1 Anke dayyuwwaa! Ha'noo giddii'ni heddi barsisalluwwake kadoqqe'e; tinninna kaddeechchi lumoxxa murte adhdhinannoxxa egendine'een; 2 No'o duuchchiingi heddo yaane'n dedhake'n inbanon. Haaso'ake haaso'a'ni dedhake'n ibabaki hedheexxe kaddoole isi biso ifika duuchcha hira dande'eeke wo'ma manjon. 3 Fadhadi no'aa ajajemaashsha afo'oke'ni bixaala e'yinshanno wodda ookkene fadhadika biso duuchcha akeeka dandeennanon; 4 yookaan ha'noo marka uudde. Fedhee qico midde lumoxxenna jabaaxxe diidallonni oofemmaake kandoolna, isoo oofammak manjichchi shiixxoxxe marenni ookkone markaba eeyyebaa akeekaan.

5 Iittanni arraabi shiixxoke bisiinke qoola kadeen hedhee lomollamma yaanuwwa'ni ifi saadaan. Lumoka gongoma shiixxoxxi giira ittee birataa qico qalbeefatte. 6 Arrabikinna iittanni giiratishshateni; isi no'oke bisiinke qooluwwi giddo afemaake fuggitte buttan; isi biso no'oka battoosaan; iittanni gehaanme giddii'ni fuldaammaxxe giirashsha hedho no'oxxika me'injo duuchcha gubaan. 7 Heene bifaki binchuwwi, ci'aa, iittanna buttate'n godobiki me'aachchuwwi, abbaaya giddo hexxaaxxi dada duuchcha leenjisema dandende'eedaan; manjikinna konnelchuwwa lenjise'een. 8 Yaane kinni arrabo dande'e leenjisaak ayyinna hedhebaan. Shiltaaxxi ha'laa isi giddo wo'miteekenna hafuura adhitabaxxe fuggoxxe yaanen. 9 Arrabo no'okenni Gootta no'okanna Mageno Aabi eebinsanon; isinninna Mageniinxe fakkenni dademeeka manna bandannon. 10 Mitte afo'onaa'ni eebatinna badino fuldaani. Anke dayyuwwaa! Tinni kadiyyo hasisabaan. 11 Mitte muummena'ni xe'maakinna qararaak wodi'i meyaa fulaa dande'aataa? 12 Anke dayyuwwaa! Balasetik haqqichchi ejersiinxa gumma yookaan weyinetik hiddichchi balasetixxa gumma gummisate'e dande'aataa? Iittanni maxinetike wode'enaa'n xe'maaki wodi'i afema dande'abaani.

13 Ha'noo giddii'n beekinna wodaniik manji ha'nooxxe oddo'ni ayyetee? Beekakenna eloke manjo kada isixxa elooke adabininna eloxxe hujenni leelishshowwaal. 14 Yaane kinni qaraarito gaabenna umo ifika ifi eeyya ha'nooxxe qalbe'n hexxoole tennexxe mee ifi saadde; dhugaate'n waakaatinoqqe'e. 15 Iitta hedhdheki beekumi iimi'n dageekebaan; yaane kinni butta duuchchike, maalinkenna fuggichchi hafuurken. 16 Gaabetinna umo ifika eeyya hexxeeba ookko weekenshanna fuggoxxi huje hexxaan. 17 Yaane kinni iimate'naa'ni dagaak beekumi kinni sirte'ni ca'ichchak, higgeen nage'aa eeyyaake, shaqqake, ajajemaake, mararitenna eloxxi gumma wo'miteeke, gamisanna holla hexxebaaken. 18 Qullummatixxi gumma nage'aa eeyyaake manni'a nage'iki facaassendaani.