 Sakkaxxa yanna isoo, «Koo Yoonake belto Simi'ooni, ati Anee eetaatte?» hiyye.

Pheexiroosinna Sakkaxxa yanna Yessuusi isoo, «Ati anee eetaatte» isi hiyye qoremmaxxee, «Anke Gootta; ati duuchchiinxa egendeetten; Ani atee eeyyaannexxa atinna egendeetten.»

Yessuusinna isoo hiyyee qici, «Gedhebo anka allal. 18 Ani dhugaate ate'n hiyyaannen; ati ka'ummumma hexxette wodda seemma ifi'aanni oddo'wite eetettebaa me'itaattan; yaane kinn ati cindatto wodda anga atixxa iimi'a farri assittaton; wele manjinna ate'n ka'lishe'naa me'atee eetaabexxobaa atee adhdhe me'aan.» 19 Yessuusi tenne hiyyeechchi Pheexiroosi hitta hexxeexxe reyonni Mageno ulfessaaxxa ege'nisho'aten. Ookkoneechchi uduma Pheexiroosii, «Anee hordofi!» hiyye.

20 Pheexiroosi udumi'a wirri hiyye wodda Yessuusi eeyammak hordofalli duuka insa'nexxa me'aa'naa afe; kunni hordofall ookkone wodda hashshixxa ita insa'ne inda'naa Yessuusixxe qoma bira shikki hiyyeexxi, «Anke Gootta; atee sa'isse uwwa'neek ayyete?» hiyyeekemman. 21 Pheexiroosi isoo uudeexxa yanna, «Anke Gootta! Isinataa?» hiyye Yessuusii qore. 22 Yessuusinna hiisseexxi, «Ani daganno qico'n isi hedhoti hedhaashsha eeti uwwonnole midde atee maachcho giddo e'yishe? Ati umo atingeninni anee hordofi» hiyye. 23 Tennena'ni kexxeexxa, Kunni hordofanji reyabaan hiyyedaaxxi odo dayyuwwiinxe oddo'ni laqende. Yaane kinni Yessuusi, «Ani daganno qico'n isi hedhoti hedhaashsha ani eetii uwwonnole atee maachcho atee giddo e'yishe?» hiyyee malee isi reyabaaxxa haaso'ebaan.

24 Tenne yaanuwwa dhugaa kuleekinna tennee borreesseeki konne hordofanjon: dhugaa kula isixxinna dhugaatixxe kaddeexxa no'o egeneennen. 25 Yessuusi hujeexxi wele heddo yaanuwwa hexxeen: duuchchiinxa yaane mitte mitte sila borreessendeexxe kaddeele kinni borreessemeeka maxaafa butta duuchcha'n uginaaki boonchi hedhaachcho ane'n lababaani.