1 Ookkonneechchi uduma Yessuusi, ookkoo hedhemmak Ayihudi isoo shiyo'a hasaammaxxee isi Yihudake boga'n mammarema waaleexxi Geliila mammaremaamman. 2 Eettene yanna Ayihudiink fooqiink ayyaan shiqeemman:✝ 3 Tennexxee Yessuusik dayyuwwi iso hiyyee qici, «Hordofeeyye atixxi, ati hujjaatexxa huje uuddo'aa ati kabaa'ni Yihuda'a me'i. 4 Ifi farri asso'a haassa'ni sho'ik hujaak ayyinna hedhebaan. Atinna tenne yaane duuchcha assitaattole umo atika konne butta duuchchike manna'n leelliishi.» 5 Tennenna hiyyatee gennechchi ising dayyuwwi midde iso'ni amana gopheemmaxxeten. 6 Yessuusinna insa'nen hiyyee qici, «Yanna anxi ta'i qico gelte'eebaan: ha'no'aa kinn hiini yannanna elde'eexxen. 7 Butta duuchcha ha'noo giba dandeettabaan; yaane kinn Anee gibbaachchi kaba buttixxi huje elobaaxxe kaddeexxa ani dhugaa kulaannaxxeeten. 8 Ha'noo konne ayyaanibaa me'e. Ani'aa yanna ta'i qico geya gophpheemmaxxee ayyaanibaa marabo'no.» 9 Isinna tennee insa'ne'n hiyyeexxi Geliilanni gate.

10 Kaddo malee isiki dayyuwwi ayyaniibaa me'eechchi uduma isinna ayye'ninna leellebaang sho'iki ayyaniibaa me'e. 11 Ookkone ayyaana'n Ayihudi «Iikki manjichchi haba hedhe?» hiyya'ni isoo hasaamman. 12 Isixxee ardi giddo lumoxxi hashashsho hexxemman. Mitti mitti manni, «Isi eloke manjon» hiyyaa wodda. Weli kinn, «Waawwoti isi arda dedhisaaken» hine. 13 Kaddo malee manni Ayihuda soda'aatenaa'ni kexxeexxa isixxee farri asseexxi haaso'aammaki hedhemmabaan.

14 Ayyaanna ulfeessatixxe oddo'ni genneexxe yanna'ni Yessuusi Woyyichchi Galmibaa mareexxi barachchiisa safe. 15 Ayihudikinna tennee mambe'a hiyyati, «Kunni manjichchi baratebaang hitta maxaafuwwa ege'na dande'e?» hiyye. 16 Yessuusinna insa'ne hiyyee qici, «Ani berachchiisaanexxi barachchiisa umo ankixxe kaddebaak anee ergekenaa'ni daggeexxen. 17 Ayyinna Mageniinxa fedhii asso'a hasoole barachcho anxi Mageniibaa'ni yookaan anenaa'ni daggeexxa foyee ege'naani. 18 Ifike umixxa haaso'ak ifinge ulfinna hasaan; isoo ergeekika ulfinna hasaak kinn isi dhugaatiken; dharikinna iso'ni hedhebaan. 19 Muuse ha'no'aa seera uwwemmabaata? Yaane kinn ha'noo mittikinna seera ookkonee wonshitinebaan. Mayeete ha'noo anee shiltino'a hassina'neeki?» 20 Ardikinna, «Ati fuggichcha hafuura affeetten; ayyete atee shiyo'a hasaak?» hiyye. 21 Yessuusinna insa'ne'n hiisse hiyyee haaso'ee qici, «Ani mitte mambe'iinxa huje hujennele, eettene huje'ni ha'no duuchchiing mambe'a hitinaan. 22 Muuse jila ofo'lishatika seera ha'no'n uwween; kunni seeri kinn edike annuwwinaa'n afeemeeke malee Muusenaa'nitebaan. Kaddo malee ha'no edike sanbatixxa barra oose jila ofo'lishina'neen.✝ 23 Muusek seeri diigemabaashsha annoole edi sanbata'ni ha'noo jila ofo'lishina'neexxenni, ani manna edike sanbata'n fayyisenaxxee mayeeta ane'ni mufatina?✝ 24 Ha'no manjo alba uudina'ni murte mura waaldineexxi dhugaatixxa murte murre!»

