1 Tee Isira'eel gammaddoxxee;

wele gosa gosake mannishsha ilillissoxxee,

Atinna Mageno atikee addatendebexxon,

Midha uuxxinammaxxe aldu'muwwa'ni;

Yabaabulto melaalle'a uunammaka hira eetetten.

2 Aldu'me ha'nooxxenaa'n midha woyine miice'nammabaa'n woyinetixxa booka affinaba'a

Reefik woyintik bulbulinna afinnabaan.

3 Insa'nenna Duuchchi Woddike Goottike boga'ni ofollabaan;

Efireemi Gibtsee'a higaan;

Isinna Asoori'n battoteexxa ita itaan.

4 Woyinetixxe bookaka tolcha Duuchchi Woddike Goottii'a tolchinabaan;

tolchi insa'nekinna isoo gammachchiisabaan;

Iitta hedheeki tolchi insa'ne'a yaaddote'ni hedheeke mannixxe waasa insa'ne'a kadaan;

ettene ita itaaki duuchchi batto'aan.

Tinni ita umo insa'negixxe kaddaan;

Duuchchi Woddike Goottike woyyichchi galmibaa e'yitabaan.

5 Duuchchi Woddike Goottike ayyaanixxe barra'ni,

woggatike ayyanuwwa ha'nookixxe barra'ni maa assitina'ne?

6 Insa'ne ba'netenaa'ni baqante fulloolenna midde;

Gibtsee insa'nee bukki assitaan;

Memifoosinna insa'nee moogaan.

Insa'neke birretike sibiljuwwixxe karra'ni laaleessi yaa'ane;

Seemmati giissineeke fooqa insa'neke'n ute buqqaan.

7 Xixichiinxi barra daggeen;

murtetixxi barranna shiqqeen;

Isira'eelinna tennee egendowwaal!

Cubbo ha'noxxinna heddattemmaxxee;

naaphunte ha'nooxxinna jabaxxe kaddemmaxxee

Wabeekkichchi gowwiinsha;

Magenokee ergatemmaki manji maraatiinsha uudemeen.

8 Iikki wabeek anke Mageninni welti

Efireemike heqqanjon;

Yaane kinn ora isike duuchcha'ni fonxoro,

Isike Magenike mine'ni naaphunte isoo heqqitaan.

9 Gibi'ake barishsha

insa'ne battooneen;

Mageni fuggo insa'nexxa qaabbataan

cubbo insa'nexxeenna insa'nee xixaan.✝

10 «Ani Isira'eeli alfa;

woyinetixxa gumma; qiilla gammoojje'n alfennexxe qixxemman;

Ani edika ha'nooka annuwwa uuda;

umiinxa balasetixxa gumma uudennexxe qixxemman;

Insa'ne Bi'eerfegoori'a dange wodda kinni

ettene shookisa'neexxe fakke'a ifi sa'isine uune;

insa'nenna ettene eenemmaxxe fakkeshsha battoonne.✝

11 Efireemiki ulfinni ci'atishsha phirri hiyye ba'aan;

ila, siila'wanna qaxxarro hexxebaa.

12 Insa'nenna oose nose'noolenna midde

oose belo gantaashsha insa'nenaa'n adhdhannon;

Ani insa'ne'n dudduro wirri hiyyannoxxa

yanna aanee insa'ne'a!

13 Efireemi Xiroosishsha

eloke booncho'n kansee'naa uudeennan;

Ta'a kinn Efireemi oose ifixxa

manjo anga sa'ammake manna'n sa'isse uwwaan» hiyye.

14 Koo Duuchchi Woddike Gootta insa'ne'a uwwi;

maachcho insa'ne'a uutattota?

Gufataaka gadamessuwwanna

bagoka unnunuwwa insa'ne'a uwwi.

15 «Insa'ne Geligeelake booncho'n hunjeexxe fuggoxxe huje duuchchanaa'n kexxexxa;

ani okkoo insa'ne jibbennen;

Hunjemmaxxe cubboxxe;

anke minenaa'n insa'ne shorrannon;

Konneechchinni edi'a insa'ne eeyyabe'non;

akeekisano insa'nexxi duuchchi jallaameeyyeten.

16 Efireemi ganeme;

hiddi insa'neki bage;

insa'nenna gumma guminsabaan;

Oose i'linoolenna midde

oose insa'nexxa shiyannoni» hiyye.

17 Insa'ne ajajema gonpheemmaxxee

anki Mageni insa'ne waalaan;

insa'nenna gosa gosake ardi giddo doonsa kiyya hina'ni he'naan.