1 Isira’eeli ardixxe woyineshsha barqaaqammake mani:

bira saxxeexxa gummanna gummise:

Gumma bira saxxeexxe qixxe’ni

heddo tolchimalchuwwa giissedhe:

Fichchi insa’neki miseexxe qixxe’ni

mageneeffachchotixxa soodduwwa danchoosse.

2 Qalbe insa’nexxi xaqarotixxe;

balleessa ifi ifixxe hira alfinaan;

Duuchchi Woddiki Gootti insa’neka tolchimalchuwwa balleessaan:

mageneenfantammaxxa soodduwwa insa’nexxa diigaan.

3 Insa’nenna,

Duuchchi Woddika Gootta ulfeessa gonphenaxxe, «No’o moyanjo anfebe’non:

Moyanjo anfeennelenna

isi no’o’a maa assa dande’ammata?» hinaan.

4 Insa’ne heddo addachiisa uunaan;

dhariki kakantaan

Tennexxee anxi murte;

Tennexxee fichchi giddo lattammaxxe ha’latixxe bada’ashsha murte insa’ne’n bira saxxa.

5 Samaariyaa hedheek ardi

Beeti’awweni hexxeexxa jabbetixxa fakke sodataan;

Ardikinna isixxee oodhaan;

ulfinna isike’n yo’osha gammadeek duuchchi,

Booji’o insa’nenaa’ni adhendeemmaxxee

yabaabulto qeesole iittanni isi’a ooxxaan.

6 Lumoke moyanji’a tenne fakke mattiinsha Asoori’a adhdhendaan

Efireem salphataan;

Isira’eelinna mageneefattammaxxe fukkuwwa’ni shookkaan.

7 Semaariyanna moyanji iseki,

wode’i hana hedheeke hombishsha ba’naan.

8 Isira’eelike ardixxe cubbo kadeek Awwenik

mageneefachchotik tullichchi ba’aan:

Iso’n utenna qu’muudo fuldaan:

tolchimalchuwwa insa’neka buqqaan:

Okkone wodda insa’ne koobuwwa «No’o buqqe!»

tullichchuwwikinna no’o’ni hana ibbe! Hinaan.✝10:8 Luq. 23:30; Wal. 6:16.

9 «Tee Isira’eel Gibi’axxe yannanaa’n cubbo hujjineen;

okkoonna jabaatinee udumi’aanna higginebaan;

Giba’a hedhemmaki elobaaxxa hujammakiira

bagedi insa’ne biremmabaata?

10 Ani hasennexxe yanna’ni insa’ne’e xixannon;

lenbe, lenbe cubbo hunjemmaxxee insa’nee xixo’a

gosa gosak ardi insa’ne’ni bukki hiyyaan.

11 Efireemi uuxxa eeyyammake

leenjisemeke jibbishshaten;

isike dancha gooba’ni

Qanbara uggannon;

Efireemii xamadannoni

Yihuda qotaan:

Ya’iqoobinna buttinna shaqqisaan.

12 Ha’no ifi’aanni qullumma hujje;

jabaxxe jaalalaxxa gumma haa’me;

Hujemebaaka boga hujje

isi dageexxi

Qullumma ha’noo’ni xeeniinsha gansiisammaxxee

Duuchchi Woddika Gootta harse.✝10:12 Erm. 4:3.

13 Ha’noo kinni fuggoxxa rokkineen

cubbote haa’mitineen

dhariinxa gummanna ittineen.

Ifixxe hunna’ninna,

lolammake ha’nooke mannixxe bira sa’ne’ni addatineen.

14 Shelmaani, Beeti’aribeel loliinxe yanna’n diige biremmashshann;

amuwwatanna oosuwwa insa’nexxininn welti; buttinake’ni rogojemmashanni;

Waakensha atike arda’ni daggaan

kolluwwa atixxa duuchchanna diingaan.

15 Tennexxee tee Beeteli: fuggoxxi atixxi huje: jabaxxe kaddemmaxxee:

ate’ninna iittann kaddaan:

Iitti bara gelta wodda:

Isira’eelik moyanji ijje ba’aan.»