25 Eettene yanna Iyyerusaalemi hedhemmak mitti mitt manni hiyyee qici, «Shinno'a hansa'neek manjichchi konnendebaa? 26 Kunse isi farri asse haaso'a'neen: insa'nenna mittechchonna iso'n haasonna'nebaan; kunni manjichchi Kiristoosite kadeexxa baallomiink manni dhugaandinni ege'nu'uu? 27 Yaane kinni kunni manjichchi haba'ike kadeexxa no'o egenneennen. Kiristoosi dagaa woddaqa habaa'nite kadeexxa ege'naak mittikinna hedhebaan.» 28 Ookkoneechchi uduma Yessuusi Woyyichchi Galmixxe baxxe'ni barachchiisa'ni hafuura gikki asseexxi hiyyee qici, «Eeti, ha'no anee egedine'een, habaa'nite kadeenexxanna ha'no egedine'een. Ani kaba hedheeneki anke uminnitebaan; yaane kinni anee ergeek isi dhugaatiken. Ha'no isoo egendinebaan; 29 yaane kinn ani isibaa'ni dagennaxxee, isinna anee ergemaxxee isoo ege'neennen.» 30 Tennexxee insa'nenna isoo abindo'a hanse: yaane kinn yanna geya gophphemmaxxee ayyinna isoo abidebaan. 31 Ardi giddii'n heddi iso'ni amaneexxi, «Yoona Kiristoosi dagaa wodda kunni manjichchi huja'neeka mambe'iinka beessisuwwa sa'eeka assaan?» hiyye.

32 Feerisitotinna ardi isixxee hashasha'n haaso'a'naa laqqe: qeesetik sooreessuwwinna Feeristo isoo abindaashsha Woyyichcha Galma heqqammakaara iisbaa eregine. 33 Yessuusinna hiyyee qici, «Ani ha'noonni welti turaanneki heenooxxe yannani; ookkonechchi uduma anee ergemmakibaa me'annon; 34 ha'no anee hassinaan; yaane kinn anee affinabaan; ani hedhennebaa ha'noo daga dandetinaba'a.» 35 Ayihudikinna weli'aanni weli, «Konne manjichcho afatee dandeennabe'nochchi isi habaa me'a hedeete? Dedha isi Girike giddo xexxeereeme hedha'neeke no'oke firiba mareexxi Girikoota barachchiiso'a haseete kadduuni? 36 ‹Ha'no anee hassinaani yaane kinni anee affinabaan› iittanni, ‹Ha'no ani hedhennebaa daga dandeetinabaan› hiyya'neek maa hiyyateete?»

37 Ayyaaniinke muuxama'ni eettene lumoxxe barra'ni Yessuusi uurre'e hafuura gikki asseexxi hiyyee qic, «Ayyinna dheebo'weeki hedhoole anibaa dageexxi ha'wowwaal!✝ 38 Ane'ni amanaak Woyyichchi maxaafi hiyyemmashshanni hedhotike wode'ixxi muumme isi giddii'ni phu'issaan.»✝ 39 Isinna tennee haso'eechchi iso'n amanaak manni adhdhaake Woyyichchi Hafuurixxeemmaten; tinninna kaddeechchi Yessuusi ulfiniinba geya gopheemmaxxee Woyyichchi Hafuur uwwemeemmabaan.

40 Ardi giddii'n mitti mitti hiyyichcho isika laqeexxi, «Kunn manjichchi dhugaandinni wabeekaken» hiyye. 41 Welikinna, «Isi Kiristoositen» hiyye; iittanni weli manni hiyyee qici, «Kirsitoosi hitta Geliilaa'n daga dande'a? 42 Woyyichchi maxaafi Kiristoosi Daawwitixxe sannenaa'ni, Daawwiti hedhammabaa'ni, Beeteliheemii'n dagaaxxa kulaammabaata?» hiyye.✝ 43 Tennexxee Yessuusixxe buuttonni ardiinxe oddo'ni gargar higa kadde. 44 Mitti mitti isoo abido'a hase; yaane kinni ayyinna isoo angati abideba'a.

45 Ookkoneechchi uduma Woyyichcha Galma heqqammak heqqanjuwwi qeesetike sooreessuwwibaanna Feerisitotibaa ille iima higeexxi me'e; insa'nenna Woyyichcha Galma heqqammakaara, «Ha'noo mayee isoo iyyedaga gophphine?» hine. 46 Woyyichcha Galma heqqammakiirinna, «Kunni manjichchi haaso'a'neeshsha haranga ayyinna haaso'e ege'neba'a» hiyya'n hiise haaso'e. 47 Feerisitotinna hiisiteexxi hite haasotee qici, «Ha'nonna sobendineen hiyyatee? 48 Meya baallomeekeerinaa'ninna yookaan Feerisitotenaa'n iso'ni amaneeki hedhee? 49 Muuseka seera ege'nabaak kunni ardi kinni badinemeeken.» 50 Konneechchi edo Yessuusibaa mare'eemmakinna insa'nenaa'n mitteke kadeek Niqodimoosi insa'nee hiyyee qic, 51 «No'oke seeri mitte manjixxi ku'la edisseexxi laqendebaakinna isi maa asseexxa ege'nedebaak iso'ni murte muraata?» 52 Insa'ne iso'ni, «Atinna Geliilanaa'nitee? Wabeekichchi*Galiilanaa'n ke'abaaxxa Woyyichcha maxaafa qortee qo'nise affatton» hineexxi hiissine haasonne.

53 Ookkoneechchi uduma mitti mittiing ifi ifike minibaa me'e.