1 Sakkaxxa barra Geliilake boga'n Qaana hiyyemaake qachcha'n aadha heerumiinxe jila hexxemman; Yessuusixxi amanna ookko hexxemman. 2 Yessuusinna isixxi hordofeeyye eettene aadha heerumiinxe jilabaa ye'emmeemman. 3 Woyinetixxi booka muddee wodda Yessuusixxi ama Yessuusii'i, «Woyinetixxi booka insa'nenaa'n muddeeqqa» hite. 4 Yessuusinna isee, «Tee manjichcho* maa anee assi hitaateta? Yanna anxi ta'i qico gelte'ebaan» hiyye 5 Ama isixxinna ookkoo ergatemaammakaara «Isi ha'noo'ni hiyyaaxxa duuchcha asse» hite.

6 Ayihudiink anshedhatik seeri ajajjammashshanni jaani kinjik hujemeek waabuwwi ookkoo hedhemman; mitti mitting waabi lame yookaan sase oddowwa wode'e abida dande'aakemman. 7 Yessuusi ookkoo ergatammake manna «Lumolla waabuwwa'ni wode'e wonshe!» hiyye. Insa'nenna lumolla waabuwwa afo'i qico'ni wode'e wonshine. 8 Ookkonneechchi uduma isi insa'nee: «Hanii'ni ikkildine ita itisammake murrichchi'a uwwe» hiyye. Insa'nenna isi ajajemmashshanni assine. 9 Itatiki murrichchinna woyinetixxe bookabaa jijjiiremeeka wode'e suuxe: kaddo malee isi tinni woyinetixxi booka habaa'n dageexxa ege'nebaan: ookonne wode'e ikkilemmak erganjuwwi kinni egenneemman. Ookkonneechchi uduma isi waajubichcho qofitinni ye'eexxi: 10 «Manji duuchchi edise shiqisaaxxi eloxxe woyinetixxe bookan: keesummatinna heddo ha'witeechchi uduma goofa woyinetixxa booka shaqisaan: ati kinn eloxxa woyinetixxa booka ta'i qico'n tursiteetten.»

11 Yessuusi konnee mambe'iinke beessisuwwinaa'n ediseeka Geliilake boga'n Qaanake qachcha'ni asse: ulfinna isikanna ifise: hordofeeyye isixxinna iso'ni amande. 12 Ookkonneechchi uduma isi ama ifixxenni, dayyuwwi ifikinninna hordofeeyye ifixxenni welti Qifirnahoomike qachchibaa me'e. Insa'nenna ookkoo heenooxxa barra ofolle.✝

13 Ayihudiink sa'atik ayyaan shiqeeshshanni: Yessuusi Iyyerusaalemi'a me'e.✝ 14 Woyyichchi Galmixxe baxxe'ni lalo, gedhebokanna guugeenna gurgurammaka manna iittanni ofo'leexxi maalaqa jijjiidhdha'neeka manna ookkoo hedhe'naa afe. 15 Tennexxee isi wodarotixxa halange giisseexxi gedhebokanna lalo duuchcha Woyyichchi Galmixxe baxxenaa'ni fulche: isinna jijjiidhdhammake mannika maallaqa xeere: beeruwwa insa'nekanna gonbise. 16 Isinna guugeenjo gurgurammaka manna, «Konneera ookko'ni fulchee! Anke Annika mine dadda'latike mine assitinoqqe'e!» hiyye. 17 Hordofeeyye isixxi, «Atike mini'a afennexxi eloxxi hinaafe anee giiratishsha gubbeen» hiyyende borreessendeexxa kassi hite.✝

18 Ookkonneechchi uduma baallooma afeemak Ayihudiink manni Yessuusii'i, «Ati tennee duuchcha assatee dande'a affeettexxa kokeessaaka maa mambe'a beessisa no'o'ni leelishshatto?» hine. 19 Yessuusinna insa'ne'n, «Konnee Woyyichcha Galma diige! Aninna sase barra giddo iso hiissee uurrisannon» hiyye hiise haaso'e.✝ 20 Tennexxee Ayihudi isoo, «Konnee Woyyichcha Galma ijaaratee shoole tommenna jaane wogga bireen; hittata ati sase barra giddo isoo hiissite uurrissatto?» hiyye. 21 Yessuusi kinni Woyyichcha Galma hiyye haaso'a wodda ifike bisixxeetemman. 22 Tennexxee isi reyotenaa'n ke'eechchi uduma isixxi hordofeeyye isi maa haaso'eexxa kassi hiteexxi Woyyichcha maxaafuwa'ninna Yessuusi haaso'eke hiyyichcho'n amande.

23 Yessuusi sa'atike ayyaana'n Iyyerusaalemi hedhemma wodda heddi manni isi hujemmaka beessisuwwa uudeexxi iso'ni amane. 24 Yessuusi kinn manjo duuchcha ege'nemmaxxee insa'nee amanaammabaan. 25 Isi manjiinke godobi giddo hexxeexxa duuchcha ege'nammaxxee mittikinna manjiinxee iso'n dhugaa kula hasissaammabaan.